Haberler
İslâm temelleri ve Quran oquvı kursunıñ tantanalı tamamlanması
Опубликовано:
Aqmescit rayonı Terek Eli köyüniñ camisinde İslâm temelleri ve Quran oquvı kurslarını tamamlağan qadınlarğa Quran nushaları taqdim etildi. Kurs boyunca dersler on ay devamında, aftada bir kere olaraq, keçirildi. Oca Seyyare Memetova talebelerge muqaddes kitabımız aqqında Peyğamberimizniñ (s.a.s.) hadislerini añlattı. "Qurannı doğru oqumaqtan ğayrı, onıñ teren manalarını añlamaq, etrafında tüşünmek ve ükümlerini ömürge keçirmek kerek. Bu pek müimdir", – dedi QMDİ din ocası Safiye Qurtdede. Kursnı yekünlegen qadın-qızlarğa Qırım musulmanları diniy idaresinden Quranlar, diniy kitaplar ve namaz içün anterler ediye etildi. Yerli din cemiyeti ise, ziyafet azırladı. Qırım MDİ matbuat hızmeti
Qırım iş adamları "Elâl" sertifikatlarını devam ettire
Опубликовано:
Qırım Cumhuriyeti ve Sevastopol şeeri musulmanları diniy idaresinde eki iş adamı "Elâl" sertifikatınıñ devam ettirilüvi aqqında vesiqalarnı aldı. Sertifikat "Azbuka Krıma" ("Qırım elifbası), "Milaya derevnâ" ("Şaylı köy"), "Cankoyskoye moloko" ("Canköy sütü", "Canskoyskiy sır" ("Canköy qaşqavalı") ticariy markalarını temsil etken "Novator" mesülieti sıñırlı cemiyetke taqdim etildi. "Şafran" qavehanesini idare etken iş adamı Seydametov Riza İbragimoviçke birilgen sertifikat ise, daa bir yılğa devam ettirildi. İhtar: Elâllıq sertifikatını almağa istegen iş adamları QMDİ "Elâl" sertifikatsiya merkeziniñ başlığı Remzi Qurtdedege nevbetteki telefon boyunca muracaat ete bileler: +79780741847, ya da el.adres: halal@qmdi.ru Qırım MDİ matbuat hızmeti
Qırımda büyük şair Rasul Gamzatovnıñ hatırası añıldı
Опубликовано:
Qırım Cumhuriyeti ve Sevastopol şeeri musulmanları idaresiniñ diniy tedbirlerni teşkil etüv bölüginiñ rehberi, Qırım Cumhuriyeti Başlığınıñ mesleatçısı Zenife Ablayeva, şair, nesirci ve publitsist Rasul Gamzatovnıñ 100 yıllığına bağışlanğan merasimde iştirak etti. Tantanalı tedbir Fevzi Yaqubov adına Qırım müedislik pedagogika universitetinde olıp keçti. "Vatanını, tuvğan tilini içten sevgen insan, özüni bütün dünyağa tanıttı. Rasul Gamzatov bütün yaşlar içün, ve, hususan, bütün talebelerimiz içün vatanperver olmaqnıñ, vatanınıñ şanını dünyada yükseltmekniñ güzel örnegidir. Bu tedbirde bulunğan qardaş cumhuriyetlerimizniñ vekillerine, böyle istidatlı ve ulu insan sebebinen teşekkür bildiremiz", – dep, qayd etti Zenife Ablayeva. Qırım MDİ matbuat hızmeti
Efsaneviy qırımtatar uçucı-sınavcı Amethan Sultannıñ 103 yıllığı
Опубликовано:
