ШЕХИДЛИК
بِسْمِ اللهِ الرَّحْمنِ الرَّحِيمِ
وَلَا تَحْسَبَنَّ الَّذِينَ قُتِلُوا فِي سَبِيلِ اللّٰهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ
Бисмилляхир-рахманир-рахим.
Вэ ля тэхсэбэннэл-лэзинэ къутилю фи сэбилилляхи эмвата, бэль ахяун ындэ раббихим юрзекъун.
Сайгъылы джемаат!
Аллах ёлунда джан берген кимсеге динимизде Шехид деп айтыла. Бунынъ ольчюси, Аллах ризасы ичюн Динни юджельтмек ве яйылмасы ичюн гъайрет этмектир. Башкъа макъсатлар ташыгъан кимселер исе, бу юдже мертебеге асла улашамазлар. Бир кунь Пейгъамберимизге (с.а.в.) кельген сахабелер онъа:
«Эй, Аллахнынъ Ресули! Базы адамлар гъанимет ичюн, базылары шурет ичюн, базылары да рия ве косьтерюв ичюн дженк этелер. Дженк эткен кимселернинъ къайсы бири Аллах ёлундадыр? Пейгъамберимиз (с.а.в.) оларгъа бойле джевап берди: Ким Аллахнынъ сёзюни юджельтмек ичюн дженк этсе, тек о Аллах ёлундадыр.» (Муслим)
Бу мукъаддес дереджеге, рия, пара, костериш ве менфаатнен дегиль, тек Аллах ризасынен улашмагъа мумкюн. Ким темиз юрекнен Аллах ёлунда гъайрет косьтерсе, озь ятагъында вефат этсе биле шехид олур. Муим олгъан, ниети ве япкъан иши догъру ве гузель олсун. Пейгъамберимиз (с.а.в.), бир хадисинде шойле буюрду:
«Шехидликни Аллахтан бутюн юректен тилеген кимсе, ятагъында ольсе биле, Аллах онынъ адыны шехидлер арасына язар» (Муслим) Башкъа бир хадисте де бойле буюрула:
«Шехидликни юректен талап эткен кимсе, шехид олмаса да, севабына наиль олур» (Муслим).
Инсан, Аллахнынъ шехидке береджек мукяфатны бильсе, шехид олмагъа истемеген ич бир адам къалмаз эди. Бунынъ тарих ичинде бир чокъ мисальлери бар. Пейгъамберимиз (а.с.), бир хадисинде бойле буюра:
«Нефсим къудрет элинде олгъан Аллаха емин этем ки, Аллах ёлунда ольдюрильмемни, сонъ тирилип, кене ольдюрильмемни не къадар чокъ истейим» (Бухарий).
Сайгъылы диндашларым!
Бойле мукъаддес ве юдже, акъ ве акъикъат огъуруна олмагъан, инсаннынъ нефсаний арзулары ве башкъа истеклери ёнелишинде бир олюм, бош ерде олюм олур! Энъ ярамайы башкъа инсанларнынъ ольмесине себеп олур. Бойлеликнен шехид олма ерине къатиль олур, озюне, къорантасына, якъынларына, миллетине зарар кетирир. Бунынъ ичюн динимиз шубели шийлерден узакъ турып фитнеден узакъ турмамызны эмир буюра.
Юдже Раббимиз: “фитне инсан ольдюр-мектен бетердир”, дей.
Пейгъамбер Эфендимизде (с.а.в.) хадис-леринде, къыяметке якъын чыкъаджакъ фитнелер акъкъында бахс эткенде, бизим бу фитнеледен узакъ турмамызны, керек олса къылычлар ташкъа урып къырмамызны эмир эте.
Азиз къардашларым!
Ватанымыз Къырым, топракъларымыз къыйметли, миллетимиз азиздир. Бу топракълар тарих ичинде эм бу ватан ичюн, эм бутюн дюнья ичюн бир чокъ алим, къады, абид ве шехид берди. Эписининъ бир макъсады бар эди, Аллах ризасы ичюн бу ватан, бу миллет, бу уммет ичюн файдалы олмакъ. Иште бу къараманларымыздан бири Нуман Челеби Джихандыр. Къырым мусульманларнынъ уянувы ичюн гъайрет эткен, диний ве миллий къыйметлеримизни юджельткен, Къырымда яшагъан бутюн инсанларгъа эмиет костерди. Къырым, Украина, Литва, Польша ве Беяз Русьянынъ сайлангъан муфтиси олды.
Большевиклерден къоркъып Къырымдан къачмады, миллетинен берабер ватан Къырымда къалды ве бу юдже ёлда шехид олду. Йигирми учь февраль бинъ докъуз юзь он секизинджи сенесинде, гедже саат экиде аписке кирген залим анархистлер, ольдюрмек ичюн беш адам сечтилер, Нуман Челеби Джихан да оларнынъ арасында эди. Залимлер, о инсанларны къыйнап, вахший шекильде ольдирип, парчаладылар ве сонъунда да, парчаларыны къара денизге аттылар. Бу къадар зорлукъкъа рагъмен, бу къутсал ёлдан айырылмадылар. Пейгъам-беримиз (с.а.в.) бир хадис-и шерифинде шойле буюрду:
«Дженнетке кирген ич бир мусульман, дюньяда олгъан эр шей онъа берильсе биле, дюньягъа кене къайтмагъа истемез. Тек шехид истиснадыр! Онъа костерильген урьмет ве берильген икрамлар себебинден кене дюньягъа къайтып, даа он кере шехид олмагъа истер» (Бухарий, Муслим).
Хутбемни хутбе башындаки аетнинъ меалинен битирмеге истейим;
«Аллах ёлунда ольдюрильгенлерни сакъын олю сайманъыз, аксине, олар тирилер; Аллах озь лютюф ве джумертлиги себебинден оларгъа берген ниметлери саесинде олар Яратыджынынъ рызыкъларына наиль олалар» («Ал-и Имран» суреси, 169 ает).
Раббим бизни ана ватанымыздан, диний ве миллий къыйметлеримизден, тилимизден, намус ве шерефимизден айырма. Эп берабер бу ватангъа бу миллетке хизмет этмеге ве озь ана юртумызны гузеллештирип огге алып бармагъа насиб эйле. Амин!