Haberler
Balalar alemi «Bismillâh»tan başlana!
Опубликовано:
Qırımda «Bismillâh» adlı bala şiirleri kitabı dünya yüzüni kördi. Müellif – Qırımda faaliyet köstergen din ocası, kiçik balalar ile çalışqan, kendisini yazıcı sıfatında da sınap baqqan Emine Asanovadır. Kitap Qırım ve Sevastopol şeeri müsulmanları Diniy İdaresiniñ destegi ile derc etildi. Kitap saifelerinde kiçik oquyıcılar, etraftaki dünyanıñ tılsımlığını ve güzelligini keşf etken eki qaraman ile tanış ola. Müellifniñ bildirgenine köre, dörtsatırlı misralarda ahlâqiy qıymetliklerniñ ve ruhiy zenginlikniñ ğayesi ifade etile. Emine Asanova: «Künümizde oqumağan ve yazmağan insannı tapmaq zor. Amma balağa ahlâqiy printsiplerni ve hayatı devamında lâzim olğan bilgi aşlamaq daa ziyade emiyetlidir. Ecadtlarımız bizge ikmetli ve teren manalı urf-adetlerni ve diniy ananelerni emanet ettiler. Bizim vazifesmiz ise - olarnı ğayrıdan canlandırıp, yaş nesilge miras olaraq qaldırmaqtır», dep ayttı. Cıltı qattı, şekili keyfiyetli olğan işbu kitap 10 saifeden ibaret olıp, müellifniñ resimleri ile bezetilgen. "Bismillâh" bala kitabını Aqmescitteki Sevastopolskaya, 44 adresi boyunca yerleşken «TERCİMAN» kitap Evinde satın almaq mümkün. QMDİ matbuat merkezi
Üç aylar başlana
Опубликовано:
Martnıñ 18-de müsulmanlar içün 3 muqaddes ay - Receb, Şaaban, Ramazan ayları - başlanmaqta. Bu vaqıtnı müsulmanlar oraza tutmaq, tövbe - istiğfar ketirmek, namaz qılmaq, Quran oqumaq kibi ibadetler ile, eyilik, hayırseverlik yapmaq kibi ve diger sevap işleri ile toldurmaq ğayret eteler. Receb ayı – tövbe ve ibadet etüv, Şaaban – sevgi ve hızmet etüv, Ramazan ise - yaqınlaşuv ve bereket aylarıdır. Bu üç aynıñ birincisi – Receb ayıdır. Yüce Rabbiniñ qullarına olğan Rahmeti ve Lütfüdir. Receb – islâmiy taqvimge köre 7-ci aydır. 2018 s. Receb ayınıñ başlanuvı martnıñ 18-ne doğru kele. Bu ay aqqında Allah Resuliniñ (s.a.v.) hadislerinde: "Receb ayı – Rabbimizniñ ayıdır. Şerefi ve büyükligi ceetinden oña iç bir (diger) ay musaviy kelmez…». Receb ayınıñ ilk cuma gecesi – Reğaib gecesi adını taşıy. Bu yıl Reğaib gecesi martnıñ 22-ni - 23-ne bağlağan gecege teñ olıp kele. Bu gece dualar bol-bol qabul etile. Bu geceniñ daa bir añlamı – Peyğamberimizniñ (s.a.v.) Abdullah ve Amina ana-babasınıñ nikâhlanğan gecsidir. Bu mukaddes geceni ibadette, namazlar qılaraq, zikr etmek ve Quran-ı Kerimni oqumaq ile keçirmek kerektir. Fuqare ve yoqsullarğa yardım etmek, balalarnı sevindirmek, olarğa ediyeler bermek, ana-baba, soy-sop ile qonuşaraq vaqıt keçirmek de tevsiye etile. QMDİ matbuat merkezi
Quran oqumaqnı ögrenmek iç bir vaqıt keç degil (FOTO)
Опубликовано:
