Qırım Cumhuriyeti ve Sevastopol şeeri musulmanları diniy idaresi Qırım Cumhuriyeti Aqmeçit (Çernomorskoye) rayonınıñ Aqmeçit (Çernomorskoye) köy şurasınıñ memuriyeti ile işbirlikte tantanalı şekilde “Qırımtatarlarnıñ 1944 sene, mayıs 18 künü Qırımdan sürgün etilüviniñ hatırasına” abidesini açtılar.
Qırım Cumhuriyeti ve Sevastopol şeeri Müftisi adından Müfti muavini Remzi Qurtdede çıqışta bulundı. O, qayd etti ki, abideniñ açıluvı – qırımtatar halqı, bütün qırımlılar ve bu dehşetli facianı er vaqıt hatırlaycaq yaş nesil içün ğayet müimdir.
Tedbirniñ soñunda dua oquldı.
Merasimde memuriyet azaları, din ve cemaat erbapları iştirak ettiler.
Abideniñ qoyuluvına Qırım musulmanları diniy idaresi, Aqmeçit rayonınıñ memuriyeti ve Aqmeçit rayonınıñ baş imamı Löman Abduramanov teşebbüsçi oldılar. Abide etrafındaki saa Aqmeçit köy şurası ve yerli sakinlerniñ maddiy destegi ile abadanlaştırıldı.
Qırım MDİ matbuat hızmeti