Биз Мухаммед Пейгъамбернинъ (с.а.с.) мусульман яшларнынъ тербиесинде ойнагъан ролюни огренмеге девам этемиз. Пейгъамберимиз яшларнынъ тасиль алгъаныны чокъ истеген ве даима оларны тиллер ве илимлерни огренмеге давет эткен эди. Мединеге иджрет эткен сонъ, Пейгъамберимиз джамиси янында «Суффе» деп адландырылгъан мектепни ачты. Мектепнинъ талебелерини «Асхаб-ы Суффе» деп адландыргъан эдилер. Талебелернинъ сайысы 70-400 инсан дживарында эди.
Мухаммед Пейгъамбер (с.а.с.) шахсен озю де яшларнынъ тербиеси ве тасиль алмасында иштирак эткен эди. Яш, тасилли сахабелер несили илериде Ислям медениети ве илимининъ гузель бир темели олды. Мухаммед Пейгъамберни (с.а.с.) тек корьмек дегиль де, ондан тасиль алмакъ бахтиярлыгъына Энес бин Малик, Али бин Эбу Талиб, Усаме бин Зейд, Абдуллах бин Омер ве дигерлери наиль олдылар.
Пейгъамбер (с.а.с.) Аллахкъа итаат эткен ве Ислям ахлякъынен яшагъан яшларны мужделеди, оларнынъ Къыямет куню Аршнынъ талдасы тюбюнде оладжакъларыны бильдирди. Шубесиз, Юдже Аллах бойле къулларыны севе. Пейгъамберимиз хадисинде бойле дей: «Аллаху Тааля генчлигини Аллахкъа итаат ёлунда кечирген яшны севе» (Суютий).
Бойле яшларгъа Пейгъамбер (с.а.с.) башкъаджа даврана эди. О, оларнынъ инкишафыны эм маневий, эм де маддий тарафтан дестеклей эди. Умернинъ огълу Абдуллах бойле тариф эткен эди: «Бир кере мен, сеферлернинъ биринде, Пейгъамбернинъ (с.а.с.) янында эдим. Мен бабама аит олгъан яш девенинъ устюнде эдим. Онъа баш этип оламадым, о, эп Пейгъамбернинъ (с.а.с.) огюне чапа эди. Бабамнынъ кейфи бозулды ве, о, манъа девени, Пейгъамбернинъ (с.а.с.) огюне чапмасын деп, тынчландырмамны буюрды. Пейгъамбер (с.а.с.) буны корип, бабамдан мен отургъаным девени сатмагъа риджа этти. Бабам ич тюшюнмеден: «О сизинъкидир», – деп айтты. Деве алынгъан сонъ, Пейгъамбер (с.а.с.) манъа чевирилип, бойле деди: «Энди бу сенинъ девенъ, оны насыл истесенъ, ойле де къуллан» (Бухарий).
Пейгъамбер (с.а.с.) сахабелерине нисбетен чокъ гузель даврана эди. Олар ичюн къасевет этип, Ахиреттеки ерлери ичюн чокъ тюшюне эди. Онынъ ичюн эм бу дюньяда, эм де келеджек дюньяда ярдым этеджек тевсиелерни сыкъ-сыкъ бере эди.
Бир куню Пейгъамбер (с.а.с.) Муазны къолундан тутып: «Эй, Муаз, емин этем ки, севем сени!», – деп айтты. Муаз исе: «Ант олсун ки, мен де сизни севем, эй, Аллахнынъ Пейгъамбери!», – деп джеваплады. Бунъа Аллахнынъ Эльчиси бойле къаршылыкъ берди: «Эй, Муаз! Эр бир намаздан сонъ санъа бойле дуаны окъумагъа тевсие этем: «Аллахым! Сени зикир этмек, Санъа шукюр этмек ве гузель къуллукъ япа бильмек ичюн манъа ярдым эт!» (Ахмед, Эбу Давуд).
АЙШЕ ДУРАН