Qırım Müftisiniñ muavini Ayder İsmailov ve Müftilikniñ tış alâqalar ve hacılıqnıñ teşkil etilüvi bölüginiñ rehberi Artur Reşitov Moskva şeerinde olıp keçken ve 2023 senesi hacılıqnıñ teşkil etilüvi meselesinde keçirilgen Hac boyunca şuranıñ muşaveresinde iştirak ettiler. Oturuş Rusiye Federatsiyasında hacılıq işleri boyunca vekâletli olğan İlyas Umahanov rehberliginde, müftiler, musulman diniy idareleriniñ rehberleri, Rusiye hacılıq operatorlarınıñ iştiraki ile keçirildi.
Muşavere esnasında 2023 senesi hacılıqnı teşkil etüvniñ esas parametrleri, müftilikler arasında umum Rusiye içün ayırılğan kvotanıñ bölünüvi, hacılıq operatorlarınıñ tasdiq etilüvi kibi meseleler muzakere etildi. Bundan da ğayrı, hacılarnıñ Saudiye Arabistanı Memleketinde bulunuv şaraitiniñ eyileştirilüvi, sanktsion siyaset sebebinden peyda olğan qıyınlıqlarnıñ çezilüv yolları meselelerine baqıldı.
Muşaverede daa bir kere hatırlatıldı ki, 2023 senesi hacılıq mevsiminde Rusiye içün 25 000 yer ayırıldı. Qayd etildi ki, Rusiye hacılıq kvotası evelden belgilengen yekâne ülkedir. Bundan da ğayrı, bu sene ilki kere Rusiyege Saudiye Arabistanda bulunğan hacılarğa hızmet etecek şirketni saylamaq aqqı birildi. Böyle şirketke muassas deyler. Muşavere iştirakçileri bildirgenine köre, bu hacılar içün servisniñ eyileştirilmesine yol açacaq.
Hacılar Saudiye Arabistanına 2023 senesiniñ mayıs 21 –iyün 22 künleri kirecek ve 2023 senesiniñ iyül 2 – avgust 2 arasında qaytacaqlar. 2023 senesi hacılıqnı teşkil etmek içün 7 hacılıq operatorı belgilendi.
“Kvotalar bölünmedi, hacılıq missiyasınıñ rehberligi evelki tertipni deñiştirip, kvotalarnı Muqaddes topraqlarğa barmaq istegenleriniñ sayısına köre diniy idareler arasında paylaştırmaq qararını aldı. Bu sebepten Qırım musulmanları diniy idaresi hacılıqqa barmağa istegenlerge muracaat etip, arizalarını tezce yazmaq kerek olğanlarını bildire. Arizalar tahminen martnıñ 17-sine qadar qabul etilecek”, – dep, qayd etti Ayder İsmailov.
Bu sene Rusiye müftilikleri içün kvotalar hacılıqqa barmağa istegenlerniñ sayısına köre belgilenmesi planlaştırıla.
Qırım MDİ matbuat hızmeti