Къырым Джумхуриети ве Севастополь шеэри Муфтиси хаджы Эмирали Аблаев Къырым Джумхуриетининъ Русиеге къошулгъанынынъ 11 йыллыгъына багъышлангъан тедбирде иштирак этти. Тедбир Къырым Джумхуриетининъ Девлет Шурасында олып кечти.
Чыкъышында Муфти эфенди бу кунни къайд этилювининъ муимлиги ве мезкюр муддет девамында Къырымда юзь берген мусбет денъишмелер акъкъында тариф этип, Русие Федерациясынынъ Президенти иле Къырым башлыкъларына дестеклери ве ишбирликлери ичюн тешеккюрлер бильдирди.
«Урьметли Сергей Валерьевич! Урьметли Владимир Андреевич! Азиз достлар!
Эминликнен бильдирем ки, бизни, къырымлыларны Раббимиз пек севе ве къорчалай. 11 йыл эвельси биз Онынъ имаеси алтында булунып, буюк къазадан къуртулдыкъ. 2014 сенеси биз учурымнынъ уджунда тура эдик, ве, эгер янълыш адым атсакъ, бам-башкъа фаджиалы керчеклернен юзь-юзге къала билир эдик. Афсус ки, къырымлыларны бу учурымгъа атмагъа истегенлернинъ сайысы аз дегиль эди.
Амма Русие Федерациясынынъ Президенти Владимир Владимирович Путиннинъ икмети ве сиясий зекясы бу фаджиагъа ёл бермеди ве къырымлыларны инкишаф ве иджат ёлуна ёнлендирди. Бунынъ ичюн биз онъа чокъ миннетдармыз.
Бундан да гъайры, Аксёнов Сергей Валерьевичке, Константинов Владимир Андреевичке ве Белавенцев Олег Евгеньевичке буюктен-буюк тешеккюрлер бильдиремиз. О куньлери олар этрафларында Къырым джемаатчылыгъыны бирлештирип олдылар ве Къырымны фираванлыкъ ёлуна ёнлендирдилер. Бу ёл керчек олды. О ишнинъ нетиджелерини биз бугунь козьлеримизнен коремиз. Мен бундан эминим. Буны бутюн дюньяда да коре. Чокъ йыллар девамында биз даимий стресс ичинде яшадыкъ, миллетлерара ве динлерара мунасебетлер суний шекильде кергинлештириле эди. Инсанларны бир-бирине уджюм эттире эдилер, къаршылыкълы нефрет дуйгъуларыны къозгъата эдилер. Амма артыкъ 11 йылдыр биз бам-башкъа вазиетте яшаймыз. Девлетимиз инсанларны бир-биринден айырмай, аксине, оларны бирлештирмек ве араларында достане ве гузель къомшулыкъ мунасебетлерининъ къурулмасы ичюн элинден кельгенини япа.
Мен дефаларджа айттым ве кене текрарлайым. Биз бир байракъ тюбюнде буюк бир гемиде ялдап кетемиз. Бу гемини къорчаламакъ – бизим умумий вазифемиздир. Бирлик олсакъ, ич бир зорлукъ бизни енъмез.
Догърулыкъ даима къазана, догъру тараф бизмиз!
Эр кесни Къырымнынъ Русиенен янъыдан бирлешюви кунюнен хайырлайым! Хайырлы олсун! Дикъкъатынъыз ичюн сагъ олунъыз!», – деди Къырым Муфтиси.
Къырым МДИ матбуат хызмети