Aqmeçit (Çernomorskoye) rayonınıñ Sadır Bağay (Hmelevo) köyünde cami qurucılığı başlandı. Rayonnıñ baş imamı Löman Abduramanovnıñ sözlerine köre, köyniñ sakinleri bu vaqianı çoqtan beklep keldi.
“Bu bayram künlerinde Sadır Bağay köyünde yaşağan musulmanlarnıñ arzuları kerçekleşe, olar çoq beklenilgen caminiñ qurucılığını başladılar. Biz birlikte caminiñ temelini qoydıq ve birinci namaznı da birlikte qılacaqmız, inşallah”, – dedi Löman efendi.
Bölgeniñ baş imamı Qırım Cumhuriyeti ve Sevastopol şeeri musulmanları diniy idaresine (Tavriya Müftiyatına) destegi ve vesiqalarnıñ resmiyleştirilüvinde köstergen yardımı içün teşekkür bildirdi.
Buña ilâve olaraq, Löman Abduramanov lâqayd qalmağan vatandaşlarğa muracaat etip, cami qurucılığına yardım etmege çağırdı.
Qırım MDİ matbuat hızmeti