Къырымда Къырым Джумхуриети ве Севастополь шеэри мусульманлары диний идаресининъ эр йыллыкъ «Мерхаметлик лялеси» акциясы боюнджа хайрие ярмалыкълары башланды.
Къырым Джумхуриетининъ Яшлар сиясети девлет комитетининъ дестеги иле «Яшлар эви»-нинъ гонъюллилери Акъмесджитнинъ меркезинде шеэр сакинлерини акциянынъ тимсали олып, балалар тарафындан япылгъан лялелернен къувандырдылар.
Акциянынъ кураторы, Муфтиликнинъ диний тедбирлерни тешкиль этюв болюгининъ рехбери Зенифе Аблаева акциягъа буюк меракъ косьтерильгенини айрыджа къайд этти, ве бильдирди ки, топлангъан бутюн паралар агъыр хаста балаларнынъ тедавийленювине ве Махсус арбий операция иштиракчилерининъ къоранталарына дестек косьтермек ичюн масраф этиледжек.
Хатырлатамыз, «Мерхаметлик лялеси» бутюнкъырым акциясы беш йыл девамында диний идаремиз тарафындан кечириле. Бу вакъыт ичинде ишбу акция черчивесинде онларджа мухтадж къоранталардаки балаларгъа дестек косьтерильди. Бойледже, меселя, кечкен сене 500 000 рубле топланылып, Кефе шеэринде бала хосписининъ къуруджылыгъына ёлланылды.
Мерхаметлик лялеси хайрие акциясына багъышлангъан тедбирлер бутюн Къырым боюнджа апрель айынынъ сонъуна къадар кечириледжек.
Къырым МДИ матбуат хызмети