Акъмесджитте Къырым Джумхуриетининъ Башлыгъы Сергей Аксёнов тарафындан Къырым мусульманлары ичюн тешкиль этильген эр йыллыкъ аньаневий ифтар кечирильди.
Къырым Джумхуриети ве Севастополь шеэри Муфтиси бутюн Къырым мусульманларынынъ адындан Сергей Аксёновгъа дикъкъаты ве мусафирченлиги ичюн миннтедарлыгъыны ве урьметини бильдирди. О, къайд этти ки, бойле тедбирлер Къырым джемиети ичюн буюк наалиеттир, бунъа коре де, эр кес оларнынъ къыйметини бильмели.
«Энди бир къач йыл девамында Къырым Башлыгъы адындан кечирильген ифтарларнынъ аньанеге чевирильгени бизни къувандыра. Энъ муими – олар бизни эпимизни бирлештире. Бир софра башында фаркълы миллет векиллерининъ отурып, олгъан шейлеринен бир-биринен пайлашмасы пек муимдир. Бу, Сергей Валерьевичнинъ Къырымны икметли шекильде идаре этмеси саесинде керчеклешти. Бунынъ ичюн сизге чокъ сагъ олунъыз айтмагъа истейим, биз даима сизнен берабермиз!», – деп, къайд этти Муфтиси эфенди.
Хаджы Эмирали Аблаев ифтар мусафирлерини мубарек Рамазан айынен хайырлады, эр кеске къавий иман, сагълыкъ ве эвлерине аманлыкъ тиледи. Бундан да гъайры, о, бутюн дин хадимлерине халкъкъа семерели хызмет эткенлери мунасебетинен миннетдарлыгъыны ве тешеккюрини бильдирди.
Сергей Аксёнов Къырым Джумхуриети ве Севастополь шеэри мусульманлары диний идаресине ве, шахсен, Къырым Муфтиси хаджы Эмирали Аблаевге, сиясет ве джемаат фаалиетчилерине аньаневий къыйметлернинъ сакъланылувына къошкъан исселери ве къырымлыларнынъ бирлигини пекитмелери ичюн тешеккюр бильдирди.
«Эр йыл мусульманлар ичюн мукъаддес айда корюшмек – гузель адетке чевирильди ве бу, даа бир кере Къырымда миллетлерара ве динлерара барышыкълыкънынъ къавийлигини нумайыш эте. 11 йыл ичинде энъ буюк енъишимиз – биз Къырымда яшагъан буютюн халкълар арасындаки урьметни, барышыкълыкъны, оларнынъ урф-адетлерини, медениетлерини сакълап олдыкъ. Къырым мусульманлары диний идаресине арбийлеримизге дестек ишине, аньаневий къыйметлернинъ сакъланылувына ве къырымлыларнынъ бирлиги пекитильмесине къошкъан иссеси ичюн тешеккюр бильдирем», – деп, къайд этти Сергей Аксёнов.
Ифтарда дин хадимлери, джемаат ве медениет эрбаплары, махсус арбий операциянынъ иштиракчилери, иш адамлары ве меценатлар иштирак эттилер.
Къырым МДИ матбуат хызмети