Рамазан айына киргенде
شَهْرُ رَمَضَانَ الَّذِي اُنْزِلَ فِيهِ الْقُرْآنُ هُدًى لِلنَّاسِ وَ بَيِّنَاتٍ مِنَ الْهُدَى وَ الْفُرْقَانِ فَمَنْ شَهِدَ مِنْكُمُ الشَّهْرَ فَالْيَصُمْهُ …(إلىَ آخِرِالآيَةِ)
وَقَالَ النَّبِيُّ (ص): مَنْ لَمْ يَدَعْ قَوْلَ الزُّورِ وَالعَمَلَ بِهِ فَلَيْسَ لِلَّهِ حَاجَةٌ فِي اَنْ يَدَعَ طَعَامَهُ وَشَرَابَهُ
Бисмилляхир-рахманир-рахим
{ Шехру рамаданел-лези унзиле фихи-ль Къур’ан худен линнас ве беййинатин мине-ль худа ве-ль фуркъан. Фемен шехиде минкумуш-шехра фельесумх……}
Ве Къален-небиййю (с.а.в):
{Мен лем еда’ къавлез-зури вель ‘амеле бихи фелейсе лилляхи хаджетен фи эн еде’а та’амеху ве шерабеху }
Мухтерем муминлер!
Къуран-ы Керимде ве Пейгъамбер эфендимизнинъ хадислеринде макътанылгъан Рамазан-ы шериф кунь-куньден якъынлаша.
Рамазан айы – Къуран ве ораза айыдыр. Аллаху Таала Къуранда Рамазан акъкъында бойле буюра: «Рамазан айы ойле бир айдыр ки, Къуран-ы Керим онда эндирильди. (О, ойле бир Къуран ки), инсанларгъа хидаеттир (яни инсанларны догъру ёлнен алып кеткен бир китаптыр). О (Къуран), догъру ёлнынъ, догърунен янълышнынъ бир-биринден айырмакънынъ ап-ачыкъ делиллеридир. Айса, сизден Рамазан айына къавушкъан кимсе онда ораза тутсын. Ким о вакъытта хаста я да ёлджу олса, башкъа куньлерде (тутамагъан куньлери) ерине тутсын. Аллах сизинъ ичюн къолайлыкъ истей, къыйынлыкъ истемей…» («Бакъара» суреси, 2/185).
Эльбетте, Раббимиз бизни энъ гузель суретте яратты. Бизни козь, къулакъ, юрек ве даа бир чокъ мукеммель суретте чалышкъан ве хызмет эткен органларнен донатты. Ве, энъ эсасы, бизге акъыл ве ираде берип, къалгъан яратылгъанлардан устюн этти.
Бундан да гъайры, бизге ёл костериджи оларакъ Пейгъамберимизни ёллады ве Къуран-ы Керимни эндирди. Бутюн инсанларгъа, эм бу дюньяда, эм де олюмден сонъраки яшайышта бахтлы олмакънынъ ёлларыны огреткен Къуран, якъынлашмакъта олгъан Рамазан айында эндирильгендир.
Бу айгъа къавушкъан мусульман эркек ве къадынларгъа Раббимиз, «…сизден Рамазан айына къавушкъан, онда ораза тутсын», – деп, ораза тутмакъны эмир эте. Бир башкъа аетте де ««Эй, иман эткенлер! Ораза сизден эвель яшагъанларгъа фарз олгъаны киби, сизге де фарз этильди. Умют этиле ки, (Алланынъ эмирине къаршы кельмектен) сакъынырсынъыз», – деп буюра.
Къыйметли мусульманлар!
Ораза тек куньдюзлери ашамамакъ ве ичмемек демек дегильдир. Ораза бутюн ярамай ал ве арекетлерден узакълашмакъ демектир. Яни, ораза – мусульманларнынъ озь-озьлерини ве нефслерини тербие этмеси демектир. Рамазанда мусульман кимсе ялан, ошек, пахыллыкъ, бефтан айтмакъ киби ярамай табиатлардан ве башкъа гунахлардан къуртулмагъа, арынмагъа тырышмакъ керек.
Чюнки, Пейгъамберимиз айткъаны киби, дженнет къапулары ачыладжагъы, джеэннем къапулары исе, къапатыладжагъы ве шейтанларнынъ зынджырларнен байланаджагъы бу буюк ай, мусульманлар ичюн бир фырсаттыр. Акъыллы инсан исе, оны яраткъан, ниметлер берген ве ярын эсап бермек ичюн къайтып бараджагъы Раббисининъ ризасыны къазанмакъ фырсатыны къачырмаз.
Бакъынъыз, Пейгъамберимиз бизге керчек оразанынъ не олгъаныны насыл огреткен: «Ким, ярамай сёзлерни, ярамай ишлерни ташламаса, о адамнынъ тек ашамакъны ве ичмекни ташламасына Аллахнынъ ихтияджы ёкътыр». Бир башкъа хадисте исе, Пейгъамберимиз бизге бойле насиат эткен: «Ораза бир къалкъандыр (яни, бизни ярамайлыкълардан ве гунахлардан къорчалагъан бир «щит» кибидир); сакъын, оразалы олгъанынъызда, джаиллик этип де, къаба-саба лаф этменъиз. Эгер бир кимсе сизге къашанаджакъ олса, я да сизнен талашмагъа (къавгъа этмеге) истесе, «мен оразалым, мен ораза тутам», – деп айтынъыз» (Бухари, Муслим); «Ораза туткъан ойле инсанлар бар ки, янларында тек чектиклери ачлыкъ ве сувсызлыкълары къала» (Ибн Мадже).
Ойле экен, биз оразаны бу шекильде тутмагъа шимдиден ниетленийик. Рамазан, ораза ве теравих акъкъында окъуйыкъ, огренейик. Рамазаннынъ берекетини, оразанынъ файдаларыны къорантамызгъа анълатайыкъ ве оларгъа дженнет ёлуны костерейик.
Аллах эпимизни, бутюн муслюманларны сагъ-селамет Рамазангъа къавуштырсын. Керчек манасынен ораза туткъан къулларындан эйлесин. Рахмет ве берекетини бизден эксик этмесин. Аминь!