Qırım Cumhuriyeti ve Sevastopol şeeri Müftisiniñ muavini Raim Ğafarov Sovetler Birliginiñ eki defa qahramanı Amethan Sultannıñ 103 yıllığına bağışlanğan merasimlerde iştirak etti. Aqmescitte efsaneviy uçucınıñ abidesi yanında güldesteler qoyuldı. "Amethan Sultan – bütün qırımtatar halqınıñ ğururı, aqiqiy efsane, yaşağan deviriniñ ulu insanı, yeñilmez ass-uçucı. Biz öz halqımıznıñ şanına lâyıq evlâdı Amethan Sultannıñ büyük naaliyetlerini er zaman hatırlaycaqmız", – dep, qayd etti Raim Ğafarov. İHTAR: Amethan Sultan (1920-1971) – Sovetler Birliginiñ eki defa qaramanı, sovetlerniñ ass-uçucısı, Ulu Vatan cenkiniñ iştirakçisidir. Qırım ve qırımtatar halqınıñ qaramanı. O, Alupkada dünyağa keldi. 1945 senesi, iyün 30 künü, 603 uruş uçuşını yapqanı, ava uruşlarında şahsen özü duşmannıñ 30 uçağını ve, taqım olaraq, 19 uçaqnı urıp tüşürgeni içün, Sovetler Birliginiñ eki defa qaramanı unvanına nail oldı. 1947-1971 seneleri uçucı-sınavcı, Sovetler Birliginde nam qazanğan uçucı-sınavcı, Sovetler Birliginiñ devlet premiyasınıñ laureatı oldı. 50 ziyade uçuş apparat çeşitini sınağan yekâne sovet uçucısı olıp, o, avada, episi olıp, 107 aded tehnika apparatını sınadı. 1971 sene, fevral 1 künü Tu-16LL uçqan laboratoriya ile uçuşnı yapqanda, yañı küçlü reaktiv köçüricini sınağanda, ekipajınen birlikte canını ğayıp etti. Qırım MDİ matbuat hızmeti
Qırım musulmanlarınıñ VII Qurultayı işini tamamladı (FOTO)
Опубликовано:
Aqmescitte Qırımtatar devlet akademik muzıkalı drama teatrinde Qırım musulmanlarınıñ VII Qurultayı olıp keçti. Qurultayda Qırımnıñ er bir tarafından kelgen, yerli musulman din cemiyetleri tarafından saylanıp, yollanılğan vekiller, bundan da ğayrı, Qırım Cumhuriyeti ve Sevastopol şeeri musulmanları idaresiniñ (Tavriya Müftiyatınıñ) azaları, Qırım musulmanları Şurasınıñ azaları ve diniy idaremizge bağlı islâmiy oquv yurtlarınıñ müdirleri birer vekil olaraq iştirak ettiler. Umumiy 327 vekilden 306 vekil Qurultayda azır bulundı. Bundan ğayrı, Qurultayda bir çoq davet etilgen musafir de iştirak etti. Qurultaynıñ ürmetli musafirleri arasında Qırım Cumhuriyetiniñ Başlığı Sergey Aksönov, QC Devlet Şurasınıñ Başlığı Vladimir Konstantinov, QC İçki siyaset, malümat ve bağ naziri vazifesini vaqtınca eda etken Albert Qurşutov, QC Milletlerara munasebetler boyunca devlet komitetiniñ reisi Ayder Tippa, Fevzi Yaqubov adına QMPU rektorı Çingiz Yaqubov, QC Başlığı yanında çalışqan Qırımtatar halq şurasınıñ azaları, Bağçasaray rayon memuriyeti başlığınıñ muavini Enver Ablayev, Aqmescit şeer memuriyetiniñ milletlerara munasebetler boyunca bölüginiñ rehberi İslâm Üseinov, cemaat teşkilâtları ve birleşmelerniñ azaları bulundılar. Qurultay Rusiye Federatsiyası, Qırım Cumhuriyeti ve qırımtatar milliy marşlarınıñ icrasınen ve Muqaddes Quran-ı Kerim tilâvetinen başlandı. Qurultaynıñ iştirakçileri ve musafirleri ögünde 2018-2023 seneleri devamında yapılğan işler boyunca esabatınen Qırım Cumhuriyeti ve Sevastopol şeeri Müftisi hacı Emirali Ablayev çıqışta bulundı. O, müim ve perspektiv maddelerni ayrıca qayd eterek, beş yıl içinde Müftiligimizniñ yapqan işi aqqında tarif etti. Müftiniñ çıqışından soñ Qurultay vekilleri Müftilikniñ işini becermesini qanaatlandırıcı olaraq degerlendirdiler. Qurultaydaki esas mesele – kelecek beş yılğa Müftini ve Teftiş komissiyasını saylamaq oldı. Qurultay vekilleri rey birliginen Müfti olaraq yañıdan hacı