Санкт-Петербург шеэринде III халкъара диний форум олып кечти. Тедбир Санкт-Петербург ве Русиенинъ Шималий-гъарбий больгеси мусульманлары диний идареси тарафындан, Санкт-Петербургнынъ акимиети, Русие мусульманлары диний кенъеши, Рус православ килисеси ве Ислям медениети, илими ве тахсилине дестек фондунынъ дестегинен кечирильди.
Форумнынъ мевзулары земаневий джемиетте диний, маневий-ахлякъий ве аилевий къыйметлерининъ сакъланувы, аньаневий динлер арасында мунасебетлердеки динамиканынъ инкишафы, экстремизм мефкуресине къаршы куреште янъы информация усулларыны ишлеп чыкъмакъ киби, пек муим меселелелерни къаврап ала эди.
Тедбир иштиракчилерини Муфти, Санкт-Петербург ве Русиенинъ Шималий-гъарбий больгеси мусульманлары диний идаресининъ реиси Равиль хазрет Панчеев селямлады.
«Эки кунь девамында биз джемиетте темель хавфсызлыкъны темин этмек ве къорчаламакъ усулларыны музакере этеджекмиз. Бу меселеге къоранта ичинде олып кечкен джереянлар буюк тесир эте, ишбу меселе эм шахсий, эм де кутьлевий маневий истикърар ичюн пек муимдир», – деди о.
Форумнынъ мусафирлери огюнде Русие Федерациясы Президентининъ ички сиясет боюнджа идаресининъ диний тешкилятларнен иш алып барув боюнджа департаментнинъ башлыгъы Евгений Ерёмин чыкъышта булунды.
«Русие халкъынынъ фаркълы-фаркълы олушы, онынъ чокъмиллетли ве чокъдинли олушы – бизим энъ буюк зенгинлигимиз ве фазилетимиздир», – деди о.
Къырым Джумхуриети ве Севастополь шеэри Муфтиси адындан форумда идаремизнинъ диний тедбирлерни тешкиль этюв болюгининъ рехбери Зенифе Аблаева иштирак этти. О, форумнынъ бутюн мусульман уммети ичюн муимлигине ургъу япты.
«Биз, Къырым сакинлери, 11 йыл эвельси референдумда тарихий сайлавымызны кечирдик ве 2014 сенеси ресмий шекильде Русие девлетининъ бир къысымы олдыкъ. Русиеде асырлар боюнджа фаркълы халкъларнынъ ве динлернинъ векиллери муаббетликте ве барышыкълыкъта яшайлар. Биз динлерара ве миллетлерара диалогнынъ не къадар къыйметли ве эмиетли олгъаныны эр кестен яхшы билемиз. Хусусан, Украина заманында Къырымдаки Украина акимиети ресмий диний муэссисемиз – Къырым Муфтилигине къаршы оларакъ фаркълы йыкъыджы фыркъаларны ве акъымларны фааль шекильде ресмийлештире эди. Олар джемиетимизни болип, инсанларны бири-бирине къаршы къоя эдилер. Бугунь Къырым пек гузель яшай – инкишаф эте ве абаданлаштырыла: копюрлер, ёллар, мектеплер, хастаханелер, килиселер ве джамилер къурула, медений-тарихий мирас объектлери тамирлене. Амма, Къырым сакинлерининъ энъ буюк енъиши – бутюн дин ве миллет векиллери арасында гузель диалогнынъ къурулмасыдыр. Бу исе, урьметли Муфтимиз, хаджы Эмирали Аблаев иле Къырым Башлыгъы Сергей Аксёновнынъ гъайретининъ нетиджесидир».
Форум тез денъишкен дюньяда маневий-ахлякъий къыйметлернинъ инкишафы меселелери боюнджа фикир пайлашылмасы ве умумий къарарларгъа келинмеси ичюн муим бир мейдан олды.
Къырым МДИ матбуат хызмети