Адетте Рамазан берабердже кечирмеге, джамилер, сой-соп ве якъынларымызнынъ эвлеринде ифтарларгъа бармагъа, теравих намазларыны джемаатнен къылмагъа алыштыкъ. Бу сене исе, «Коронавирус» Covid-19 хасталыгъынынъ даркъатылувы себебинден Рамазан айы бираз фаркълы кечириледжеги беклениле. Бу акъта Къырым Муфтисининъ муавини Айдер Исмаилов тариф этти.
«Коронавирус» хасталыгъынынъ даркъатылувы себебинден экимлер инсанларны эвде къалмагъа чагъыраралар. Къырым Муфтилиги Рамазан айында алышкъанымыз джемаат ифтарларыны, теравих намазларыны кечиреджекми?
Динимизге коре, инсаннынъ аяты ве сагълыгъы эр шейден муимдир. Шу себептен, биз де экимлерге къошулып, инсанларымызны эвде отурмагъа чыгъырамыз. Хусусан, къартларымыз эвде отурсынлар. Пек муим бир меселе олмагъандже, тышкъа чыкъмасынлар. Интернет, телефон вастасынен ишлерини аль этсинлер. Бу себептен, ватандашларымыз ве къартларымызнынъ аятыны телюкеге огъратмамакъ ичюн, джума намазларыны биле вакъытынджа токътаттыкъ. Эр кес намазларыны эвде къылсын. Рамазангъа даа вакъыт бар, эльбетте. Умют этемиз ки, вазиет яхшыгъа догъру кетер да, биз гонъюль раатлыгъынен ибадетлеримизни джамилерде япармыз. Анджакъ, эр шейге азыр олмакъ керек. Вазиет денъишмесе, я да агъырлашса, о вакъыт эр кес теравихлерни эвинде къорантасынен берабер къылар. Ве, бойлеликнен, аиле муитинде ораза тутып, бу Рамазанны кечирген олурмыз. Эр шейде бир икмет бар. Аллах хайырлысыны берсин.
Рамазан айында ифтар кечирмеге истеген ватандашларымыз бу ибадетни насыл шекильде япа биле?
Рамазан айыны кене де толу-толу ибадетлернен кечирмек керек, эльбетте. Оразадан гъайры, теравих намазлары эвде къылыныр, фитир садакъалары ве зекят берилир. Садакъалар, ич олмагъанда, банк вастасынен берильмек мумкюндир. Ифтар бермек истегенлер де, шараит денъишмесе, буны емеклер торбасы шекилинде мухтаджларгъа еткизе билелер я да ифтаргъа масраф этеджек параны садакъа оларакъ да бермелери мумкюн. Аллаху Тааля инсаннынъ ниетине коре къабул этер, иншаллах.
Ватандашларымызгъа насыл тилеклеринъиз бар?
Миллетимиз бири-бирине мукъайт олмакъ керек. Вазиет агъыр, эвде отурмакъ керек деп, хайыр ишлерден чекильмек олмаз. Аксине, эгер де карантин девам этсе, о вакъыт маддий вазиети агъыр олгъан инсанлар къазанып оламайджакъ, ве оларгъа къол тутмакъ керек оладжакъ. Этрафымызда, къолум-къомшуда къартларымыз, тул ве чокъ балалы къоранталар, умумен, ярдымгъа мухтадж инсанлар бардыр, оларгъа ярдым этейик. Бу алларда халкъ озь бирлигини косьтермек керек. Ве Рамазан бу хусуста бизге ярдымджыдыр. Чюнки бу айда бутюн япылгъан хайыр ишлер 10 иле 700 къат даа зияде савапнен мукяфатландырыла. Бу ай бизлер ичюн бутюнлей имтиан оладжакъ. Миллет оларакъ бу Рамазанны ярдымлашаракъ кечирсек, даа кучьлю оларакъ байрамгъа етермиз, Аллахнынъ ярдымы да кечке къалмаз, чюнки, О, джемаат алында арекет эткенлерни севе. Айрыджа, миллетимиз, ватанымыз ве этрафтаки инсанлар ичюн дуа этейик. Дуа пек кучьлю бир силядыр. Бельки, эпимиз умумий оларакъ бир шартларда яшаймыз, амма эпимизнинъ имтианы фаркълыдыр. Раббим бу имтианларнынъ фаркъында олып, оларны эм ферд, эм де миллет колеминде шерефли бир шекильде кечмек ичюн бизлерге ярдымджы олсун.
Земине Аджимамбетова