Aqmescitte Mahsus arbiy operatsiya (MAO) iştirakçileriniñ anaları ve qadınlarınıñ “Bereginâ” adındaki I bölgelerara kongressi olıp keçti. Tedbirde Qırım, Aqyar, Lugansk halq cumhuriyeti (LHC), Donetsk halq cumhuriyeti (DHC), Herson ve Zaporojye vilâyetlerinden 250 ziyade qadın iştirak etti.
Şerefli musafirler olaraq kongresste Qırım Cumhuriyetiniñ başlığı Sergey Aksönov, Qırım Cumhuriyeti Devlet Şurasınıñ başlığı Vladimir Konstantinov, Aqmescit ve Qırım Mitropoliti Tihon iştirak ettiler.
Qırım Cumhuriyeti ve Sevastopol şeeri Müftisi adından iştirakçilerni idaremizniñ diniy tedbirlerni teşkil etüv bölüginiñ rehberi Zenife Ablayeva selâmladı. O, tedbir teşkilâtçıları ile iştirakçilerine teşekkürler bildirdi ve Qırım Müftiliginiñ cebhedeki askerlerni desteklemek ve zaferni yaqınlaştırmaq içün yapqan leyhaları aqqında tarif etti. Bundan da ğayrı, o, “Bir temel olaraq iman: ahlâqiy qıymetler, qoranta bağları ve cemiyetniñ stabilligi” panel muzakeresinde iştirak etti.
“Bizde cennet analarnıñ ayaqları astında olğanını bildirgen hadis bar. Askerlerimizniñ anaları ve apayları ögünde ürmet ile egilem. Siz şerefli cenkâverlerni, aqiqiy vatanperverlerni yetiştirdiñiz. Bugün olar cebhede balalarımıznıñ kelecegini qorçalaylar. Bizim vazifemiz ise, işançlı arqaları olmaq ve MAO iştirakçileriniñ qorantalarını desteklemek, olarğa yardım etmektir”, – qayd etti Zenife Ablayeva.
MAO iştirakçileriniñ anaları ve apaylarınıñ birinci bölgelerara kongressini Analar kününe rast ketirdiler. Şu kongress arbiylerniñ qorantaları arasında muzakereler qurmaq ve tecribenen paylaşmaq içün birinci meydan oldı. Tedbir arbiylerge ameliy ve göñülliler arqalı yardımnı köstermek maqsadınen teşkil olundı.
Qırım MDİ matbuat hızmeti