Aqmescitteki Qırım müsulmanları Diniy İdaresi yanında faaliyet köstergen "Faydalı ilim" oquv-maarif Merkezinde, Quran-ı Kerimni oqumaqnı ögrengenlerge tantanalı sürette Muqaddes Kitapnı ediye ettiler. Bir qaç ay devamında qadınlar arap tiliniñ elifbesini ve Quran oqumaqnıñ esas qaidelerini ögrendiler. Soñki sefer olıp keçken taqdim dersinde İslâm dini ocaları ve diger, parallel bölüklerniñ talebeleri bulunıp, ögrenciler tarafından kösterilgen bilgilerniñ şaatı oldı. Derslerge qatnağan eñ üyken talebe – 76 yaşındadır. O, bir hata qaçırmayıp, Quran oquvında yüksek seviyesini numayış etti. QMDİ matbuat merkezi [gallery link="file" columns="4" size="medium" ids="12940,12948,12946,12944,12942"]
Qırımda hafız yarışı keçirilecek
Опубликовано:
Qırım ve Sevastopol şeeri müsulmanları Diniy İdaresi Quran oquma BütünQırım yarışını ilân ete. Yarışta, erkekler ve 45 yaşından büyük olğan qadınlar iştirak ete bile. Saylav basamaqları Qırımnıñ çeşit taraflarında keçirilecek. Neticede, Qurannı eñ eyi seviyede oquğanlar seçilecek. Yarışnıñ finalı Aqmescitte Kebir camide Ramazan ayınıñ 27 künü ötkerilecek. Finalğa çıqqanlar qıymetli ediyeler ile taqdirenilecek. Ğalipni ise - acılıqqa bedava barmaq imkânı bekley. Yarış idarecisi – QMDİ-ñ tış alâqa ve acılıq işlerini teşkil etüv Bölüginiñ müdiri Artur Reşitovnıñ qayd etkenine köre, esas maqsat – müsulmanlarnı Muqaddes Kitapnı oqumaq teşviq etmektir. A.Reşitov: "Biz üyken nesilni mahsus seçtik. Bu insanlar Sovet Birligi devirinde doğıp östi, din ve Quran oqumaqnı ögrenmek imkânları yoq edi. Bugünki künde camilerimiz açıq, İslâm dini esaslarını ve Quran-ı Kerimni oqumaqnı ögretken dersler teşkil etildi. Arzularnı kerçekleştirmek, yarış ğalibi olmaq ve acılıqqa barmaq fırsat açıla", dep qayd etti. Yarışta iştirak etmek istegenler yaşağan yerlerindeki imamğa muracaat ete bile. QMDİ matbuat merkezi
Qırımda rayon imamlarınıñ toplaşuvı olıp keçti (FOTO)
Опубликовано:
Qırım ve Sevastopol müsulmanları Diniy idaresinde Qırım Müftisi ve rayon imamlarınıñ er aylıq körüşüvi olıp keçti. İmamlar keçken ay devamında yapılğan işlerniñ esabatını berdi ve öglerinde turğan meselelerni muzakere ettiler. Hususan, Yaltadaki caminiñ (Ay-Vasil) topraq meselesidir. Bundan da ğayrı, imamlar yaş qırımtatarlarğa menfiy tesir etken ve milletimizni bölgen diniy teşkilâtlarnıñ faalleşkeni sebebinden raatsızlığını bildirdiler. Körüşüv çerçivesinde din erbaplarına yerli köy ve camilerniñ kütüphanelerini Qırım müsulmanları Diniy idaresi çıqarğan kitaplarınen toldurmağa tevsiye etildi. Qırım Müftisi hacı Emirali Ablayev öz nevbetinde imamlarğa qırımtatar milliy Şurası işini başlağanını ve Qırım Cumhuriyeti başlığınıñ yanında konsultativ Şura meydanğa ketirilgeni aqqında bildirdi. İmamlarnıñ iş toplaşuvında Rusiye Devlet Dumasınıñ deputatı Ruslan Balbek iştirak etti. O, Müftige qırımtatar halqı Şurasını toplağanı içün teşekkürler bildirdi. Bundan da ğayrı, din erbaplarına camiler yanında qurulğan ve qurulacaq sport meydançıqları aqqında tarif etti. Toplaşuv çerçivesinde imamlar topraq meselesi boyunca uquqiy konsultatsiyanı aldılar. [gallery link="file" columns="4" size="medium" ids="12805,12803,12801,12799,12797,12795,12793,12791,12789,12787,12785,12783,12781,12779"]
