Rusiye Federatsiya Şurasınıñ resmiy eyyeti Cidde şeerinde Saudiye Arabistanınıñ Hac ve ümre meseleleri boyunca naziri Tevfiq bin Fevzan Er-Rabia ile körüşüv keçirdi. Rusiye eyyetiniñ terkibinde RF Akimiyeti yanındaki Diniy birleşmeler meseleleri boyunca komissiyanıñ hacılıq işleri boyunca vekâletlisi Umahanov İlyas Muhammad-Salamoviç, Rusiye hacılıq missiyasınıñ rehberi Asuyev Hizbullah Aslanbekoviç, RF Federal Keñeşi Federatsiya Şurasınıñ halqara munasebetler idaresi başlığınıñ muavini Bıkov Aleksey İgoreviç bulundılar.
Körüşüvde 2023 senesi hacılıqnıñ teşkil etilüvinen bağlı meseleler muzakere etildi. Körüşüvniñ soñunda Saudiye Arabistanı Memleketi ve Rusiye Federatsiyası arasında 2023 senesi Rusiye musulmanları içün hacnıñ teşkil etilüvi boyunca añlaşma imzalandı. Saudiye akimiyeti Rusiye musulmanları içün 25 000 kişilik kvota ayırılğanını tasdiq etti. Qırım musulmanları içün de kvota evelki raqamğa qaytarıldı ve 600 kişilik oldı.
Yanvar 9-12 künleri Rusiye eyyeti Saudiye Arabistanı Memleketiniñ Hacılıq ve ümre meseleleri boyunca nazirligi tarafından teşkil etilgen konferentsiyada iştirak etmekte. İşbu konferentsiyada nevbetteki hacılıq ve ümre mevsiminde hacılarnıñ transferi, yerleşüv ve qaluv şaraitiniñ eyileştirilüvi meseleleri muzakere etile. Konferentsiyanıñ birinci künlerinden belli oldı ki, Saudiye Arabistanı Memleketi Hacılıq ve ümre meseleleri boyunca nazirligi evelleri pandemiya sebebinden kirsetkeni hacılıqqa baracaqlarnıñ yaş sıñırlavını lâğu etti.
2023 senesi hacılıq mevsiminen alâqalı tafsilâtlar ve tarihlar daa soñra belli etilecek.
Hacılıqqa barmağa istegenler ilâve malümat içün nevbetteki telefonlar boyunca muracaat ete bileler:
+7 925 715 84 85
+7 978 09 08 202
8 800 551 31 30
Hatırlatamız, Qırım musulmanları diniy idaresiniñ resmiy hacılıq agenti “AVN TUR” şirketidir.
QMDİ matbuat hızmeti