Qırım Cumhuriyeti ve Sevastopol şeeri musulmanları diniy idaresinde “Ana tilim – ğururım” bütünqırım yarışınıñ ğalipleri taqdirlendi. Yarış halqara ana tili kününe bağışlanğan edi.
Qırım Müftisi hacı Emirali Ablayev adından toplanğanlarnı Müfti muavini, QMDİ “Elâl” sertifikatsiyası bölüginiñ rehberi Remzi Qurtdede selâmladı.
“Men sizni hacı Emirali Ablayevniñ adından selâmlayım ve yarışta ğalebe qazanğanıñıznen hayırlayım! Biz epimiz Vatanımızda yaşaymız ve tuvğan tilimizde laf etmek, onı ögrenmek – bizim içün büyük bahttır. Yaş nesilniñ bunı añlağanı bizni pek quvandıra. Böyle vatanperverlik yarışlarnı keçirip, biz ümüt etemiz ki, ileride siz İsmail Gasprinskiy, Noman Çelebicihan, Bekir Çoban-zade ve diger büyüklerimiz kibi ulu yazıcı, şair ve maarifçiler olursıñız. Allah ocalarıñızğa küç ve sabır bersin, yapacaq işleriñizde muvafaqiyetler tileymiz”, – dedi Remzi Qurtdede.
Halqara ana tili kününe bağışlanğan yarışqa 150-den ziyade iş keldi. Bu sene jüri azaları ğalebe qazana bilecek bir sıra işlerni saylap aldı, olarnıñ sayısı 20-den ziyade oldı. Er bir iştirakçi şiirniñ ana tilinde icra etilmesine mesülietnen davrandı – belli bir milliy obraznı ve fon muzıkasını sayladı. Onıñ içün, QMDİ tedbirlerni teşkil etüv bölüginiñ rehberi Zenife Ablayeva bildirgeni kibi, jüri tek üç ğalipnen sıñırlanmamaq qararına keldi.
“Bizim, Qırım Cumhuriyeti ve Sevastopol şeeri musulmanları diniy idaresi olaraq, esas vazifemiz – milletimizniñ diniy maarifidir, amma, buña ilâve olaraq, biz tuvğan tilimizniñ inkişafına da büyük emiyet bererek, ana tilimizni yaşatmaq içün vatanperverlik yarışlarını da keçiremiz. Böyle yarışlarnı er yıl ötkeremiz. Bu sene pek çoq iş bizge yollanılğanı içün ğayet quvandıq. Siz, talebeler, – bizim ğururımız ve parlaq kelecegimizge ümütimizsiñiz”, – dedi Zenife Ablayeva.
Tedbir ğalipler ve ocalarnıñ qıymetli bahşışlar ile taqdirlenmesinen yekünendi.
Qırım Müftisi hacı Emirali Ablayev yarışnıñ sponsorları – iş adamları Murasova Elzara Selimovnağa, İbragimov Akim Ayderoviçke (“Aynur” TM), Baqiyev Arsen Akimoviçke, Muhamedov İkram Alizaroviçke, Ümerov Asan Ebazeroviçke (“Et evi” opt et bazası), Muzaffarov Zeynur Aliyeviçke, Memetov Ruslan Osmanoviçke, Haybullayev Ayder İsayeviçke (“Alem” et tükânlar ağı), Ana Yurttaki “TEHNOSKLAD” tükânına, “Bal Market” erzaq tükânına ayrı teşekkürlerini bildirdi.
Qırım MDİ matbuat hızmeti