Kezlev bölgesiniñ baş imamı Eskender Memetov yerli ambulatoriyanıñ birinci rehberi, terapevt ekim Enver Bekirovnıñ hatırasına tantanalı sürette hatıra levhasınıñ açılışında iştirak etti. Mezkür levha Kezlevdeki İsmail bey qasabası ambulatoriyasınıñ binasında yerleştirildi.
Tedbir musafirleri ögünde çıqışta bulunıp, Eskender Memetov Enver Bekirovnıñ ambulatoriya inkişafında issesi pek büyük olğanını qayd etti.
“Ölümden soñra da savap ketirgen sadaqa çeşitleri bar. Enver Bekirov Allahnıñ razılığı içün, insanlarğa fayda ketirmek maqsadınen çalıştı. Bu dünyanı terk etkenine baqmadan, biz onıñ emeginden alâ daa istifade etemiz”, – dedi Eskender Memetov.
Tedbirde Qırım Cumhuriyeti Devlet Şurası başlığınıñ muavini Edip Ğafarov, QC sağlıq naziriniñ muavini Arsen Ziyadinov, QC Milletlerara munasebetler boyunca devlet komiteti reisiniñ muavini Ruslan Yaqubov, Kezlev memuriyetiniñ başlığı Yelena Demidova, Kezlev şeer hastahanesiniñ baş ekimi Aleksandr Şevtsov, halq vekilleri cemiasınıñ azaları ve cemaatçılıq vekilleri iştirak ettiler. Bundan da ğayrı, açıluv merasimine Enver Niyaziyeviç Bekirovnıñ soy-sopu, sabıq patsiyentleri, bir sıra işdeşi ve dostu qoşuldı.
Çıqışta bulunğanlar qayd etkenlerine köre, Enver Bekirov kibi insanlar kiçkene mesken yerleriniñ inkişafı sebebidir, çünki o zaman daa ğayet kiçik olğan İsmail bey qasabasında bir ekim ambulatoriyasınıñ açıluvı – bu yerniñ inkişaf etip, büyümesi içün büyük siltem oldı.
Merasimniñ soñunda ürmetli musafirler İsmail bey qasabasınıñ ambulatoriyasını baqıp çıqtılar. Künümizde anda hastalar ve tibbiyet hadimleri içün oñaytlı ve zemaneviy şarait yapıldı.
QMDİ matbuat hızmeti