Martnıñ 1-inde Aqmescit rayonınıñ Ana Yurt qasabasında İslâm temelleri kursunıñ talebelerine tantanalı şekilde Quranlar taqdim etildi. Talebeler oquvğa keçken yılnıñ Ramazan ayında başlağan ediler.
Tedbir Ana Yurt qasabasınıñ camisinde olıp keçti. Yerli din cemiyetiniñ reisi Sadi Akimov talebelerge selâmlav sözlerinen muracaat etti. O, diniy bilgilerni almaqnıñ müimligine urğu yaptı. Din ocası Safiye Qurtdede tarif etkenine köre, körüşüv esnasında talebeler Qurandan sureler oqup, ögrengen bilgilerini numayış ettiler.
Merasimde Aqmescit rayonı Colman köyünden olğan din ocası Meryem Mujdabayeva bulundı, o, talebelerge tecvid qaidelerini añlattı.
Tedbirniñ soñunda Safiye Qurtdede kursnıñ er bir mezunına ediye olaraq birer muqaddes Quran nushasını taqdim etti.
Qırım MDİ matbuat hızmeti