Emirali Ablayevni saylap, oña işançlarını ifade eterek, 2028 senesine qadar Müfti vazifesini eda etmekni avale ettiler. Müfti efendi bütün Qurultay vekillerine işançları ve destekleri içün teşekkür bildirdi. O, qayd etti ki, Qırım Cumhuriyeti ve Sevastopol şeeri musulmanları diniy idaresi ileride de Qırım musulmanları ve qırımtatar halqınıñ inkişafı içün çalışmağa devam etecek. "Biz ana-toprağımız Qırımda aydın ve zengin kelecigimizge eminliknen baqmalımız. Çoq yıllar devamında büyük iş yapıldı, amma ileride daa çoq işimiz bar. Er biriñizge, Müftilikniñ bütün hadimlerine professionalligiñiz, birligiñiz ve destegiñiz içün minnetdarlıq duyam. Allah sizden razı olsun!", – dep, qayd etti hacı Emirali Ablayev. Qurultay vekilleri em de Teftiş komissiyasınıñ azalarını sayladılar, onıñ terkibine beş insan kirdi. Aqmeçit rayonınıñ baş imamı Löman Abduramanov Teftiş komissiyasınıñ reisi olaraq saylandı. Komissiya azaları – Emir-Asan Umerov – QMDİ neşriyat bölüginiñ rehberi; Seit- Asan Asanov – Saq rayonı din cemiyetleriniñ reisi; Rustem Temirov – Seyitler rayonı din cemiyetleriniñ reisi; Eskender Suleymanov – Orqapı rayonınıñ baş imamı. İhtar: Nizamnamege köre, Qurultay beş yılda bir kere, esabat- saylav usulınen keçirile. Hacı Emirali Ablayev ilk kere 1999 senesi Müfti vazifesine saylandı. Nevbetteki Qurultaylarda – 2004, 2008, 2013, 2018 seneleri tekrar saylanğan edi. Qırım MDİ matbuat hızmeti
Qırım musulmanları VII Qurultayı vekilleriniñ Filistin-İsrail davası boyunca beyanatı
Опубликовано:
Qırım musulmanları VII Qurultayı vekilleriniñ Filistin-İsrail davası boyunca beyanatı, Aqmescit, 2013 senesi, oktâbr 21 Soñki aftalarda Yaqın Şarqta yüz bergen vaqialar bütün dünyanı raatsız etti. Büyük kedernen qayd etemiz ki, epimiz zalumğa, sivil vatandaşlarnıñ, balalarnıñ, qadınlarnıñ ve qartlarnıñ acı çekmesine şaat olamız. Bugünki vaqialar – "altın milliard" diye belli olğan devletlerniñ taqdir etmesinen peyda olğan çoq yıllıq adaletsizlik ve dünya cemaatçılığında olğan ekili standartlar şekillenmesi neticesinde yüz berdi. Olarnıñ siyaseti sayesinde dünya global buhran ögünde tura, biñlernen qabaatsız insan onıñ qurbanı ola. Çoq yıllardır böyle çatışmalardan biri Filistin topraqlarında yüz bere. Bugün şu konflikt daa acımasız şekilde şiddetlendi, dünya cemaatçılığı ise, sivil insanlarnıñ acı çekmesini toqtatmaq ve Ğazze bölgesinde insaniy felâketke yol bermemek içün bir irade beyanını bir türlü yapıp olamay. Biz, Qırım Cumhuriyeti ve Sevastopol şeeri musulmanları, sivil insanlarğa qarşı küç qullanuvnı yamanlaymız. İç bir siyasiy maqsat insannıñ ayatından daa qıymetli olamaz. Buñdan da ğayrı, biz eminmiz ki, millionlarca sivil insan bir de bir marginal taqımnıñ ya da siyasiy yapınıñ qurbanı olmamalı. Biz insaniy felâketke alıp barğan areketlerden qatiyen razı degilmiz. Millionlarca sivil insan ayatta qalması içün muhtac olğanı temel şeylerden, – aşayt mahsulatlarından, ilâçlardan, tibbiy