Бугуньки къараманымыз Умер бин Хаттабнынъ (р.а.) азат эткени ханым хызметчиси Заидедир (р.а.). О, акъыллы ве чебер олмакънен бир сырада, ибадетинен де мешур эди. Пейгъамберимиз (с.а.с.) де онынъ бу хусусиетини бильгени ичюн, даима онъа дикъкъат айыра эди.
Бир кунь Пейгъамберимиз (с.а.с.) Хазрет-и Айшенен отургъанда, янына Заиде (р.а.) келе ве бойле айта:
«Селям алейкум, эй, Аллахнынъ Пейгъамбери! Бир кунь къорантам ичюн хамыр баскъанымда, тышарыгъа одун кетирмек ичюн чыкътым. Бир аньде, огюмде бети ай киби тёгерек, къокъусы хош, дюльбер урбалар кийген, беяз ат устюне минип отургъан бир кимсени корьдим. Манъа:
– Селям алейкум, эй, Заиде! – деп, хитаб этти.
– Алейкум селям! – дедим.
Менден сорады:
– Айткъанларымны меним адымдан айтып олурсынъмы?
– Эбет, иншааллах, – деп, джевап бердим.
О, девам этти:
– Мухаммедни (с.а.с.) корьсенъ, онъа айт ки, Хызырны корьдим. О, санъа селям ёллап, бойле деди: «Сенинъ пейгъамбер олып келювине ич бир пейгъамбер ичюн къуванмагъаным къадар къувандым! Чюнки Аллах санъа мерхамет этиледжек умметни ве къабул оладжакъ даветни береджек. Эм де дженнеттеки бир озен санъа аиттир».
Бу аджайип хаберни Пейгъамберимизге (с.а.с) кетирген бу ханым бизим ичюн орьнек олгъан бир шахсиеттир.
Аллах ондан разы олсун!
Зиннире
(радыяллаху анха)
Зиннире рум бир хызметчи эди. О, Ислямнынъ ильк йылларында буюк эзиетлер корьген мусульманлардан бири эди.
Саиби, Эбу Джехиль, оны къызгъан къумларнынъ устюне къойып къыйнагъан. Куньлернинъ биринде Эбу Джехиль дининден вазгечмеген бу ханымнынъ богъазыны сыкъып ольдюреджек эди. Зиннире шу хорлукънынъ нетиджесинде кёр къалгъан эди.
Эбу Джехиль, къуванып, аман:
– Коресинъизми, динимизни къабул этмегени ичюн танърыларымыз Лат ве Узза онъа не яптылар?! – деди.
Зиннире кулип:
– Сенинъ Лат ве Уззанъ бир ишке ярамай! Олар не файда, не зарар берип ола! Озьлерининъ козьлери корьмей, сен де мени олар кёр этти, деп айтасынъ! Бу – Раббимден бир имтиандыр. Онынъ эр шейге кучю ете! Меним козьлериме шифа береджек де Одыр! – деди.
Саба олгъанынен, Зиннире козьлерини ачты ве кене, эвелькиси киби, коре эди. Шашып къалгъан Эбу Джехиль:
– Бу олса-олса, Мухаммеднинъ ырым-этне япкъанынен олгъандыр, – деди.
Эбу Бекир (р.а.) бу джесюр ханым акъкъында эшиткенинен, аман оны сатын ала ве азат эте. Бундан сонъ, Зиннире (р.а.) Ислям динини раат-раат яшамагъа девам эте.
Аллах ондан разы олсун!
О вакъытларда олгъаны киби, Ислямгъа къаршы нефрет ве ярамай арекетлер аля даа девам эте биле. Эбу Джехиль киби адамлар о вакъыт бар эди, шимди де бар ве ахыр замангъа къадар оладжакълар. Амма, Ислям давети девам этмекте ве динимизнинъ нуру бутюн дюньягъа сачылмакъта. Чюнки динимизни таныгъан инсан, нетиджеде, онъа айретте ола. Белли языджы Лев Толстой айткъаны киби: «Эр акъыллы инсаннынъ сонъки дурагъы – Ислямдыр». ■