Мусульман къадынларынынъ иссеси!
«Мусульман къадыны тарафындан япылгъан эйилик» акциясы 2 яшыны толдурды! Бу вакъыт девамында КЪМДИ «Буллюр» къадынлар Бирлешмесининъ тешеббюси иле 18 джамиге ярдым косьтерильди, 1, 6 миллион рубле топланылды.
«Буллюр» тешкилятынынъ ребери Нияра Джанбазова:
«Бир джами ичюн садакъа параларыны бир ай девамында топлаймыз. Топлангъан параларны имамларгъа я да джамининъ къуруджылыгъынен багълы олгъан инсанларгъа беремиз. Паранынъ микъдары бизге багълы дегиль. Эр шей Аллахтандыр! Бельки, бу джамини къурмакъ ичюн етерли дегильдир, амма мусульман къадынлары оларакъ бизим эсас макъсадымыз – четте къалмамакъ, дигерлерге орьнек косьтермек ве бу хайыр ишине даа чокъ инсанларны джельп этмектир. Бирликте биз маневий къыйметлеримизге севги ашлаймыз! Пара топланувы Къырым Мусульманлары Диний Идаресининъ къуруджылыкъ болюги тарафындан незарет этиле».
Сентябрь айында пара топланувы:
ДЖАМИ: Джанкой районынынъ Новокрымское коюнинъ джамиси
ТОПЛАВ ПАРАСЫ: 70 бинъ рубле
МАКЪСАД: джамиде тамир ишлери.
Бу хайыр ишине къошулмакъ истегенлер ерли имам иле я да +79788716258 телефон вастасы иле багъланабилелер.
Ислям дининде джамилернинъ къуруджылыгъы киби ишке буюк дикъкъат айырыла. Пейгъамберимиз (с.а.с.): «Ким кеклик къушынынъ (куропатка – ред.) ювасы къадар джами къурса, Аллах онъа Дженнетте эв къурар», деп айтты.
ЗЕМИНЕ Аджимамбетова