Qırım Müftiligi yanında uquqiy konsultatsiya açıldı
Опубликовано:
Qırım ve Sevastopol şeeri müsulmanları Diniy idaresi yanında "Yurt" adlı uquqiy konsultatsiya açıldı. Merkez, sürgün etilgen insanlarnıñ vetandaşlıq vesiqalarınıñ resmiyleştirilüvi, migratsion ve qayd etilüv vesiqalarnıñ resmiyleştirilüvi ve diger meselelerni çezecek. "Yurt" konsultativ-uquqiy merkezi Aqmescit şeeri, Çehov, 20 adresi boyunca yerleşe. Qabul etüv künleri: bazarertesi, salı, cumaaqşamı 9.00-13.00, 14.00-16.00 Malümat içün telefon: +7(978)041-45-78 e-mail: YurtCentre@gmail.com
“Altın nesil” dostlarını toplay (FOTO)
Опубликовано:
"Altın nesil" balalar klubı er aylıq toplaşuvını keçirdi. Tedbir Qırım ve Sevastopol şeeri müsulmanları Diniy idaresiniñ "Faydalı ilim" maarif leyhası çerçivesinde olıp keçti. Toplaşuvda keçken ay devamında yapılğan işlerniñ neticeleri çıqarıldı. İştirakçiler kelecek ay devamında yapacaq işlerni muzakere ettiler. Körüşüvde ocalar balalar ile birlikte "İslâmda merhametlik" mevzusını muzakere ettiler. Bundan da ğayrı, evelden ilân etilgen, ayvanlarğa nisbeten merhametlik fotoyarışınıñ neticeleri çıqarıldı. Ğalebe Sureya Bairova ve Ayşe Velilâyeva qazandılar. Balalar klub reberlerinden onlayn yarışlarda faal iştirak etkenleri içün, bahşiş aldılar. Tedbirniñ soñunda balalar birlikte üyle yemegini ve tatlı sofra azırladılar. Umumen, körüşüvde 20 bala iştirak etti. Hatırlatamız, "Altın nesil" bala musulman internet-klubı genç musulmanlar içün faaliyet köstermekte. Onıñ esas maqsadı 10-16 yaşındaki gençler içün alternativ musulman qonuşuv meydanını qurmaqtır. Malümat içün telefon +79788639566. QMDİ MDT matbuat hızmeti [gallery link="file" columns="4" size="medium" ids="12769,12767,12765,12763,12761,12759,12757"]
Qırımtatar halqınıñ Şurası ilk nevbette eda etilecek vazifelerni seslendirdi (FOTO)
Опубликовано:
Müftiy muavini Ayder İsmailov, qırımtatarlar Şurasınıñ azaları olğan Lemara Selendili ve Ayder Emirov ile, "Qırımtatar halqınıñ Şurası: vazifeleri ve yapılacaq işleri" matbuat konferentsiyasında iştirak etti. Çıqışınıñ başında Ayder İsmailov, Qırım ve Sevastopol şeeri müsulmanları Diniy İdaresi tarafından, işbu Şuranı meydanğa ketirmek teşebbüsi aqqında tavsilâtlıca ikâye etti. Ayder İsmailov: "İnsanlar, olarğa qıyın zamanda qol uzatqan, destek köstergen birilerini qıdıra. O sebepten biz, qırımtatar halqınıñ aqsaqalları, ziyalıları ile keçirilgen uzun muzakerelerden soñra, bu adımnı atmaq qararına keldik. Çeşit saalardaki professional mütehassıslar halqnıñ arz-ümütlerini diñlep, devlet organlarını haberdar etecekler, meselelerni çezmek maqsadınen muayyen bir çıqış yolu, tevsiyelerni bildirecekler", dep qayd etti. Müftiy muavininiñ sözlerine binaen, Qırım Cümhuriyetiniñ başlığı Sergey Aksönovnıñ tarafından tasdiqlanğan, qırımtatarlarnıñ Konsultativ Şurası, sürgün etilgen halqlarnıñ reabilitatsiyası aqqıdaki Qanunnıñ amelde al etilecegi ile meşğul olacaq. O: "Qırım başlığı yanındaki Konsultativ Şuranıñ erkânına kirgen mütehassıslarnıñ er biri, kendisi mesül saasında, mevcut olğan qanunlarnıñ, Qırımdaki yaşayış tarzına, şaraitine uyğun bir şekilde ömürge keçirmek içün tevsiyeler berecek ve lâzim olğan programmalarnı işlep çıqaracaqlar", dep ilâve etti. Bundan da ğayrı, Şuranıñ faaliyeti, grajdanlarnıñ akimiyet organları ile eki taraflı munasebetlerini qolaylaştıracağı ayrıca qayd etildi. "İnsanlardan kelgen sualler belgilenecek. Dört yıl devamında biz çoqtan-çoq meseleler ile qarşılaştıq – olardan bazılarını al etip oldıq, bazıları üstünde ise çalışmamız devam etmekte. Yaqında, cemaat qabulhanesini açmaq fikrine keldik. O, şimdilik daa test rejiminde çalışa. İnsanlar muracaat eteler. Olarğa bedava şekilde – bu sualnen qayda ve kimge barmaq kerekligi aqqında malümat berile. Bunıñ ile biz bir temel qoyamız. Bizge muracaat etilgen meselelerniñ arhivini tizemiz", dep ilâve ayttı Ayder İsmailov. Matbuat konferentsiyası devamında, Şuranıñ iş gruppası, Qırımnıñ okkupatsiyası devamında natsistler tarafından yaqılğan Qırım köyleri içün tazminat almaq maqsadınen adım-adım al etilecek iş ve vazifeler belgilegeni aydınlatıldı. Ayder İsmailov: "Biz, belli bir yol kösterecek işni başladıq. Evel, işbirlik ve tedqiqatlar keçirgen adliyecilerni davet ettik. Bundan ğayrı, bu meselede dört bölük teşkil etecegimizge qarar berdik: tarihçılardan ve sotsiologdardan ibaret olğan arhiv bölügi, ekonomist ve adliyeciler bölükleri çalışacaq", dep bildirdi. – "O zamandaki arhivlerden bütün malümatnı toplamaq kerek. Tarihçılar ve sotsiologlar ise tarihiy malümatlarnı qaplap alğan umumiy vesiqanı azırlaycaq. Onıñ esasında ekonomistler maddiy, maneviy ve atta medeniy zararnıñ kölemini bildirecek. Çünki bu yıllar devamında camiler ve medereseler, kilseler ğayıp etildi. Biz yalıñız qırımtatar köylerinden bahs etmeymiz de… Soñra ise adliyeciler, elinde olğan işbu malümat ve raqamlar ile çeşit profil komitetler ve Rusiye Federatsiyasınıñ nazirlikleri ile bağ tutacaqlar, muzakereler keçirecekler ve, neticede, tazminat soralacaq tarafqa muacaat etecekler"… Cian cenki yıllarında Qırımnıñ natsistler okkupatsiyası neticesinde yüz bergen zarar içün Almaniyadan tazminatnı soramaq qararı, 2018 s fevralniñ 17-de keçirilgen Nevbetten tış Qırım müsulmanlarınıñ Qurultayında alındı. Matbuat konferentsiyası devamında qırımtatarlarnıñ Şurası erkânındaki gumanitar bölükniñ işi aqqında da söz yürütildi. QFU-ñ qırımtatar filologiyası kafedrasınıñ professorı, filologiya ilimleri doktorı Lemara Selendiliniñ ikâye etkeni kibi: "Biz şimdi, keçken 30 yıl devamında bu saada çezilmegen ve al etilmegen meselelerni közden keçirip, ilerideki 10 yılğa bir plan qurmalımız. Neticede, halqımıznıñ, Rusiye cemaatçılığı sırasında lâyıq bir yer almaq yardım olur. Biz, Rusiye ealisiniñ büyük qısmı türkler teşkil etkenini bilemiz. Müsulmanlar – ağa-qardaşlarımızdır, añlaşılğan tilimizde laf etken insanlardır. Bizim esas maqsadımız – coyulmaq