Къадимий заманларда Танъры дюньямызны ве кок-семаны яратты. О, Къадирдир. Онынъ кучю ве къудрети эр шейге ете. Сонъра ильк инсан яратылды. Ады – Адем, деп къоюлды. Онъа, алемдеки эр бир варлыкънынъ ады огретильди. Хакъ ве батылны айырмакъ, севги, мерхаметлик, ярдымсеверлик огретильди.
Адем (а.с.), пейгъамбер олып, ондан сонъ кельген инсанлар ичюн нумюне олгъан. Онынъ ичюн Ава адыны ташыгъан омюр аркъадашы яратылды. Олар аиле къурдылар ве дженнетте яшадылар. Бундан сонъ, инсанларнынъ Рабби бу чифтни Ер юзюне ёллады, оларгъа эвлятлар багъышлады.
Адем (а.с.) озь балаларына дин къанунларыны огретти, олар исе, бу бильгилерни кенди эвлятларына бердилер. Бойлеликнен, бу бильгилер несильден несильге кечти. Лякин, омюрде хаталар, янълышлыкълар япылабиле. Адем пейгъамберинден сонъ чокъ йыллар кечип кетти. Базы инсанлар шукюр этмек не олгъаныны унуттылар. Бойле шараитте Яратыджы текрар, хатырлатыджы оларакъ, даа пейгъамберлерни ёллай. Пейгъамберлернинъ вазифеси – Яратыджыгъа ибадет этмек, акъикъатны ве эйиликни огретмектир. Бойлеликнен, Адем огъуллары, бу дюньягъа не ичюн кельгенлерини хатырлайлар. Инсанларгъа чокътан-чокъ пейгъамберлер ёлланылды. Нух пейгъамбер, Ибрахим пейгъамбер, Муса пейгъамбер ве Иса пейгъамбер буларнынъ базылары.
Энъ сонъки пейгъамбер исе – Азрети Мухаммед Мустафадыр. Салляллаху алейхи ве селлем. Ондан сонъра башкъа пейгъамберлер кельмейджек. Онынъ бизге огреткенлери исе, бу дюньянынъ сонъуна къадар инсанларнынъ догъругъа ёнельтеджек.
Эскендер Меметов