Хаберлер
Къырым мектеплеринде мерхаметлик дерслери
Опубликовано:
«Мерхаметлик лялеси» хайрие акциясы фааль шекильде Къырымнынъ окъув юртларында кечириле. Онынъ макъсады – яш несильге мерхаметлик ве ярдымлашув дегерлерини еткизмектир. Бу афта Муфтилигимизнинъ векиллери мерхаметлик дерсини Акъмесджиттеки №16 мектепнинъ 9 сыныфлар талебелери ичюн кечирдилер. «Л.М. Павличенко адына №2 Къурман мектеби» окъув юртынынъ талебелери ичюн де кечирильген мерхаметлик дерси муим бир вакъиа олды. Талебелернен корюшмек ичюн омюр ёллары джемиетке хызметнинъ орьнеги олгъан урьметли мусафирлер кельдилер, –Нусрет Сеттаров, Данилов къасабасынынъ молласы, район шурасынынъ азасы ве эсли-башлыларгъа ве сакъатларгъа дестек меркезининъ гонъюллиси, ве Талят Хаджы Велиев – Къурман районынынъ буюги ве Афгъанистан ветераны. Урьметли мусафирлер талебелернен акциянынъ макъсады акъкъында муим малюматнен пайлаштылар ве эр куньлюк аятымызда мерхаметликнинъ ерини аятий мисаллернен анълаттылар. Къурман районынынъ бир сыра мектеплеринде ве Еди Къую къасабасынынъ меркезий мектебинде балалар буюк меракънен акциянынъ тимсали олгъан лялелерни озь эллеринен кягъыттан, фетрден ве дигер мальземелерден яптылар. Бу иджадий иш балаларгъа эмеклерининъ ве эйи ниетлерининъ мухтадж олгъанларгъа дестек ишинде муим бирер иссе олгъаныны ис эттирди. «Мерхаметлик лялеси» акциясы бутюн ярымадада ишини девам эте ве чешит несиллерни эзелий къыйметлеримиз – эйиликсеверлик ве инсаниетлик этрафында бирлештире. Къырым МДИ матбуат хызмети
Дин эрбапларынынъ топлашувы
Опубликовано:
Къырым Джумхуриети ве Севастополь шеэри мусульманлары диний идаресинде (Таврия Муфтиятында) имамларнынъ эр айлыкъ топлашувы олып кечти. Корюшювни Къырым Муфтиси хаджы Эмирали Аблаев кечирди. Топлашув эснасында мубарек Рамазан айы, Ораза байрамына азырланув ве имамлар иле дин джемиетлерининъ маариф фаалиетинен багълы меселелер музакере этильди. Мушавере нетиджесинде Муфти эфенди имамларгъа япкъан ишлери ичюн тешеккюр бильдирди ве энъ фааль больгелер – Джанкой, Джурчи ве Акъшейх районларынынъ векиллерини айрыджа къайд этти. Бундан да гъайры, Къырым Муфтилигинде къадын-къыз дин оджалалырынынъ топлашувы да олып кечти. Корюшювни Муфтилигимизнинъ диний тедбирлерни тешкиль этюв болюгининъ рехбери Зенифе Аблаева кечирди. Тедбир черчивесинде диний-маариф лейхаларынынъ омюрге кечирилюви ве «Мерхаметлик лялеси» акциясында больгелернинъ даа фааль иштираки музакере этильди. Къырым МДИ матбуат хызмети
Къалай медресеинде «Мерхаметлик лялелери» пейда олды
Опубликовано:
Имам Матуридий адына Къалай ислямий илимлер медресесининъ къыз болюгинде «Мерхаметлик лялеси» хайрие акциясы олып кечти. Окъув юртунынъ талебелери эльяпмаларыны азырламакъ ичюн ортагъа эм мааретлерини, эм гонъюллерини къойдылар. Бир къач афта девамында талебелер махсус мастер-классларда ве бош вакъытларында озь эллеринен акциянынъ тимсаллерини яптылар. Къолларында кягъыттан ве фетрден япылгъан, юньден орюльген лялелер ачты, картлар ве дигер япмалар азырланылды. Бу иджадий иш олар ичюн маналы ве амелий бир мерхаметлик дерси олды. Захметнен