degil de, ögge adım atmaq ve qırımtatarlarnıñ problemlerini Rusiye Federatsiyasınıñ grajdanları ve halq olaraq, al etmektir". Professornıñ qayd etkenine köre, eñ müim vazife – tuvğan qırımtatar tiliniñ adetlerini saqlap qalmaqtan ve funktsiyalarını ğayrıdan tiklemekten ibarettir. Bu iş - yaş nesilniñ omuzlarına tüşe. Lemara Selendili: "Al-azırda vazifemiz - bizim istidatlı yaşlarımıznı emigratsiyadan qorumaq ve olar içün inkişaf etmek imkânını tapmaqtır. Yaşlarımızğa iş yerlerini tapmaq meselesinde yardım etmek pek müimdir. Elbette, til ve tasil aqqında söz yürüterek, yaşlar ile bağlı olğan siyasetni ve alıp barılgan yöñelişni de közde tutmalımız. Qırımda doğğan ve kendisini millet mensüpligi ile tanıtqan yaş nesilge ümütimiz büyüktir…", dep qayd etti . Öz nevbetinde, Ayder Emirov, Şuranıñ akimiyet ile birlikte olğan işbirlik neticesinde, ayrı diqqatnı nege ayırmaq ve nasıl adımlar atmaq kerekligi aqqında bildirdi: "…Bu cümleden, Qırımtatar sanatı müzeyiniñ binası problemini al etmektir. Hadimler, aqılğa sığmağan şaraitte çalışmaqta. İ.Gasprinskiy adına kütüphaneniñ binasını da keñişletmek, çünki fond sayısı ep arta ve şimdiki binağa sığmay. Ana tili probleması ile bağlı eñ müim sayılğan ve halqnı ayaqta tutqan - edebiyatnıñ inkişafı - yoq derecededir. Şimdi biz buña ciddiy baqmalımız. Adımlardan biri – qabiliyetli yaşlarımıznı, Moskva şeerindeki Edebiyat institutınına kvota boyunca yollamaqtır. İleride ciddiy icat etken yazıcılarnı elde etermiz". Matbuat konferentsiyası devamında spikerler, qırımtatarlarnıñ Cumhuriyetniñ cemaat-siyasiy ömürinde iştirak etüvine dair suallerge de cevap berdiler. 14 insandan ibaret olğan Qırımtatar halqınıñ Şurası, Aqmescitte 2018 s. fevralniñ 17-de keçirilgen Nevbetten tış Qırım müsulmanlarınıñ Qurultayında meydanğa ketirildi. Şura azaları açıq rey berüv neticesinde saylanıldı. Olarnıñ arasında - Qırım Müftisi Emirali Ablayev, KMPU-ñ Prezidenti Fevzi Yaqubov, Olimpiya çempionı Rustem Kazakov, İnkerman (Aqyar ş.) hastahanesiniñ baş ekimi Gayde Degirmenci, filolog ve publitsist Ayder Emirov ve digerlerdir. QMDİ MDT matbuat merkezi [gallery link="file" columns="4" size="medium" ids="12737,12739,12735,12733,12741"]
Qırımda Noman Çelebicihannı añalar (FOTO)
Опубликовано:
Fevral 19 künü Bağçasaraydaki Medeniyet evinde Noman Çelebicihanğa bağışlanğan hatıra aqşamı olıp keçti. "Unutmamız seni, Noman!" adlı hatıra aqşamı "Ebediyet" ansamblniñ reberi tarafından teşkil etildi. Tedbirde "Avdet", "İlham", "Han-Saray", "Bağçasaray" ansambllerniñ reberleri de iştirak etti. Aqşamğa memuriyet vekilleri, yerli sakinler, mektep ocaları ve talebeleri qoşuldı. Tedbir devamında milliy yır ve nağameler çalındı, Noman Çelebicihan ve Amdi Giraybaynıñ şiirleri oquldı. QMDİ MDT matbuat hızmeti [gallery link="file" columns="4" size="medium" ids="12269,12271,12261,12267,12265,12263"]
Qırım Müftiliginde “Güzel Qırım” yarışınıñ ğaliplerini taqdirlediler (FOTO)
Опубликовано:
