Qırım Cumhuriyetiniñ Nazirler Şurasında IX er yıllıq “2022 yılınıñ jurnalisti” mukâfatınıñ taqdirlev merasimi olıp keçti. Bu sene yarışnıñ komissiyası 24 nominatsiyada 232 işni qabul etti.
Qırım Cumhuriyeti Devlet Şurası Başlığınıñ Gran-pri mukâfatını Qırım Cumhuriyeti ve Sevastopol şeeri musulmanları diniy idaresi tarafından çıqarılğan “Müfti. Dua ile” filmi aldı. Çekim taqımına diplomnı Qırım Devlet Şurası Başlığınıñ Birinci muavini Yefim Fiks taqdim etti.
“Filmniñ baş prodüsseri Zenife Ablayevanıñ rehberliginde ve rejissör Viktor Lopata ile birlikte, bizim kiçik, amma faal taqımımız Qırım tarihınıñ saifelerinde mıtlaqa qalacaq bir filmni çıqarğanı içün bahtlıdır. “Müfti. Dua ile” filmi Qırım musulmanları diniy yetekçisiniñ ne qadar müim missiyanı üstlengenini ve 23 yıl devamında Qırımda dinlerara ve milletlerara barışıqlıqqa qoşqan salmaqlı issesini köstere. Böyle ğalebeler bizge yañı leyihalarnı meydanğa ketirmege siltem bere”, – dedi film stsenariyiniñ müellifi Elvina Memetova.
Kütleviy matbuat vastalarınıñ eñ güzel müthesassıslarını Qırım Cumhuriyetiniñ başlığı Sergey Aksönov, Qırım Cumhuriyeti Devlet Şurası Başlığınıñ birinci muavini Yefim Fiks, İnformatsiya siyaseti, informatsiya tehnologiyaları ve bağ komitetiniñ reisi İvan Manuçarov, QC Cemaat Palatasınıñ başlığı Aleksandr Formançuk ve QC İçki siyaset, malümat ve bağ naziri Vladimir Tregub taqdirlediler.
Qırım Cumhuriyetinde “Yıl jurnalisti” mukâfatı 2014 senesinden başlap, er yıl keçirile.
Qırım MDİ matbuat hızmeti