япылгъан иш эснасында талебелер анъладылар ки, кичик корюнген эмеклери ве иджатлары, керчектен де, бир кимсеге ярдым эте биле. Яш къызларнынъ гонъюллеринде эйиликсеверлик, шефкъат, месулиет ве мухтаджларгъа ярдым этмек имкянлары ичюн Аллахкъа самимий шукюр дуйгъулары шекилленип пекинди. «Мерхаметли олмакъ ичюн буюк зенгилик керекмей, онынъ ичюн садедже эйиликни севген юрек керек. Къалай медресесинде ачкъан лялелер бир кимсе ичюн шифа олсун ве бизим юреклеримизни йыл девамында сыджакъ тутсун», – деп, къайд эттилер медреседе. Акция боюнджа япылгъан эльяпмалар хайрие ярмалыкъларында сатыладжакъ, топлангъан паралар исе, ярдымгъа мухтадж олгъанларгъа бериледжек. Къырым МДИ матбуат хызмети
Акъмесджитте Ватан къоруйыджысы куню къайд этильди
Опубликовано:
Акъмесджитте Ватан къоруйыджысы кунюне багъышлангъан байрам тедбири олып кечти. Бу тедбир фаркълы дин ве миллет векиллерини бирлештирип, Русиедеки чешит халкъларнынъ медениет ве иджат ёлундаки бирлигини нумайыш этти. Мусафирлер ичюн Къырымнынъ медений зенгинлигини косьтерген, оюнлар ве йырларнен донатылгъан концерт программасы азырланды. Тедбирнинъ тантаналы къысмында Ички ишлер назирлиги оркестри ве ансамблининъ иджрасында Русие Федерациясынынъ ве Къырым Джумхуриетининъ гимнлери янъгъырады. Тедбирде урьметли мусафирлер чыкъышта булундылар, оларнынъ арасында Къырым Джумхуриети Девлет Шурасы реисининъ биринджи муавини Сергей Цеков, Къырым Джумхуриети Назирлер Шурасы башлыгъынынъ муавини Альберт Къуршутов, Къырым Джумхуриети Назирлер Шурасы башлыгъынынъ муавини Михаил Назаров бар эди. Къырым мусульманлары диний идареси адындан тедбирде Муфтиликнинъ диний тедбирлерни тешкиль этюв болюгининъ рехбери Зенифе Аблаева чыкъышта булунды. Концерт иле айны вакъытта мусафирлер ичюн тематик экспозиция чалыша эди. Февзи Якъубов адына Къырым Муэндислик Педагогика Университетининъ холлында укъукъкъоруйыджы органларынынъ экипировка нумюнелери нумайыш этильди ве анда «Русие халкъларынынъ бирлиги куню»не багъышлангъан фотозонада хатыралыкъ фотолар япмакъ мумкюн эди. Къырым МДИ матбуат хызмети
Къырымда «Минарелернинъ кольгеси алтында» сергиси ачылды
Опубликовано:
Къырым Медениет Назирлигининъ дестеги иле Къырымтатар медений-тарихий мирас музейинде «Минарелернинъ кольгеси алтында» сергиси ачылды. Тедбир Рамазан айына багъышланды. Экспозиция Ислям аньанелерининъ уникаль къырымтатар медениетине терен тесирини косьтере. Сергиде эм музей фондундан олгъан, эм де шахсий коллекциялардан олгъан шейлер нумайыш этильди: диний китаплар, Къырым рессамларынынъ ишлери, къуюмджылыкъ ишлери, намазлыкълар, марамалар, диний маиетли савутлар ве эвджыярлар. Ачылув мерасиминде Къырым Муфтисининъ муавини Раим Гъафаров ве Муфтилигимизнинъ диний тедбирлерни тешкиль этюв болюгининъ рехбери Зенифе иштирак эттилер. Серги къырымтатар халкъынынъ зенгин маневий ве медений мирасынен таныш олмагъа теклиф эте. Тешкилятчыларнынъ къайд эткенине коре, бу артефактлар садедже бирер эснафчылыкъ нумюнеси дегиль. Олар иляхий низам акъкъындаки фельсефий тасавурларнынъ ве чокъасырлыкъ аэнкликке тырышувнынъ косьтергичидир. Къырым МДИ матбуат хызмети