Qırım Müftiliginde "Güzel Qırım" bala resimi yarışınıñ neticeleri çıqarıldı. Yarış QMDİ "Hidayet" gazetası ve "Büllür" Qırım müsulman qadınları Birleşmesi tarafından keçirilgen edi. Yarışta Qırımnıñ farqlı köşelerinden 30 bala iştirak etti, jüri azaları 60 ziyade resimni qabul etti. Jüri terkibine Qırım ve Özbekistanda nam qazanğan ressam Halil Memedlâyev, ressam Lenur Velilâyev ve ressam, dizayner Ervin Seytasanov kirdi. Ğalebeni 10 yaşındaki Safiye Musayeva qazandı. "Seyircilerniñ alğışı" nominatsiyasında birincilikni 8 yaşındaki Elmaz Sarakayeva aldı. Tedbir iştirakçileri qıymetli bahşişlar ile taqdirlendi, yarışnıñ ğalibi ise professional seviyesindeki molbert elde etti. Jüri azaları iştirakçilerniñ işlerine yüksek qıymet kestiler. Jüri reisi Halil Memedlâyev ana-babalarğa faal olğanları içün teşekkürler bildirip, aynı olar sağlam intellektual nesilniñ temelini qoyğanını qayd etti. Onıñ içün ana-babalar balalarnıñ inkişafı içün elinden kelgenini yapmalı. Jüri azaları birlikte iştirakçiler içün tasviriy sanat boyunca ögretüv dersini keçirdiler. Derste 20 ziyade bala iştirak etti. "Hidayet" gazetasınıñ baş muarriri Zemine Acimambetovanıñ sözlerine köre, bu kibi dersler er ay ötkerilecek. Derslerni ressam Halil Memedlâyev keçirecek. Tasviriy sanat gruppasına 6 yaşından 14 yaşına qadar balalar yazıla bileler. Tedbirniñ soñunda balaçıqlarnı "Güzel Qırım" yarışınıñ timsalini aks etken tort bekledi. Tasviriy sanat gruppasına nevbetteki telefon boyunca yazılmaq mümkün: +79787085724. QMDİ MDT hızmeti [gallery link="file" columns="4" size="medium" ids="12214,12216,12212,12210,12208,12206,12204,12202,12200"]
Qazan şeerinde qırımtatar milliy urbaları taqdim etildi (FOTO)
Опубликовано:
Tatarstan müsulmanları Diniy idaresinde (Qazan ş.) qırımtatar qadın milliy urbasınıñ taqdimi olıp keçti. Seminarda Qırım müsulmanları Diniy idaresi ve "Büllür" Qırım müsulman qadınları Birleşmesiniñ vekilleri Tatarstan MDİ ile birlikte iştirak ettiler. Milliy urbalarnıñ müimligi, onıñ İslâm dini ile bağı, qadın urbalarınıñ, onı kiygen insanğa olğan tesiri aqqında İslâm dini ocası Zeyneb Bairova tarif etti. Qırımtatar qadın urbalarınıñ hususiyetleri aqqında Qırım Müftiliginiñ temsilcisi Zenife Veli ikâye etti. O, fesniñ yavluqnen kiyilmesi usullarını kösterdi. Bundan da ğayrı, tedbirde Qırım ustaları yapqan farqlı fesler taqdim etildi. Tedbirde milliy urbalar ve eski quşaqlar numayış etildi. Tatarstan Cümhuriyeti adından tedbirde dizayner Nuriya Hanum çıqışta bulundı. O ise, qazan tatarlarınıñ milliy baş kiyimi kollektsiyasını taqdim etti. Bu qırımtatar milliy urbalarına bağışlanğan birinci seminar-taqdim olıp keçti. Nevbetteki kösterüv 2018 senesi yazda olıp keçecek. QMDİ MDT hızmeti [gallery link="file" columns="4" size="medium" ids="12186,12188,12184,12182,12180,12178"]
Qırım musulmanları Qurultayınıñ qararı ile qırımtatar halqınıñ Şurası meydanğa ketirildi (cedvel)
Опубликовано:
