Ürmetli cemaat!
Künümizde, nesilniñ, ümmetniñ ve milletimizniñ inkişafına zarar ketirip, yoq olmasına alıp barğan, şeytannıñ insanlarğa süslep yaymağa çalışqan bala aldırmaq günahı yayıldı.
Bu haram areket insanlar arasında sanki normal bir şey kibi qarşılanıp başlandı. Meger ki, asırlar içinde Peyğamberimizniñ (a.s.) varisleri olğan İslâm alimlerimiz bu meseleni tekrar-tekrar elge alıp, şu işniñ yañlış ve yasaq olğanını bildirgenler ve şu delillerni ortağa qoyğanlar:
A) Qıyametke qadar doğacaq bütün adamlar Allah qatında qaydlıdır. Eger Allah bir kimseniñ doğmasını istese, mutlaqa meniniñ (spermanıñ) kerekli yerge barıp, faydalı olmasını teminler. Eger doğmasını istemese, menini faydasız eter ve bala peyda olmaz. Ebu Said El-Hudriy tarafından böyle haber etildi: «Peyğamberge (a.s.) azilniñ (cınsiy munasebet sırasında bala olmaması içün menini tışarığa tökmekniñ) ükümi soraldı, o, böyle ayttı: «Er meniden bala olmaz. Allah bir şey yaratmaq istegen vaqtında Onı azil kibi şeyler toqtatmaz» (Buhariy, Ahmed bin Hanbel). Bu hadisten meni faydalı olıp, bala peyda olğanından bu işte Allahnıñ razılığı olğanı añlaşıla. Onıñ rizasına qarşı kelmek ise, günahtır.
B) Peyğamberimiz (a.s.) ümmetine evlenip çoqlaşmasını emir etken. Bala olacaq yımırtanı yoq etmek de bu emirge qarşı kelmek, ümmetniñ çoqlaşmasına mani olmaqtır.
V) Din zaruretlerinden biri – nesilni qorçalamaqtır. Bu er bir musulman içün farzdır, nesilge zarar ketirmek ise, haramdır.
G) Kene de din zaruretlerinden, farzlarından biri – cannı qorçalamaqtır. Doğmağan balanı öldürmek yaşaycaq bir cannı yoq etmektir. Yüce Rabbimiz böyle buyura: «Aqsız yerde Allah (öldürilmesi, zarar berilmesi) haram etken kimseni öldürmeñiz» («Enam» suresi, 151).
D) Peyğamber Efendimiz (a.s.) ihramda olğan kimse içün kiyik ayvanlarnıñ yımırtalarını sındırmaqnı yasaq etken ve bu işni yapqan kimselerge ceza belgilegen. Yımırta sındırmaqtaki yasaq yımırtanıñ o ayvannıñ parçası olmasındandır ve içinden çipçe çıqa bilecegindendir. Bir ayvan yımırtanıñ sındırılması yasaq ise, bu iş içün ceza bar ise, insan balasınıñ yoq etilmesi nasıl elâl olsun, ceza ketirmesin?!
YE) Balanı baqmaq ve yetiştirmek içün rızıq tapalmamaq qorqusınen onı yoq etmek Yüce Allah tarafından Quran-ı Kerimde yasaqlana: «Fuqarelik qorqusınen balalarıñıznı öldürmeñiz, siziñ ve olarnıñ rızqını Biz beremiz» («Enam» suresi, 151).
J) Daa doğmağan balanı tüşürmek anasıñ sağlığına zarar ketire. Yüce dinimiz ise, öz-özümizni zararğa atmamıznı yasaqlay: «Özüñizni öz elleriñiznen tehlükege atmañız» («Baqara» suresi, 195). Bala aldırmaq günahınıñ dinimizge köre em dünyada, em ahirette cezası bar. Ahiretteki cezasını Allah özü berecektir. Dünyadaki ceza ise, hanefiy mezhebine köre, 50 dinardır, yani tahminen 200 gr altındır. Bu cezanı balanı aldırtqan ya da balanıñ tüşmesine sebep olğan kimse bala mirasından aqqı olğan kimsege mıtlaqa ödemesi kerek. Rabbim bizlerni bu çirkin işten qorçalap, ümmetimizniñ ve milletimizniñ qıyamette çoq olmasını nasip etsiñ!