yardımdan, suvdan, elektrikten ve saireden mahrum qalmamalı. Biz, Qırım musulmanları VII Qurultayınıñ vekilleri, dünya cemaatçılığına seslenerek, acele etip, Filistin-İsrail konfliktini çezmek içün kerekli bütün diplomatik tedbirlerni almağa, Ğazze bölgesine yardım koridorlarını açmağa, sivil ealige tibbiy yardım, suv, aşayt ve elektrik imkânlarını teminlemege çağıramız. Dünya cemaatçılığı şu davağa, niayet, bir noqta qoyıp, halqara uquqnıñ çalışqanını ve halqara müessiselerniñ nufuzlı olğanını köstermek kerek. Biz Birleşken Milletler Teşkilâtınıñ mustaqil Filistin devletini meydanğa ketirmek boyunca alğan qararlarını ömürge keçirmege çağırğan prezidentimiz Vladimir Vladimiroviç Putinniñ mevamınen emfikir olıp, onı desteklemiz. "Biz Filistin-İsrail davası ancaq muzakereler yolunen çezilmek kerekligi noqta-i nazarına esaslanamız. Şu muzakelerniñ maqsadı – BMT formulasına binayen, eki devletniñ qurulması, yani Şarqiy İyerusalimde paytahtı yerleşecek mustaqil Filistin devletiniñ tesis etilmesi olmalı", – dedi RF Prezidenti. Biz inanamız ki, Prezident Vladimir Vladimiroviç Putin yolbaşçılığında Rusiye Federatsiyası aracılıq yardımı ve bütün diplomatik imkânlarınıñ qullanuvınen bölgege barışıqlıqnı qaytarmağa yardım eter. Dünya cemaatçılığını ise, şu cereyanğa qoşulmağa ve ekili standartlar siyasetinden vazgeçmege çağıramız. Qırım MDİ matbuat hızmeti
Hacı Emirali Ablayev tekrar Müfti olaraq saylandı
Опубликовано:
Qırım musulmanlarınıñ VII Qurultayınıñ vekilleri rey birliginen Qırım Cumhuriyeti ve Sevastopol şeeriniñ Müftisi hacı Emirali Ablayevni daa beş yılğa Müfti olarq sayladılar. Qurultay vekilleri Müfti hacı Emirali Ablayevge öz işançlarını ifade etip, oña 2028 senesine qadar Müfti vazifesini eda etmekni avale ettiler. Qırım Cumhuriyeti ve Sevastopol şeeri Müftisi hacı Emirali Ablayev Qurultay iştirakçileri ve musafirleri ögünde 2018-2023 seneleri devamında yapılğan işlerniñ esabatı içün çıqışta bulundı. İhtar: Hacı Emirali Ablayev ilk olaraq 1999 senesi Qırım Müftisi vazifesine saylanğan edi. Soñra, 2004, 2008, 2013, 2018 seneleri keçirilgen Qurultaylarda da Müfti olaraq saylanğan edi. Qırım MDİ matbuat hızmeti
Sergey Aksönov ve Vladimir Konstantinov Qırım musulmanları Qurultayında selâmlav sözlerinen çıqışta bulundılar
Опубликовано:
VII Qurultaynıñ vekilleri ögünde Qırım Cumhuriyetiniñ Başlığı Sergey Aksönov ve Devlet Şurasınıñ Reisi Vladimir Konstantinov sölâmlav sözleri ile çıqışta bulundılar. Sergey Aksönov Qırım Müftisiniñ milletlerara ve dinlerara birlikniñ pekitilmesi içün büyük rolüni qayd etti. "Emirali efendi öz misalinde yaqınlarğa, vatandaşlarğa eyi munasebetniñ örnegini köstere. O, oña muracaat etken er keske yardım qolunı uzata. Biz birlikte bazı iş meselelerini çezemiz, er şey insanlarnıñ eyiligi içün yapıla. Barışıqlıqnı, milletler ara muabbetlik olmadan, qurmaq imkânsızdır. Qırım Müftisi ve Müftilikniñ bütün hadimlerine ürmetimni ve teşekkürimni bildirem", – dedi Qırım Başlığı. Qırım