Джанкой шеэриндеки умумтахсиль мектеплерининъ талебелери «Мерхаметлик лялеси» хайрие акциясында иштирак эттилер. Акция Къырым Джумхуриети ве Севастополь шеэри мусульманлары диний идареси Меркезлештирильген диний тешкиляты (Таврия Муфтияты) тарафындан кечириле.
Акция черчивесинде талебелер фаркълы мальземелерден (кягъыт, боюнджукъ, къумач, ресим, брошь ве дигери) акциянынъ тимсали олгъан лялелерни япалар. Азыр эльяпмалар тешкиль этильген мектеп хайрие ярмалыкъларында сатылды.
Хатырлатамыз, джумхуриетимизде «Мерхаметлик лялеси» хайрие акциясы башланды. Хайриеге озь пайыны къошмагъа истегенлер акцияда иштирак этмек ичюн давет этиле – мектеп талебелери, бала багъчаларындаки балалар, шеэрлернинъ ве районларнынъ мемуриетлери, медениет эрбаплары, имамлар, дин джемиетлерининъ реислери, джемаат эрбаплары.
Акциянынъ макъсады – агъыр хаста балаларынынъ къоранталарына ярдым косьтермек ве Махсус арбий операция иштиракчилернинъ къоранталарына хайрие тедбирлерни тешкиль этмек ичюн пара топламакътыр.
«Балаларнынъ эллеринен ве буюклернинъ эйи ниетинен» шиары астында кечирильген акция 2025 сенесининъ апрель 30 кунюне къадар девам этеджек.
Къырым МДИ матбуат хызмети