Fevzi Yaqubov adına Qırım müendislik ve pedagogika universitetinde “Merhametlik lâlesi” hayriye aktsiyası keçirildi. Aktsiya er yıl Qırım musulmanları diniy idaresiniñ (Tavriya Müftiyatınıñ) destegi ile Qırım musulmanlarınıñ hayriye fondu tarafından keçirile. Tedbirni selâmlav sözlerinen Qırım Müftisiniñ muavini, Qırım musulmanları hayriye fondunıñ başlığı Raim Ğafarov açtı.
“Sadaqa – insannıñ eñ eyi amellerinden biridir. Dinimiz barışıqlıqnıñ ve dostluqnıñ yayılmasına, birlikke ve diger insanlarğa nisbeten şefqatlı olmağa çağıra. Bunı yapmaqnıñ yollardan biri – Allah bizge buyurğanı sadaqadır”, – dedi Raim Ğafarov.
“Merhametlik lâlesi” aktsiyasınıñ kuratorı, Qırım musulmanları diniy idaresiniñ diniy tedbirlerni teşkil etüvi bölüginiñ başlığı, QC Başlığınıñ mesleatçısı Zenife Ablayeva qayd etti ki, aktsiyada farqlı dinlerniñ ve milletlerniñ vekilleri olğan talebeler, ocalar ve göñülliler iştirak etkeni içün, şu aktsiya milletlerara statusnı aldı.
“Hayriye aktsiyasında farqlı halqlarnıñ vekilleri iştirak etkeni bizim içün pek hoş ve müimdir. Bu bizim birligimizni, birdemligimizni köstere. Aktsiyada, işte, balalarnıñ faal iştirak etkeni çoq simvoliktir. Böyle leyhalarnı ömürge keçirip, biz em tedaviylenüvde muhtac olğanlarğa yardım etemiz, em de balalarğa maneviy ve ahlâqiy qıymetlerni aşlaymız”, – dep, qayd etti Zenife Ablayeva.
Yarmalıq iştirakçilerini Fevzi Yaqubov adına Qırım müendislik ve pedagogika universitetiniñ rektorı Çingiz Yaqubov selâmladı. O, aktsiya rehberine teşebbüsi içün teşekkür bildirdi ve böyle tedbirlerniñ müimligini qayd etti.
“Qırım Müftiligi er vaqıt hasta balalarğa ve yardımğa muhtac olğan er keske yardım köstere. Yat balalar olmağanı kibi, yat dertler de olmay. Bizler, biñlerce talebe talim-terbiye alğan bir universitet olaraq, böyle hayırlı işlerge öz issemizni qoşmaq imkânına saip olğanımızdan pek memnünmiz”, – dedi Çingiz Yakubov.
Tedbirniñ soñunda “Merhametlik lâlesi” aktsiyasınıñ keçirilüvine destek köstergenlerge teşekkürnameler berildi.
Aktsiyağa “İ. Gasprinskiy adına mediamerkez” qol tuttı. O, kitap auktsionını teşkil etti. Şu auktsionda toplanğan paralar hasta balalarğa yollanılacaq.
İhtar: “Balalarnıñ elinen ve büyüklerniñ eyi niyetinen” şiarı astında keçirilgen aktsiya 2023 senesiniñ mart 8-ine qadar devam etti. Aktsiyada Aqmescit şeeri ve rayonındaki mektep ve bala bağçalarınıñ talebeleri davet etildi. Olar öz ellerinen aktsiyanıñ timsali olğan lâleler yaptılar, soñra ise, lâleler satıldı. Toplanğan paralar maddiy destekke muhtac olğan balalarnıñ qorantalarına berilecek.
Qırım MDİ matbuat hızmeti