Özüni Qırım Muhtar Cumhuriyetiniñ Prokuraturası olaraq tanıtqan teşkilât Qırım Müftisi hacı Emirali Ablayevni mahsus arbiy operatsiya (MAO) aqqında müsbet sözler aytqanında, Ukraina akimiyetini aqaretlegeninde ve “umumen rus dünyası ğayesini yaymasında” qabaatlay.
Müfti ise, öz nevbetinde, böyle qaabatlavlar Qırım musulmanları diniy idaresiniñ doğru yoldan ketkenini köstergenini bildirdi.
“Bizim maqsadımız tek musulman ümmetine degil de, bütün Qırım cemiyetine hızmet etmek, bölgede milletlerara ve dinlerara barışıqlıqnı qurmaq ve saqlamaq, çünki tek bir-birimizge añlayışlı davranıp, dostane munasebette bulunsaq, bölgemizni inkişaf ettirip, dinimizni, urf-adetimizni saqlap olurmız. Biz daima bu yönelişte çalışamız. Bazı insanlar bunı begenmey. Demek, biz doğru yoldamız, er şeyni doğru yapamız, bizim işimizge diqqat ayırıldı. Yolumıznı ilerige devam etemiz, arqağa baqmağa vaqıtımız yoq”, – dedi Müfti.
Qırım MDİ matbuat hızmeti