Cumhuriyeti Devlet Şurasınıñ Reisi Vladimir Konstantinov selâmlav sözlerinde Qırım Müftisine Qırımda birdemlikniñ olması ve yarımadanıñ inkişaf etmesi maqsadınen alıp barğan faaliyeti içün teşekkür bildirdi. "Ümüt etem ki, 5 yıldan soñ Qırım devletimizniñ eñ güzel bölgelerinden biri olacaq. Buña biz cumhuriyetimizde üküm sürgen unikal birdemlik sayesinde irişecekmiz. Eminliknen ayta bilem ki, Qırım Müftisi bütün Qırım içün müim tarihiy şahıstır, onıñ ğayretleri sayesinde yarımadamızda yaşağan bütün halq ve din vekilleri arasında aenkli munasebetler quruldı", – dedi Vladimir Konstantinov. Hatırlatamız, bugün, oktâbr 21-de, Qırım devlet akademik muzıkalı drama teatrinde Qırım musulmanlarınıñ VII Qurultayı işini başladı. Qırım MDİ matbuat hızmeti
Qırım musulmanlarınıñ VII Qurultayı başlandı
Опубликовано:
Oktâbr 21 künü Aqmescitte Qırımtatar devlet akademik muzıkalı drama teatrinde Qırım musulmanlarınıñ VII Qurultayı olıp keçti. Qurultayda Qırımnıñ er bir tarafından kelgen, yerli musulman din cemiyetleri tarafından saylanıp, yollanılğan vekiller, bundan da ğayrı, Qırım Cumhuriyeti ve Sevastopol şeeri musulmanları idaresiniñ (Tavriya Müftiyatınıñ) azaları, Qırım musulmanları Şurasınıñ azaları ve diniy idaremizge bağlı islâmiy oquv yurtlarınıñ müdirleri birer vekil olaraq iştirak ettiler. Umumiy 327 vekilden 306 vekil Qurultayda azır bulundı. Bundan ğayrı, Qurultayda bir çoq davet etilgen musafir de iştirak etti. Tedbir Rusiye Federatsiyası, Qırım Cumhuriyeti ve qırımtatar milliy marşlarınıñ icrasınen başlandı. İmam Maturidiy adına Qalay islâmiy ilimler medresesiniñ müdiri Edem Lümanov Qurultaynı muqaddes Quran-ı Kerim tilâvetinen başladı. Qurultaynıñ iştirakçileri ve musafirleri ögünde 2018-2023 seneleri devamında yapılğan işler boyunca esabatınen Qırım Cumhuriyeti ve Sevastopol şeeri Müftisi hacı Emirali Ablayev çıqışta bulundı. Qırım MDİ matbuat hızmeti
Müfti muavini Novoalekseyevka qasabasınıñ camisini ziyaret etti
Опубликовано:
Qırım Cumhuriyeti ve Sevastopol şeeri Müftisiniñ muavini Raim Ğafarov Herson vilâyetiniñ Novoalekseyevka qasabasınıñ camisine iş ziyareti ile bardı. Müfti muavini cemaatçılıqnen körüşti, cuma namazını qıldırdı ve yerli musulmanlarnen olarnı meraqlandırğan meselelerni muzakere etti. "Herson vilâyetiniñ camileri er vaqıt Qırım musulmanları diniy idaresine baqa edi. Biz er daim cami cemaatlarına qol tutamız, diniy aydınlatıcı suhbetler keçiremiz", – dep, qayd etti Raim Ğafarov. Herson vilâyeti ealisiniñ 40% musulmanlar teşkil ete, anda bir çoq qırımtatar yaşay. Er yıl camilerde Oraza bayramı ve Qurban bayramı keçirile. Qırım MDİ matbuat hızmeti
“Alem-i nisvan” qadınlar merkeziniñ Aqmeçitte filialı açıldı
Опубликовано:
