Бераат геджеси ве фазилети
حم وَالْكِتاَبِ الْمُبِينِ إنَّا أَنْزَلْنَاهُ فِي لَيْلَةٍ مُبَارَكَةٍ إِنَّا كُنَّا مُنْذِرِينَ فِيهَا يُفْرَقُ كُلُّ اَمْرٍ حَكِيمٍ اَمْرًا مِن عِنْدِنَا مُرْسِلِينَ رَحْمَةً مِنْ رَبِّكَ اِنَّهُ هُوَ السَّمِيعُ الْعَلِيمُ.
وَ قَالَ النَّبِيُّ (ص): إِنَّ اللهَ تَعَاليَ يَنْزِلُ لَيْلَةَ النِّصْفِ مِنْ شَعْبَانَ اِليَ سَمَاءِ الدُّنْيَا فَيَغْفِرُ لاِكْثَرَ مِنْ عَدَدِ شَعْرِ غَنَمِ كَلْبٍ.
Бисмилляхиррахманиррахим
{ Ха Мим вель китабиль мубин Инна энзельнаху фи лейлетин мубаракатин инна кунна мунзирин.Фиха юфракъу куллю эмрин хаким. Эмран мин ‘индина инна кунна мурсилин. Рахметен мин раббике иннеху хуве-с семи’уль ‘алим}
Ве къале-н Небиййю (с.а.в)
{Инналлахе Те’аля ензилю лейлетен-нисфи мин ша’бане иля сема-и дюнья феегъфиру лиэксера мин ‘адеди шэ’ри гъанеми кельбин}
Мухтерем муминлер!
Бильгенинъиз киби, учь айлар ичиндемиз ве Рамазан-ы шерифке кет-кете якъынлашамыз. Бутюн мусульманлар эеджан иле беклеген Рамазан айындан эвель, онъа азырлыкъ оларакъ, бир сыра мубарек геджелер бар. Регъаиб ве Мирадж геджелери Реджеп айында олып кечтилер. Шимди келеджек олгъан исе, Бераат геджесидир. Бераат геджеси Шабан айнынъ ортасындаки, яни он бешинджи геджедир. Шабаннынъ он беши майыснынъ 10-уна раст келе. Бераат геджеси де майыснынъ 10-у иле 11-и арасындаки геджедир.
Бераат – борчлардан, джезадан ве гунахлардан къуртулмакъ демектир. Бу къуртулыш геджеси Аллахнынъ китабында «мубарек» деп анъыла:
«Ха мим, (элялнен арамны ве хакъ иле батылны ачыкъча бильдирген) бу китапкъа емин олсун ки, шубесиз, Биз оны мубарек бир геджеде эндирдик. Керчектен Биз (бу Къуран иле кяфирлер огърайджакълары азап акъкъында) хабер берген кимсемиз. Къатымыздан бир эмир иле эр икметли ишке о геджеде укюм бериле. Чюнки Биз, Раббинъден бир рахмет оларакъ, пейгъамберлер йиберемиз. О, эшиткен ве бильгендир» («Духан» суреси, 44/1-6).
Бир къысым алимлеримиз бу мубарек гедже иле къаст этильген Къадир геджеси олгъаныны айткъан олсалар да, башкъа бир къысым алимлеримиз де бойле айталар: Бераат геджесинде Куран-ы Керимнинъ тамамы Левх-и Махфуздан дюнья семасына эндирильди, ондан сонъра исе, Къадир геджесинде, ает-ает Аз. Мухаммедке (с.а.в.) энмеге башлады.
Кене бу гедже бир сене ичинде оладжакъ адиселер, рызыкълар, эджеллер, хасталыкълар ве башкъа хусусларнен алякъалы къарарлар бериледжек ве вазифели мелеклерге яздырыладжакъ. Бу себепнен, мусульман бойле бир такъдир ве укюм геджесини гъафлетте кечирмемек керек. Кямиль бир мусульман аятынынъ эр дакъикъасында Аллахтан кельгенини ве Аллахкъа къайтып бараджагъыны унутмаз.
Шерефли муминлер!
Хадис-и шерифлерде де бу гедженинъ мусульманлар ичюн буюк бир рахмет ве магъфирет (багъышлав) геджеси олгъаны къайд этиле. Севимли Пейгъамберимиз бойле буюргъан: «Шабан айнынъ ярысы геджеси олдымы, оны ибадет ве итаат ичинде кечиринъ. Куньдюз де ораза тутынъ. Чюнки Аллах бу гедже кунешнинъ батышындан башлап, дюнья семасына рахметинен теджелли этип, бойле буюра:
– Ёкъмы менден афу тилеген, оны афу этейим.
– Ёкъмы рызыкъ истеген, онъа рызыкъ берейим.
– Ёкъмы бир хасталыкъкъа тутулгъан, онъа афиет берийим,
– Ёкъмы шуны истеген, ёкъмы буны истеген, – деп, сабагъа къадар девам эте».
Пейгъамберимиз бир башкъа хадисинде деген ки, «Аллаху Тааля Шабан айнынъ ярысы геджесинде къулларнынъ вазиетини козьден кечирип, мушрик ве киндар олгъанлардан гъайры, къулларынынъ бутюн гунахларыны афу эте».
Бир башкъа кереси де Пейгъамбер эфендимиз мусульманларгъа шу насиатны берген: «Бу гедже – Шабаннынъ он бешинджи геджесидир. Аллаху Тааля Бену Кельб къабилеси къойларынынъ тюйлери къадар кимсени джеэннемден азат эте. Анджакъ, бу геджеде, Онъа ширк къошкъанларнынъ, мусульманларгъа къаршы кин ве нефрет туткъанларнынъ, сой-сопнен алякъаны кескенлернинъ, яшайыш ве барлыкъларынен гъурурлангъанларнынъ, ана ве бабаларына исьян эткен, яни ана-бабаны саймагъан ве сёзюни динълемегенлернинъ бетине биле бакъмаз» (Тирмизий).
Азиз Муминлер!
Айса, бу мерхамет ве берекет толу геджеде темиз-пак гонъюльнен Раббимизге ёнелейик. Ондан ибадетлеримизни къабул этмесини ве гунахларымызны багъышламасыны истейик. Бир сене боюнджа япып кельген ишлеримизнинъ бир эсабыны япайыкъ ве, янълыш арекетлеримиз олса, тюзельтейик. Бу фазилетли геджеде чокъча намаз къылайыкъ, Къуран окъуйыкъ, дуа япайыкъ. Буюклеримизни зиярет этейик. Даргъын олгъанлар бар исе, барышайыкъ, барыштырайыкъ. Балаларымызгъа бу гедженинъ къыйметини анълатайыкъ. Эм озюмиз, эм де къоранталарымыз бу фырсатны къачырмасын. Аллахнынъ бу гедже устюмизге бол-бол ягъдыргъан мерхамет ве берекетинден мумкюн олгъаны къадар эпимиз файдаланайыкъ.
Келеджек Бераат геджеси бутюн мусульманлар ичюн къуртулыш весилеси олсун. Сизинъ ичюн де шимдиден хайырлы ве мубарек олмасыны тилейим.
Аллахым, бизге Шабан айыны мубарек эт ве бизни сагъ-селамет Рамазангъа къавуштыр!