УСТЮНЛИК ТАКЪВАДАДЫР
بِسْمِ اللّٰهِ الرَّحْمٰنِ الرَّحِيمِ
إِنَّ أَكْرَمَكُمْ عِنْدَ اللّٰهِ أَتْقَاكُمْ
Бисмилляхи’р-рахмани’р-рахим. Инне экрамекум индаллахи эткъакум.
Мухтерем муминлер!
Дженаб-ы Аллах адамны энъ гузель ве мухтешем шекильде яратты ве эр бир инсангъа айры хусусиетлер берди. Эр бири айры ренк, тиль, гузеллик, ичтимаий ве икътисадий фаркъ-лылыкъларгъа саип. Бу фаркълылыкълар динимизде асла устюнлик себеби олмаз. Асла бир адам мал-мулькю ве вазифеси себебинден дигерлерден буюк олмаз. Буюклик анджакъ такъванен, яни Аллахтан къоркъмакъ ве Онъа бойсун-макънен ольчюлир. Къуранда буюрыл-гъаны киби: «Аллах янында энъ хайырлынъыз – энъ такъвалынъыз-дыр» (Худжурат, 13).
Севимли Пейгъамберимиз (а.с.) Веда хутбесинде бизлерге бойле буюргъан эди:
«Эй, инсанлар! Раббинъиз бирдир, атанъыз да бирдир. Эпинъиз Адемденсиниз, Адем исе, топракътан яратылды. Аллах янында энъ хайырлы олгъанынъыз Аллахтан энъ чокъ къоркъкъанынъыздыр. Арапнынъ арап олмагъандан, арап олмагъаннынъ да араптан ич бир устюнлиги ёкътыр. Устюнлик анджакъ такъвададыр…»
Дегерли мусульмалар!
Такъва – Аллахкъа къаршы кельмектен, гунахтан, адамгъа тиль ве къолнен зарар кетирмектен узакъ турмакъ демектир. Юдже Аллах «Ал-и Имран» суресининъ 102-нджи ает-и керимесинде бойле насиат эте:
«Эй, иман эткен кимселер! Аллахтан керекли киби къоркъунъыз ве анджакъ мусульман оларакъ, джан беринъиз».
Аллахтан къоркъкъан кимсеге динимизде «муттакъий» деп айтыла, булар Къуран-ы Керимнинъ бир чокъ аетинде макътала. Аллаху Тааля оларнынъ сыфатларыны, къыскъаджа, бойле сыралай: муттакъий кимселер якъынларына бакъалар, етимлерге ве ёлда къалгъан кимселерге ярдым этелер, дюнья малына козь тикмейлер ве зекятларыны вакътында берелер, намазларыны дос-догъру эда этелер ве биревнен анълашма япкъанлары вакъыт, о анълашманы бозмайлар. Беля ве мусибет анларында сабыр костерелер. Ачувлангъан вакъытларында, ачувлары-ны юталар ве багъышлайыджы олалар. Арамгъа бакъмайып, козлерини ерге тюшюрелер ве гунахтан сонъ, аман тёвбе этип, хайырлы ве саваплы ишлер япмагъа аджеле этелер.
Мухтерем джемаат!
Такъва олмагъан ерде не дюнья, не де ахирет бахтлылыгъы бар. Чюнки такъва саиби олгъан кимсе даима Аллахнен берабер олгъаныны ве О, даима ярдымджы оладжагъыны биле. Севимли Пейгъамберимиз (а.с.) бир хадис-и шерифте бойле буюргъан эди:
«Юдже Аллах сизинъ корюниши-нъизге ве малынъызгъы бакъмай. О, сизинъ такъванъызгъа ве япкъан ишлеринъизге бакъа» (Муслим).