Aqmeçit qasabasındaki Cuma cami yanında Aqmeçit rayonınıñ baş imamı Löman Abduramanov ve din ocası Gülfize Abduramanovanıñ teşebbüsi ile"Alem-i nisvan" islâmiy medeniy maarif merkeziniñ filialı açıldı. Aqmeçit rayonında, civar köylerde yaşağan qadınlarnıñ artıq çeşit seminarlarda, master-klasslarda ve farqlı mevzularda keçirilgen derslerde iştirak etmek imkânları olacaq. Tedbirni Aqmeçit rayonınıñ baş imamı Löman Abduramanov açtı. O, "Alem-i nisvan" qadınlar merkeziniñ başlığı Zenife Ablayevağa merkezniñ filialını açmaq teşebbüsine müsbet cevap bergeni içün teşekkür bildirdi. Qırım Cumhuriyeti ve Sevastopol şeeri musulmanları diniy idaresiniñ diniy tedbirlerni teşkil etüv bölüginiñ rehberi, "Alem-i nisvan" qadınlar merkeziniñ başlığı Zenife Ablayeva tedbirniñ musafirlerine merkezniñ faaliyeti, qadınlarğa azırlağan imkânları ve Qırımnıñ farqlı bölgelerinde inkişaf planları aqqında tarif etti. "Aqmeçit rayonı Qırımnıñ eñ uzaq bölgelerinden biri olğanına baqmadan, ilk evelâ merkezimizniñ filialı mında açıldı. İleride biz, "Alem-i nisvan" leyhası çerçivesinde er bir qadınnıñ ögrenmek ve inkişaf etmek imkânı olsun dep, Qırımnıñ er bir bölgesinde filiallar açacaqmız", – dep, qayd etti Zenife Ablayeva. Tedbirde Aqmeçit rayon memuriyeti başlığınıñ milletlerara munasebetler meseleleri boyunca yardımcısı Hatice Zaparova iştirak etti. O, qadınlar merkeziniñ qıymetini ve müimligini ayrıca qayd etti. Merkezniñ musafirleri ögünde "İslâmda qadınnıñ rolü" maruzasınen çıqışta Aqmeçit rayonı boyunca qadınlarnıñ diniy faaliyetini idare etken Gülfize Abduramanova bulundı. Musafirler içün sanat ve el işi ustalarınıñ sergisi azırlanıldı, olarnı tatlılıqlarnen sıyladılar. Qırım MDİ matbuat hızmeti
Qırım Müftisiniñ RF Prezidentini hayırlavı
Опубликовано:
Qırım Cumhuriyeti ve Sevastopol şeeri musulmanları diniy idaresiniñ Müftisi hacı Emirali Ablayev Rusiye Federatsiyası Prezidenti Vladimir Putinni doğğan künü ile hayırlay: "Ürmetli Vladimir Vladimiroviç! Qırım Cumhuriyeti ve Sevastopol şeeri musulmanları diniy idaresinden ve şahsen öz adımdan Sizni doğğan künüñiz ile hayırlayım! Siziñ ğayretiñiz sayesinde Rusiyeni er kes abadan ve çoq milletli devlet olaraq tanıy. Er bir işiñizde Siz Vatanıñızğa büyük sevgi kösteresiñiz, devletniñ menfaatlarını qorçalaysıñız, bütün ananeviy dinlerge ürmet kösteresiñiz, bütün Rusiye halqınıñ maneviyatı ve vatanperverligi inkişafına isse qoşasıñız. Siz küçlü, ikmetli ve iradeli yetekçi olaraq, devletniñ milliy menfaatlarını qorçalavda qararlılığıñız ile bellisiñiz. Qırım Cumhuriyetiniñ inkişafına da Siz büyük isse qoştıñız ve qoşmaqtasıñız. Biz, qırımtatar halqınıñ vekilleri olaraq, halqımıznıñ eyiligi, inkişafı ve tarihiy adaletniñ yerine kelmesi içün yapılğan er bir şeyden dolayı Sizge büyük minnetdarlığımıznı bildiremiz! Siziñ diqqatlı nezaretiñiz astında Qırımda çoq beklenilgen Cuma cami qurula, ve o, Allahnıñ izini ile, yaqın arada qapılarını musulmanlar içün açacaq. Biz epimiz, bütün bir devlet olaraq, bunı bekleymiz. Buña yaqınlaşuvımız da – Siziñ naaliyetiñizdir. Vatannıñ eyiligi oğrunda yapacaq işleriñizde muvafaqiyetler, qaviy sağlıq, Allahtan barışıqlıq ve riza, merhamet ve ikmet tileyim!" Qırım MDİ matbuat hızmeti