15 яшыны толдургъан Яхъя Ибрагимов Къырымнынъ энъ яш хафызларындан биридир. О, дёрт йыл ичинде Мукъаддес Къуран-ы Керимнинъ эписини эзберледи. Яхъя якъында шерефли хафыз унваныны алды ве бизнен озь аят ёлунен пайлашты. Рубрикамызнынъ къараманы – Къырым Джумхуриети ве Севастополь шеэри мусульманлары диний идаресининъ Хаджы Ихсан адына Къалай ислямий илимлер медресесининъ хафызлар болюги талебеси Яхъя Ибрагимовдыр.
Хафыз – динимизде чокъ шерефли бир унвандыр. Насыл ве не вакъыт сиз озюнъизге Къуранны эзберлемек макъсадыны къойдынъыз?
Мен он эки яшында олгъанымда, озюме Къуранны эзберлемек макъсадыны къойдым. Ве бу ёлда манъа анам ве бабам ярдым эттилер, насиатлар бердилер. Олар эр вакъыт: «Огълум, эзберле, хафыз олмакъ – буюк бир дередже. Аллах санъа буюк къапылар ачар, иншаллах», – дей эдилер.
Насыл эзберлединъиз? Бир тертип олдымы?
Медресемизнинъ Къурман хафызлар болюгинде тюрк усулы чалыша ве мен де бу усулгъа коре эзберледим. Къуранда 30 джуз, яни 20 саифеден ибарет парча бар. Талебе биринджи джуздан башлап, эр джузнынъ сонъки саифесини эзберлей. 30 джузгъа кельген сонъ исе, текрар Къураннынъ башына къайта ве сонъ саифесинен бир эвелькисини де эзберлей. Ве Къуранны тамамлагъандже, бойледже девам эте.
«Къуранны эзберлемек
ичюн дёрт йыл керек олды»
Кьуранны эзберлемек ичюн не къадар вакъыт керек олды?
Манъа бутюн Къуранны эзберлемек ичюн дёрт йыл керек олды, айны заманда мен мектепте де окъудым. Асылында, медреседе окъугъан вакъытымны мен энъ яхшы йылларым деп саям. Чюнки медреседе окъугъан вакъытта биз достларнен берабер денъизге, кезинтилерге бара эдик. Футбол, теннис боюнджа спорт ярышларына къатнаша эдик. Диний ярышларда да иштирак эте эдик, ифтарларгъа бара эдик. Онынъ ичюн, бу вакъытны мен буюк хошнутлыкъ иле хатырлайым. Медресе меним экинджи аилем олды.
Шимди юксек хафыз унванына наиль олдынъыз. Невбеттеки адымлар насыл оладжакъ?
Келеджекте мен Ислям динини даа терен огренмек ичюн башкъа Ислям муэссиселеринде окъумагъа истейим. Мектепни битирип, мусульман мемлекетлерине бармагъа ве анда озь бильгилеримни пекитмеге ниетим бар. Анда дигер хафызларнен танышмакъ ве олар Къуранны насыл тертип боюнджа эзберлегенлерини бильмек ичюн авесленем. Оджалыкъ япмагъа ниетим бар. Башкъаларны огретмеге истейим, чюнки Пейгъамберимиз (с.а.с): «Энъ хайырлыларынъыз – Къуранны огренген ве огреткенлеринъиздир», – деп айтты.
«Агъамнынъ «Эр кес хафыз оламай»
сёзлери мени ильхамландырды»
Бу ёлда сизге ким ярдым этти ве ильхамландырды? Оджанъыз ким?
Мени агъам ильхамландырды. О, бу ёлгъа менден эвель турды ве манъа насиат берди. Бир кунь о манъа: «Эр кес хафыз оламай», – деп айтты. Бу сёзлер манъа бир сильтем киби олды. Чюнки бундан сонъ мен де хафыз олмагъа пек истедим. Не исе, белли вакъыт кечкен сонъ, мен макъсадыма еттим. Меним сонъки оджам Самединов Сулейман оджа олды. Онынъ оджалыгъы вакъытында мен Къуран-ы Керимни сонъунадже эзберлемеге етиштирдим.
«Хафыз олмакъ ниетим –
яшайыш тарзым олды»
Озюнъиз акъкъында тариф этинъиз.
Мен Багъчасарай районында яшайым. Орта тасиль мектепте окъуйым, 9 сыныфны битирдим. Буюк достане къорантада осьтим. Бабам дюльгер, анам эв бикеси. Къорантамызда балалыкътан динимизге севги ашлана, биз эпимиз медреседе окъудыкъ. Балалыкътан бабам мени Къуранны окъумагъа огрете, дин тёгереклерине алып бара эди. Сонъра мен озюм де меракъланмагъа башладым. Башта агъам Къурманда хафызлар медресесининъ талебеси олды. Ве мен балалыкътан о насыл Къурандан аетлерни эзберлегенини коре эдим. Мен де ондан орьнек алып, озюм де хафыз олмагъа истедим. Оськен сайын, анъладым ки, меним хафыз олмакъ ниетим – яшайыш тарзым олды. Медреседе окъумагъа башлагъанда, анда янъы достлар, оджаларнен таныш олдым. Ве Аллахнынъ истегинен Къуран-ы Керимни эзберлеп тамамладым.
«Сен не ерде ве не вакъыт булунгъанына
бакъмадан, эр ерде Къуран-ы Керимни
окъуй биледжексинъ»
Шимди насыл бир дуйгъуларны ис этесинъиз, теэссуратларынъызнен пайлашынъыз.
Мен озюмни ойле дуйдым ки, санки мен бу ве келеджек дюньяда буюк бир шейге ириштим. Бу ойле бир аджайып бир дуйгъу ки, сен не ерде ве не вакъыт булунгъанына бакъмадан, эр ерде Къуран-ы Керимни окъуй биледжексинъ. Озь макъсадыма иришкен сонъ бир енгиллик ис эттим, амма бунен берабер бу буюк бир месулиет олгъаныны анълайым.
Къуранны огренмеге башлагъан инсанларгъа насыл тевсиелеринъиз олур?
Ким Къуран-ы Керимни эзберлемеге истесе, бильсин ки, онъа базы шейлерден вазгечмек керек оладжакъ. Меселя, сабыр этмек ве гъайрет косьтермек керек. Сонъра, ким эзберлемеге башлагъан олса, бу ишни ташламасын ве даима чалышсын!
Эвелина АБЛЯЗОВА