Qırım ve Sevastopol Müftisiniñ muavini, Aqmescit şeeriniñ baş imamı Muhammed İslamov Cezalarnı icra etüv federal hızmetiniñ idaresi (ÜFSİN) başlığınıñ diniy sualler boyunca yardımcısı, protoiyerey Roman Tsurkan ile birlikte Aqmescit şeeriniñ №2 tahkiqat izolâtorını ziyaret etti. Şu apishanede mahküm etilgen ve şübelengen musulmanlarnıñ ve hristianlarnıñ ibadet ete bilmeleri içün eki ayrı oda ayırıldı.
Muhammed İslamov Qırım Cumhuriyeti ve Sevastopol şeeri musulmanları diniy idaresi adından bir çoq diniy kitapnı, bir qaç muqaddes Quran nushasını ve namazlıqnı bahşış olaraq taqdim etti. Bundan da ğayrı, körüşüv esnasında işbirlik aqqında añlaşma imzalandı. “İleride biz birlikte mahkümlerniñ ve şübelengenlerniñ diniy ihtiyaclarını yerine ketirmeleri içün ibadet odalarını abadanlaştıruv işni keçirecekmiz”, – qayd etti Muhammed İslamov.
Qırım MDİ matbuat hızmeti