Qırım Cumhuriyeti ve Sevastopol şeeri musulmanları diniy idaresinde din ocaları ve Qırımnıñ bölge imamları içün maarif seminarları ötkerildi.
Diniy hadimler ögünde selâmlav sözleri ile Qırım Müftisiniñ muavini Raim Ğafarov çıqışta bulundı, qadın ocalarnı ise, müftiligimizniñ diniy tedbirlerni teşkil etüv bölüginiñ rehberi Zenife Ablayeva selâmladı.
Seminarlarnıñ programmasına nevbetteki mevzular kirdi:
⁃ diniy, maliyeviy, uquqiy bilgiler;
⁃ şahıs inkişafı, içtimaiy ağlarda diniy tebliğ yönelişinde iş alıp baruv meselesinde yardım;
⁃ konsultatsiyalar ve farqlı kategoriyalardan olğan vatandaşlarımıznıñ diniy, maliyeviy, uquqiy ve içtimaiy qoruv saalarında aktual qanuniy bilgiler;
⁃ Qırımda İslâmnıñ tarihı;
⁃ diniy faaliyetni doğru alıp barmağa yardım etken usullarnı ögrenüv;
⁃ alınğan bilgilerniñ ayatqa aşırılması ile professional ve içtimaiy faaliyetke keçirilmesi.
Buña ilâve olaraq, toplaşuv esnasında berilgen bütün suallerge cevaplar alındı. Tedbirniñ soñunda seminarnıñ spikerleri ve iştirakçiler içün ziyafet azırlanıldı.
Qırım MDİ matbuat hızmeti