Къырым Муфтилигинде миллетлерара тёгерек маса олып кечти
Опубликовано:
Къырым Джумхуриети ве Севастополь шеэри мусульманлары диний идаресинде «Динлер, халкълар ве медениетлернинъ диалогы эсасында ишбирлик» мевзусында тёгерек маса отькерильди. Ярымаданынъ миллий-медений бирлешмелери рехберлерининъ иштиракинен отькерильген тедбир Русиеде Миллетлер бирлиги йылы черчивесинде кечирильди. Корюшювнинъ макъсады – динлерара ве миллетлерара диалогнынъ къавийлешмеси ве Къырым джемиетинде миллий зенгинликни ве аэнкни сакъламакъ ичюн конкрет адымлар атмакътыр. Тёгерек масанынъ иштиракчилери якъын заманда ишбирлик черчивесинде аяткъа кечирильмеси планлаштырылгъан ичтимаий лейхаларны музакере эттилер. Умумий маариф иши, яшларнынъ тешеббюслери ве медений теджрибелернен пайлашув меселелери дикъкъатнынъ меркезинде олды. Музакеренинъ модераторлары – Къырым Муфтисининъ муавини Раим Гъафаров ве КЪМДИ диний тедбирлерни тешкиль этюв болюгининъ рехбери Зенифе Аблаева олдылар. Олар догъру ортакъ къарарларгъа кельмек ичюн бойле ачыкъ мейданларнынъ муимлини къайд эттилер. Программанынъ сонъунда мусафирлер ичюн Буюк Джума джами боюнджа экскурсия кечирильди, олар ярымаданынъ баш мусульман диний меркези олгъан джамининъ мимарджылыгъы ве тарихынен таныш олдылар. Къырым МДИ матбуат хызмети
«Хош кельдинъ, Рамазан!»: Къырымтатар театры ве Къырым Муфтилиги уникаль программаны азырлай
Опубликовано:
Къырымтатар академик музыкалы-драма театры Къырым Джумхуриети ве Севастополь шеэри мусульманлары диний идаресинен ишбирликте мубарек Рамазан айына багъышлангъан хусусий концерт программасыны премьерасына азырлай. «Хош кельдинъ, Рамазан!» серлевхалы лейха маневий мирасымыз иле профессиональ театр санатынынъ уникаль синтези оладжакъ. Азырлыкъ черчивесинде иш корюшюви олып кечти. Корюшювде Къырым Муфтисининъ муавини Раим Гъафаров, Муфтилигимизнинъ диний тедбирлерни тешкиль этюв болюгининъ рехбери Зенифе Аблаева, театрнынъ рехбериети ве программанынъ саналаштырма режиссёри иштирак эттилер. Корюшювде сценарий ве концертнинъ мана джеэтинден мундериджеси эр тарафлама музакере этильди. Программанынъ эсасында – аньаневий диний йырлар (иляхийлер), олар театрнынъ артистлери тарафындан оркестр аккомпанементи иле иджра этиледжек. Сейирджилерни чокъасырлыкъ диний мирас боюнджа сеяат беклей: эм классик эсерлер, эм де земаневий къырымтатар муэллифлерининъ, бестекярларнынъ ве чалгъыджыларнынъ эсерлери такъдим этиледжек. «Хош кельдинъ, Рамазан!» концерт программасынынъ премьера нумайышлары Къырым академик музыкалы-драма театрынынъ санасында февраль 28, март 7 ве март 12 куньлери, саат 16:00 косьтериледжек. Къырым МДИ матбуат хызмети
Акъмечит районындаки мектепте «Мерхаметлик лялеси» ачты
Опубликовано:
