Джума куню Къырымнынъ бутюн джамилеринде къырымтатар халкъынынъ улу эрбабы Номан Челебиджиханнынъ хатырасына багъышлангъан дуа мерасимлери кечирильди.
Дуалар бирлик ве урьмет муитинде олып кечти. Мусульманлар Челебиджиханнынъ япкъан буюк иши ичюн миннетдарлыкъларыны бильдирмек ве онынъ акъкъында эйи сёзлер айтмакъ ичюн кельдилер. Дин оджалары джемаатларынен берабер къырымтатар халкъынынъ сербестлиги ичюн курешининъ тимсали олгъан Номан Челебиджиханнынъ фаалиетини, къырымтатар медениети ве озьгюнлигине къошкъан буюк иссесини хатырладылар.
Ихтар: Номан Челебиджихан – къырымтатар сиясетчиси ве джемаат эрбабы, Къырым Халкъ Джумхуриети акимиетининъ биринджи ёлбашчысы, I Къырымтатар миллий Къурултайнынъ биринджи тешкилятчысы, Къырым, Литвания, Лехистан ве Акърусиенинъ ильк Муфтисидир. О, къырымтатар миллий маршы олгъан «Ант эткенмен» шиирининъ муэллифидир. 1918 сенеси, февраль 23 куню о, анархист денъизджилер тарафындан ольдюрильген эди.
Къырым МДИ матбуат хызмети