СУННЕТНИ ЯШАТМАКЪ
بِسْمِ اللّٰهِ الرَّحْمٰنِ الرَّحِيمِ
قُلْ إِنْ كُنْتُمْ تُحِبُّونَ اللّٰهَ فَاتَّبِعُونِي يُحْبِبْكُمُ اللّٰهُ وَيَغْفِرْ لَكُمْ ذُنُوبَكُمْ وَاللّٰهُ غَفُورٌ رَحِيمٌ
Бисмилляхи’р-рахмани’р-рахим. Къуль ин кунтум тухиббунеллахе феттебиуни юхбибкумуллаху ве егъфир лекум зунубекум. Валлаху гъафуру’р-рахим.
Азиз джемаат!
Аллахнынъ динини керекли киби яшатмакъ ве аякъта тутмакъ ичюн, эвеля, Севимли Пейгъамберимизнинъ (а.с.) суннетини яшатмакъ керек. Чюнки бу диннинъ джанлы мисали ве юдже Къураннынъ тефсирджиси алемлерге рахмет оларакъ кельген Пейгъамберимиз Мухаммед Мустафадыр (а.с.). Юдже Аллахнынъ адамлардан не истегенини энъ яхшы анълагъан ве Къуранны баштан сонъуна къадар яшагъан да одыр. Бунынъ ичюн бир ерде Пейгъамберимизнинъ (а.с.) суннети керекли киби яшанмай олса, Аллахнынъ дини де керекли киби яшанмай демектир. Аллахнынъ дини яшанмагъан ерге исе, Аллахнынъ ярдымы ве севгиси де кельмез. Чюнки Аллах севгисине алып баргъан ёл Пейгъамбернинъ (а.с.) ёлундан кечмекте. Юдже Мевлямыз Къуран-ы Керимде буны бизлерге бойле бильдире:
«Айт, (эй, Мухаммед): «Эгер Аллахнъы керчектен севген олсанъыз, манъа таби олунъыз, Аллах да сизни севсин ве гунахларынъызны багъышласын. Чюнки Аллах багъышлайыджы ве мерхамет этиджидир» («Ал-и Имран» суреси, 31).
Урьметли джемаат!
Бойлеликнен, эгер керчектен Аллахны севген олсакъ, юреклеримизнинъ темиз олмасы етерли дегиль. Чюнки аетте хабер берильгени киби, Юдже Аллахкъа нисбетен севгининъ исбаты тек Пейгъамберимизнинъ (а.с.) ёлундан кетмекнен мумкюндир. Гунахлар-ымызнынъ багъышланмасы да тек бу ёлнен мумкюндир. Айса, Пейгъам-беримизнинъ суннетини огренип яша-макъ эпимиз ичюн аш, сув ве ава киби кереклидир. Пейгъамбер Эфендимиз (а.с.) бир хадис-и шерифинде бойле буюргъан эди:
«Ким меним суннетимни джанлы тутса, мени севген демектир. Мени севген исе, дженнетте меннен берабердир» (Тирмизий).
Дженнетте Пейгъамбернен берабер олмагъа истеген эр кес бу ает ве хадислерни къулакъларына купе этип, даима оларны акъылларында тутмалары ве, эвеля, бу ишни озь къоранталарында башламалары керек. Чюнки аятымызда аткъан эр адымымыз Севимли Пейгъамберимизнинъ (а.с.) бир суннетинен багълыдыр. Юкъламагъа насыл ятсакъ ве насыл юкъласакъ, уянгъанымызда, не япсакъ ве айтсакъ яхшы олур? Ашагъанымызда, насыл ашасакъ ве нелер айтсакъ файдалы олур? Къомшуларнен, чешит адамларнен мунасебетимиз насыл олмалы? Ана ве бабамызгъа нисбетен насыл олмакъ керекмиз деген суаллерге ве бир чокъ башкъа шейлерге джевапларны бизлерге Пейгъамберимизнинъ (с.а.в.) суннети бере. Юдже Мевлямиз бизни бу мубарек ёлдан айырмасынъ! Амин!