Акъмечит районында Русие халкъларынынъ бирлиги йылына багъышлангъан ватанперверлик ве хайрие акцияларынынъ сериясы башланды. Биринджи оларакъ, онъа Татар Чагъалтай (Далёкое) мектеби къошулды. Шу мектепте тантаналы шекильде тедбирлер сырасы башлатылды ве «Мерхаметлик лялеси» акциясы кечирильди. Байрам кучьлю девлетнинъ темели олгъан фаркълы медениетлер арасында бирлик ве достлукънынъ муимлиги акъкъында сухбеттен башланды. Тедбиде Къырым мусульманлары диний идаресининъ темсильджилери де иштирак этти. Акъмечит (Черноморское) районынынъ баш имамы Лёман Абдураманов ве дин оджасы Гульфизе Абдураманова талебелерге хусусий «Мерхаметлик дерси»-ни кечирдилер. Мусафирлер балаларгъа эйи ишлернинъ, якъынларгъа дикъкъат этмекнинъ муимлигини анълаттылар ве бунынъ бутюн Русие халкъларынынъ умумий къыйметлери олгъаныны тариф эттилер. Олар къайд эттилер ки, «Мерхаметлик ляляси» киби акцияларда иштирак этмек – бу садедже бир иджадий вазифе дегильдир, бу – маневий осюв ве мухтадж олгъанларгъа эль узатмакъ демектир. Талебелер буюк истекнен мерхаметликнинъ парлакъ тимсаллери олгъан лялелерни яптылар. Бу умумий иджадий иш балаларны ве буюклерни бирлештирди ве косьтерди ки, озь эллернен япылгъан саде иш умумий эйи ишке буюк иссе къоша биле. Къырым МДИ матбуат хызмети
Къырым Муфтисининъ муавини УФСИН тешкилятында Рамазан акъкъында лекция окъуды
Опубликовано:
Къырым Муфтисинисинъ муавини Мухаммед Ислямов Русиенинъ Къырым Джумхуриети ве Севастополь шеэри боюнджа Джезаларны иджра этюв федераль хызмети идаресини (УФСИН) зиярет этти. Зиярет идаре мудирининъ муавини Эльдар Саидовнынъ даветинен кечирильди. Корюшюв черчивесинде тедбир иштиракчилери ичюн Рамазан айына багъышлангъан мундериджели лекция отькерильди. Мухаммед Ислямов оразанынъ манасы, онынъ мусульманнынъ аятында олгъан эмиетли ери ве Аллах тарафындан берильген буюк мукяфаты акъкъында тариф этти. Бундан да гъайры, Къырым Муфтисининъ муавини Муфти адындан сыджакъ селямны ве тилеклерини бильдирди. Корюшювнинъ сонъунда тедбир иштиракчилерине ибадет этмелери ичюн Рамазан имсакиелери берильди. Къырым МДИ матбуат хызмети
КЪМДИ-нде Ислям бильгилери боюнджа аттестация кечирильди
Опубликовано:
Къырым Джумухуриети ве Севастополь шеэри мусульманлары диний идаресинде Сакъ шеэри ве Сакъ районында чалышкъан Ислям темеллери ве Къуран окъувы оджасы Гульсум Ибрагимованынъ талебелери ичюн тантаналы аттестация олып кечти. 36 талебе, – фаркълы яшта олгъан къадынлар ве къызлар, – Ислям темеллери ве Къуран-ы Керим окъувы боюнджа имтианны мувафакъиетнен тапшырдылар. Аттестация комиссиянынъ теркибине юксек ихтисаслы Ислям темеллери оджалары, иляхиятчылар – Зенифе Аблаева, Сафие Къуртдеде ве Сеяре Меметова кирдилер. Олар талебелернинъ диний бильгилерини ве Къуран окъувларыны сынадылар. Къырым Муфтиси хаджы Эмирали Аблаев мезунларгъа тантаналы муитте Къуранларны эдие этти. 36 талебеден 25 мезун имтианны мувафакъиетнен тапшырды ве невбеттеки окъув дереджесине кечти. Бугуньки куньде Къырым джамилеринде имамларнен бир сырада 55 къадын оджа да Къуран окъувы ве Ислям темеллери дерслерини кечире. Оларнынъ эписи 2025 сенеси аттестациядан кечип, КЪМДИ эркянында дерс бермек акъкъыны къазандылар. Диний идаремизнинъ эркянында чалышкъан къадын оджаларынынъ кураторы, иляхиятчы Зенифе Аблаева япылгъан ишнинъ муимлиги къайд этти. «Биз эр ерде фаркълы яшта олгъан къадынларнен чалышамыз, маариф ишлерини алып барамыз ве аньаневий Ислям темеллери