Къырымнынъ пайтахтында тантаналы муитте къадынлар ичюн эр йыллыкъ умумджумхуриет хайрие ифтары кечирильди. Ифтарнынъ тешкилятчысы – Къырым Джумхуриети ве Севастополь шеэри мусульманлары диний идареси эркянында чалышкъан «Алем-и нисван» ислямий медений-маариф меркезидир.
Кечкен сене олгъаны киби, ифтарнынъ баш гъаеси хайрие олды. Мусафирлер ичюн «Мерхаметлик лялеси» хайрие акциясыны дестеклемек ичюн бир ярмалыкъ азырланылды. 2025 сенеси мезкюр акциянынъ макъсады – агъыр хаста балаларгъа ве Махсус арбий операция иштиракчилерининъ къоранталарына ярдым косьтермектир.
Ярмалыкъта балалар ве буюклер тарафындан япылгъан ве акциянынъ тимсали олгъан чешит шекиллердеки лялелер такъдим этильди. Бундан да гъайры, акцияда декоратив ве амелий санат боюнджа къырымтатар усталары да иштирак эттилер.
Адет узьре акъшамнынъ башында мусафирлерни «Алем-и нисван» къадынлар меркезининъ рехбери Зенифе Аблаева селямлады ве мубарек Рамазан айынен хайырлады. О, Къырым Муфтиси адындан махсус арбий операция зонасында булунгъан арбийлернинъ аналарына тешеккюрнамелер такъдим этти. Бунъа иляве оларакъ, МАО зонасына даимий шекильде гуманитар ярдымны топламагъа ве ёлламагъа ярдым эткен дин оджаларына ве гонъюллилерге де тешеккюрнамелер берильди.
«Бизим ифтарларымыз бирлешмекнинъ, миллетлерара ве динлерара бирдемликнинъ тимсали олды. Биз бунъа чокъ къуванамыз ве мында булунгъан эр бир мусафирге, бизнен олгъанынъыз ичюн, миннтедармыз. Амма айры тешеккюрлерни ватанымызнынъ келедежегине лякъайд къалмагъан инсанларгъа, дженк зонасында булунып, бизлер ичюн джанларыны техликеге аткъанларгъа ярдым эткенлерге, юреклеринден къопарып, ватанларыны къорчаламакъ ичюн огъулларыны арбий хызметке ёллагъан аналаргъа бильдирмеге истейим. Сизинъ саенъизде биз джебхе аркъасында аманлыкътамыз. Федакяр ве икметли къадынларымызнен гъурур дуямыз», – деди Зенифе Аблаева.
Акъшамнынъ урьметли мусафирлери арасында «Рус бирлиги» больгелерара джемаат тешкилятынынъ рехбери Елена Аксёнова булунды. О, тешкилятчыларгъа бойле бирлештириджи тедбирлер кечиргенлери ве оны давет эткенлери ичюн тешеккюр бильдирди ве МАО иштиракчилернинъ аналарына ве гонъюллилерге тешеккюрнамелер такъдим этти.
Умумджумхуриет къадын ифтарында меракълы медений программа да нумайыш этильди – къырымтатар артистлери оюн ве йырларнен чыкъышта булундылар, «Алем-и нисван» меркезининъ фаалиетини айдынлаткъан ве «Мерхаметлик лялеси» акциясы акъкъында бир сыра видеолевхалар косьтерильди.
Ифтарнынъ сонъунда исе, акъшамнынъ тешкилятчылары ве спонсорларындан бахшышлар къура чекилип, расткельгенлерге такъдим этильди.
Къырым МДИ матбуат хызмети