Акъмесджитте улу тюрк мааррифчи Исмаил Гаспринскийнинъ догъгъанына 174 йыл толгъаны мунасебетинен тедбир кечирильди, ишбу тедбир черчивесинде буюк нашир ве «Терджиман» газетасынынъ баш муаррири абидесининъ янына гульдестелер къоюлды.
Къырым Джумхуриети ве Севастополь шеэри Муфтисининъ муавини Раим Гъафаров селямлав сёзлеринен чыкъышта булунып, артындан дуа окъуды. О, къайд этти ки, буюк ичтимаий ве сиясий эрбап олгъан Исмаил Гаспринскийнинъ ады даима халкъымызнынъ хатырасында къаладжакъ, чюнки онынъ бутюн аяты тилимизни, медениетимизни ве эдебиятымызны сакълавгъа багъышланды.
Мерасимде Девлет Шурасынынъ векиллери, Къырым Джумхуриети назирликлерининъ ве идарелерининъ темсильджилери, КъДж Миллетлерара мунасебетлер боюнджа девлет комитетининъ ве эркянындаки тешкилятларнынъ рехберлери, Февзи Якъубов адына Къырым муэндислик педагогика университетининъ, медениет тешкилятларынынъ, Акъмесджит шеэри мемуриетининъ векиллери иле джемаат эрбаплары иштирак эттилер.
Къырым МДИ матбуат хызмети