Къырым Джумхуриети ве Севастополь шеэри мусульманлары диний идаресинде Ораза байрамыны къайд этюв черчивесинде медениет, сагълыкъ, тахсиль ве дигер сааларда чалышкъан къадынларнен корюшюв кечирильди. Тедбир сыджакъ ве гузель муитте олып кечти, иштиракчилери ишбирлик боюнджа меселелерни музакере этмеге имкян булдылар.
Муфтилигимизнинъ диний тедбирлерни тешкиль этюв болюгининъ рехбери Зенифе Аблаева къайд эткени киби, мукъаддес байрам бир къач кунь девам эте ве гонъюль бу вакъытны къыйметли ве азиз инсанларнен кечирмеге истей.
«Ораза байрамы – бутюн мусульманлар ичюн айдын байрамдыр. Адет узьре, бу кунь бир къач йылдыр джумхуриетимизнинъ фаркълы дин ве медениет векиллерини бирлештире. Бу сене де биз янъы куллиемизге достларымызны ве ишдешлеримизни давет этерек, къырымтатар къавеси ве татлылыкълар иле донатылгъан байрам софрасында бирликте булундыкъ, илеридеки планларымызны музакере эттик. Артыкъ, бойле корюшювлер аньаневий оладжакъ», – деп айтты Зенифе Аблаева.
Мусафирлер буюк къуванчнен гъайры ресмий тедбирде иштирак эттилер, байрамлаштылар, ишбирликнинъ перспективалары ве динлерара диалогнынъ муимлиги боюнджа озь фикирлеринен пайлаштылар. Ораза байрамы янъы алякъаларнынъ къурулмасы ве актуаль меселелернинъ музакере этильмеси ичюн гузель бир фырсат олды.
Бундан сонъ мусафирлер ичюн Буюк Джума джами боюнджа меракълы экскурсия кечирильди.
Тедбир тешкилятчылары бойле тедбирлернинъ муимлигини айрыджа къайд эттилер, чюнки олар фаркълы дин ве медениет менсюплери арасындаки мунасебетлерни пекителер ве бутюн джемиет файдасына умумий тешеббюслернинъ омюрге кечирильмеси ичюн бир платформанынъ пейда этильмесини теминлейлер.
Къырым МДИ матбуат хызмети