Мубарек Учь айлар мевсими бу сене февраль 25-те башлана. Февральнинъ 27-синде исе, бутюн мусульман дюньясы мукъаддес Регъаиб геджесини къаршыламакъта. Бу гедже Аллахтан багъышланув тилегенлерни Раббимиз афу этер. Бу мубарек геджеде япылгъан дуалар къабул олуна, къылынгъан намазлар, тутулгъан оразалар, берильген садакъалар ве дигер бутюн ибадетлер ичюн сайысыз саваплар языла.
«Регъаиб» арапчадан кельген бир сёздир. Бир де бир шейни истемек, арзу этмек, онъа авесленмек, мейиль этмек ве оны къазанмакъ ичюн кучь сарф этмек демектир.
Ислям алеми эеджаннен беклегени мубарек учь айлар Регъаиб геджеси иле джанлана. Пейгъамбер эфендимиз Мухаммед (с.а.с.) мубарек Регъаиб геджесининъ эмиети ве къыймети акъкъында бойле буюрды: «Бу беш геджеде япылгъан дуалар къабул этиле: Регъаиб геджеси, Шабан айынынъ 15-инджи геджеси (Бераат геджеси), Джума, Ораза байрамы ве Къурбан байрамы геджелери» (Ибн Асакир).
Регъаиб – Реджеб айынынъ ильк джума геджесидир. Эр джума геджеси къыйметлидир. Бу эки къыйметли гедже бир арагъа кельгени вакъыт исе, даа къыйметли ола. Аллаху Тааля бу геджеде муминлерге ихсан ве икрамлар япа.
Регъаиб геджесинде япылмасы мумкюн ибадетлер:
• Куран-ы Керим окъумакъ. Къуран тиляветинен Аллахнынъ сёзюне севги, сайгъы ве багълылыкъ дуйгъулары янъылана ве къуветлене.
• Пейгъамбер Эфендимиз Мухаммед Мустафагъа (с.а.с.) саляват кетирмек. Азрет-и Пейгъамбернинъ шефаатыны умют этип, умметинден олмакъ шууры тазелене.
• Къазагъа къалгъан намазларны къылмакъ. Меселя, бир куньлюк къазалар ве иляве нафиле намазлар къылына биле. Регъаиб геджеси, мубарек олгъаны ичюн, чокъ савап кетире, бунъа коре де, адета, ибадетнен кечириле.
• Тефеккюр этмек. «Мен кимим, къайдан кельдим, къаерге кетем? Аллахнынъ менден истеген шейлери нелердир? Меним айткъан сёзлерим, япкъан арекетлерим догърумы?» киби мевзуларда, аят иле алякъалы меселелерде терен тюшюнджелер тюшюнилир. Кечмишнинъ нетиджеси чыкъарыла билир, шимдининъ ве келеджекнинъ планы ве программасы сызыла билир.
• Гунахлардан самимий оларакъ тёвбе ве истигъфар этмек. Бу мубарек геджени сонъ фырсат оларакъ дегерлендирип, насух тёвбесини кетирмек.
• Чокъча зикир этмек.
• Муминлернен эляллашмакъ. Оларнынъ дуа ве ризалары алмакъ.
• Аралары бозулгъанларны барыштырмакъ, гонъюль алмакъ, кедерли юзьлерни кульдюрмек.
• Озю ве дигер мусульманлар ичюн дуалар этмек.
• Фукъаре, кимсесиз, оксюз, етим, хаста, къарт ве дигер мухтаджларны зиярет этмек, оларны гузель ве самимий сёз, севги, шефкъат, урьмет, эдие ве садакъаларнен бахтлы этмеге ынтылмакъ.
• Къуран тефсирлери, хадислер ве оларнынъ шерхлери, диний китаплар окъумакъ.
• Диний сухбетлер япмакъ. Шу сухбетлерде иштирак этмек.
• Мубарек гедженинъ акъшам, ятсы ве сабах намазларыны джемаатнен ве джамилерде къылмагъа гъайрет косьтермек.
• Кечинген сойларымызнынъ, достларымызнынъ ве якъынларымызнынъ къабирлерини зиярет этип, дуа этмек.
• Аятта олгъан ана-бабаларымыз, сойларымыз, достларымыз ве дигер якъынларымызны мубарек гедженен хайырламакъ, дуалары алмакъ.
• Мубарек гедженинъ куньдюзинде, мумкюн олгъаны къадар, ораза тутмакъ. Реджеп айында ораза тутмакъ фазилетлидир. Пейгъамбер Эфендимиз (с.а.с.) Рамазан айындан сонъ энъ чокъ ораза туткъан айй – Реджеб айыдыр.
Юдже Аллах мубарек Учь айларнынъ биринджи джума геджеси Регъаиб къандилинде япаджагъымыз ибадет ве дуаларымызны къабул этсин. Юдже Мевлямыз эпимизге Аллаху Таалягъа ляйыкъ бир къул, Пейгъамбер Эфендимизге де ляйыкъ уммет эйлесин. Эки дюньяда да бахтлы этсин.
Ремзи Къуртдеде