Qırım Cumhuriyeti ve Sevastopol şeeri Müftisiniñ muavini Raim Ğafarov natsizm qurbanları olğan qırımçaqlar ve çufutlarnıñ hatıra kününe bağışlanğan matem tedbirinde iştirak etti. Tedbir Aqmescit-Kefe yolunıñ 10 kilometrinde olıp keçti.
Qayd etmeli ki, dekabrniñ 11 – Qırım tarihında eñ facialı künlerden biridir. Bu künü 1941 senesi Kefe yolunıñ 10 kilometrinde biñlernen sivil vatandaş idam etildi – çufutlar, qırımçaqlar, çingeneler, diger milletlerniñ vekilleri. Genotsid Qırımnıñ sovet orduları tarafından azat etilmesine qadar devam etti.
Hatıra kününi keçirmek biñlerce insannı canavarca qatl etken faşist basqıncıları ve olarnıñ yardımcılarınıñ dehşetli cinayetlerini unutmamağa çağırğan sabit bir adetke çevirildi. Bu çağrı Rusiyeniñ zemaneviy ve kelecek nesillerine, ve, umumen, bütün insaniyetke o qara künlerni unutmamaq ve böyle facialarnıñ tekrarlanmaması içün qolumızdan kelgenini yapmaq içün davettir!
Qırım MDİ matbuat hızmeti