Qırım Cumhuriyeti ve Sevastopol şeeri musulmanlarınıñ Müftisi hacı Emirali Ablayev Türkiyeden, Özbekistandan ve Herson vilâyetinden kelgen musafirlernen körüşti. Türkiyeni Ünver Sel temsil etti, Özbekistandan Lenur Abdulğaniyev teşrif buyurdı, Herson vilâyetinden Asan Aliyev keldi. Dostane körüşüvde Milletlerara munasebetler boyunca devlet komiteti reisiniñ birinci muavini Ruslan Yaqubov ve Qırım Cumhuriyeti Başlığınıñ mesleatçısı Albert Qurşutov da iştirak ettiler.
Qırım musulmanlarınıñ diniy yetekçisi Qırımğa buyurğan musafirlerni selâmlap, yarımadamızda yaşağan vatandaşlarımıznıñ ayatı ve Aqmescitteki Büyük Cuma caminiñ qurucılığı aqqında tarif etti. Hacı Emirali Ablayev böyle körüşüvlerniñ emiyetini qayd etti. “Kelgeniñiz pek yahşı oldı, Qırımdaki vaziyetni öz közüñiznen köre bildiñiz. Çünki er şey Ğarp tarafından körterilgeni kibi degil. Bugün de bugün bizler dostane ve eyi qomşulıq munasebetlerinde yaşaymız. Devlet desteginiñ yardımınen biz farqlı saalarda müsbet neticelerge irişemiz”, – dedi Qırım musulmanlarınıñ diniy yetekçisi hacı Emirali Ablayev.
Qayd etmek kerek ki, bu künleri qırımtatar halqınıñ çetelde yaşağan semetdeşlerimiznen munasebetlerniñ inkişafı meselesine bağışlanğan tögerek masa ötkerile. Tedbir Rusiyede ve ondan tış yaşağan qırımtatarlar arasındaki munasebetlerniñ pekitilmesi maqsadınen teşkil etildi ve akimiyet ile din vekillerini, Qırım Cumhuriyetinde ve Rusiye Federatsiyasınıñ yañı subyektlerinde faaliyet köstergen qırımtatar cemaat teşkilâtlarınıñ azalarını, Türkiye ile Özbekistandan kelgen halq vekillerini bir arağa topladı.
Tedbirniñ neticesi olaraq iştirakçiler tarafından rezolütsiya qabul etildi. Rezolütsiyada çeteldeki qırımtatar cemiyetleri maneviy, içtimaiy, iqtisadiy ve medeniy alâqalarınıñ inkişafına yönelgen leyhalarğa destek köstermege, ondan da ğayrı, qırımtatar halqınıñ til, tahsil, içtimaiy ve insaniy inkişafı ve Qırımda yaşağan vatandaşlarımıznıñ ayatı aqqında obyektiv bilgi bermek maqsadınen meydanğa ketirilgen gumanitar leyhalarnı, şu cümleden, Qırım Cumhuriyetiniñ akimiyeti tarafından teşkil etilgen ve Türkiyede keçirilecek “Qırımtatar medeniyet künleri” kibi leyhalarnı birlikte ömürge keçirmege çağırıla.
Qırım MDİ matbuat hızmeti