боюнджа бильгилерни беремиз. Бугунь бу иш бизге аньаневий олмагъан деструктив акъымларнынъ ве фыркъаларнынъ огюни алмагъа ярдым эте, чюнки яшлар сыкъ-сыкъ оларнынъ тесирине тюше. Мусульман аналарнынъ етиштирильмеси ве маарифи ёлунен, Ислям укюмлерини догъру анълатмакъ иле биз Къырымда йыкъыджы акъымларнынъ илерилемесини токътата билемиз. Айны бу себептен мен Ислям бильгилерини алмагъа истеген къадын-къызларны юксек ихтисаслы ве дерс бермек акъкъы олгъан мутехассысларгъа мураджаат этмелерине чагъырам». Къырым МДИ матбуат хызмети
Къырым Муфтисининъ муавини Джанкой районындаки тюзетюв меркезини зиярет этти
Опубликовано:
Къырым Муфтисининъ муавини Мухаммед Ислямов Русиеде Джезаларны иджра этюв федераль хызмети идаресининъ (УФСИН) Джанкой районындаки Яркое коюнде ерлешкен тюзетюв меркезинде джеза чеккен инсанларнен сухбет кечирди. Зияретининъ макъсады – махкюм этильгенлерге маневий дестек косьтермек ве динлерара муаббетликни къавийлештирмектир. Мухаммед Ислямов тек мусульманларнен дегиль де, дигер дин векиллеринен де сухбетлешип, фаркълы динлерни кутькен инсанлар арасында диалогнынъ ве урьметнинъ муимлигине ургъу япты. О, эки терен лекция кечирди. Биринджиси якъынлашкъан Рамазан айынынъ башланувына, онынъ терен маневий манасына багъышланды. Экинджи лекция исе, профилактик мананы ташып, экстремизм ве терроризм мефкуресине къаршы куреш меселесине айырылды. Диндашларымызнен шахсий сухбетлер де кечирильди, шу сухбетлер эснасында диндашларымыз оларны меракъландыргъан диний суаллерни берип, джевапларыны алдылыр ве маневий насиатларны алдылар. Къырым МДИ матбуат хызмети
Къырым Муфтилиги МАО аскерлерине гуманитар ярдым ве автомобиль ёллады
Опубликовано:
Къырым Джумхуриети ве Севастополь шеэри мусульманлары диний идареси махсус арбий операцияда иштирак эткен арбийлерге невбеттеки ярдымыны ёллады. Аскерлерге гуманитар ярдымдан ибарет буюк бир партия теслим этильди – термо тюп урбалар, эт консервалары, шахсий темизлик эшьялары ве керекли мевсим иляджлары. Бундан да гъайры, арбийлернинъ риджасы иле оларгъа юксек кечюв къабилиети олгъан автомобиль ёлланылды, о, арбий вазифелерни эффектив шекильде ерине кетирмеге ярдым этеджектир. Бу – Къырым Муфтиси хаджы Эмирали Аблаевнинъ тешеббюси иле Къырым мусульманлары диний идаресинден джебхеге ёллагъан бешинджи машинадыр. Арбийлер, Къырым Муфтисине тешеккюр бильдирмек ичюн, арабанынъ анахтарларыны алмагъа махсус озьлери кельдилер. Муфти эфенди исе, озь невбетинде, арбийлерге урьметини бильдирди. «Биз сизинъ себатынъыз, къавий рухунъыз ве Ватангъа федакяр севгинъизнен гъурурланамыз. Бизим боюн борджумыз – бу къыйын ишинъизде сизге дестек косьтермек ичюн элимизден кельгенини япмакътыр. Ярдымымыз – садедже шейлер дегиль, эм де сизинъ хавфсызлыгъынъыз ичюн умумий дуамыз ве якъын гъалебемизге умютимиздир», – деп, къайд этти Муфти бей. Къырым Муфтилиги даимий шекильде озьлерини энъ гузель шекильде костерген «Имкянлар такъымы» гонъюллилер такъымынынъ ярдымынен джебхеге ярдым ёллай, олар исе, озь невбетинде, ярдымнынъ догъру арбийлерге барып етмесини теминлей. Къырым МДИ матбуат хызмети