Fevral 17 künü keçirilgen Nevbetten tış Qırım müsulmanlarınıñ Qurultayında qırımtatar halq Şurasınıñ meydanğa ketirilmesi aqqında qarar alındı. Açıq rey berüv vastası ile Şura terkibi qabul etildi. Teşkilâtqa 15 insan kirdi, olarnıñ arasında farqlı saalarda faaliyet köstergen mütehassıslar: din erbapları, sport, medeniyet, sanat, tibbiyet saasınıñ vekilleri kirdi. Qırımtatar halq Şurasınıñ Nizamnamesini Qırım müsulmanları Diniy idaresiniñ Şurası qabul etecek. Şurağa qırımtatar halqınıñ nevbetteki vekilleri kirdi: Haci Emirali Ablayev- (1962 s.) Qırım Müftisi. Yakubov Fevzi Yakuboviç (1937 s.) Qırım müendislik-pedagogika universitetiniñ esasçısı, al-azırda ise universitetniñ Prezidenti, tehnika ilimleriniñ doktorı. Ukraina qaramanı. Rusiye Federatsiyasınıñ ilim ve tehnika saasınıñ itibarlı hadimi. Kazakov Rustem Abdullayeviç (1947 s.) Küreş milliy sport çeşiti boyunca Qırım Federatsiyasınıñ Prezidenti. Qırım Cumhuriyetinde ONF regional ştabınıñ reisdeşi. Olimpiya çempionı, defalarca dünya ve Avropa çempionı. Sovetler Birliginde nam qazanğan idmancı. "İtibar işareti" ordeniniñ saibi. Bilâlov Eskender (1952 s.) RF Prezidenti erkânında milletlerara munasebetler Şurasınıñ azası, "İnkişaf" qırımtatar cemaat teşkilâtınıñ reisi. İsmailov Ayder Suleymanoviç (1977 s.) Qırım Müftisiniñ muavini. İslâm aqqı magistri. Yakubov Cengiz Fevziyeviç (1972 s.) Qırım müendislik-pedagogika universitetiniñ rektorı, tehnika ilimleri namzeti, doktor-müendis (Almaniya). İslamov Mehti Mustafayeviç (1969 s.) "Dülber" quyumcılıq Eviniñ esasçısı ve bediiy reberi. KC esnaf palatasınıñ vitse-prezidenti. Karl Faberje Ordeniniñ Tekmil Kavaleri. QC nam qazanğan ressam. Halqara seviyede nam qazanğan quyumcı. Bairov Ruslan Talâtoviç (1980 s.) Qırım Müftisiniñ muavini. Mütehassıs ilâhiyatçı. Acimambetov Ayder Ametoviç (1985 s.) Qırım musulmanları Müftisiniñ mesül kâtibi. Mütehassıs siyasetşınas. Selendili Lemara Sergeyevna (1970 s.) Filologiya ilimleri doktorı, V.İ. Vernadskiy adına Qırım Federal Tavriya akademiyasınıñ qırımtatar ve şarq filologiyası fakultetiniñ qırımtatar filologiyası kafedrasınıñ professorı, Rusiye ilimleri akademiyasınıñ Bütünrusiye türkşınaslar komitetiniñ azası. Nalbantova Elmira Edemovna (1967 s.) Qırım devlet filarmoniyasınıñ "Haytarma" qırımtatar yır ve oyun ansambliniñ bediy reberi. Qırım Cumhuriyeti ve Ukrainada nam qazanğan artist. Emiraciyev Enver Ablâmitoviç (1958 s.) "İndustriya razvitiya" qurucılıq şirketiniñ baş müdiri. Qırım Cumhuriyetinde Cuma caminiñ inşaatındaki Añlaşma esasında qurucılardan biri. Degirmenci Gayde Sinaverovna (1967 s.) Sevastopol ş. İnkerman qasabasınıñ №6 hastahaneniñ baş ekimi, İnkerman münitsipal qurumınıñ deputatı. Eminova Safiye Lümanovna — Qırımtatar medeniy-tarihiy miras müzeyniñ direktorı. Emirov Ayder Reşatoviç — tilşınas, publitsist. Gasprinskiy adına cumhuriyet kitaphanesinin birinci müdiri. “Golos Krıma” ve “Poluostrov” gazetalarnın tesisçisi. QMDİ MDT hızmeti