Aqmescitteki Büyük Cuma camini Qırım Cumhuriyeti Cemaat palatasınıñ azaları, QC Devlet Şurasınıñ halq vekili Aleksandr Batalin, QC İqtisadiyat nazirliginiñ, Mesken-kommunal hocalığı nazirliginiñ, Milletlerara munasebetler boyunca devlet komitetiniñ, Prokuraturanıñ, Milletlerara munasebetler boyunca devlet komiteti yanında çalışqan Cemaat Şurasınıñ ve Aqmescit şeeri Cemaat Şurasınıñ temsilcileri ziyaret ettiler.
Musafirlerni Cuma cami külliyesi boyunca Qırım musulmanları diniy iaderesiniñ mesül kâtibi Ayder Acimambetov kezdirdi. O, Qırım Müftisi hacı Emirali Ablayev adından musafirlerge Qırımnıñ yañı medeniy obyektine köstergen meraqları içün teşekkür bildirdi.
Mezkür ziyaret çerçivesinde Qırım Cumhuriyeti ve Sevastopol şeeri musulmanları diniy idaresinde Qırım Cumhuriyeti Cemaat palatasınıñ devlet idaresi keyfiyetiniñ monitoringi, normativ-uquqiy aktlarnıñ ve diger uquqiy teşebbüslerniñ ekspertizası ile infrastrukturanıñ inkişafı, mesken-kommunal hocalıq ve ekologiya meseleleri boyunca komissiyalarnıñ umumiy toplaşuvı olıp keçti.
İş körüşüvinde Qırım Cumhuriyetinde 2024 senesi milliy ve regional leyhalarnıñ ve programmalarnıñ ömürge keçirilmesine cemaat nezareti, Qırım Cumhuriyeti akimiyet organlarınıñ faaliyeti aqqında elektron malümatnıñ keyfiyeti boyunca monitoringniñ neticelerini çıqaruv ve Qırım Cumhuriyeti Cemaat palatası azalarınıñ çıqış vatandaşlarnı qabul etüvleri meseleleri muzakere etildi.
Bundan da ğayrı, Qırım Cumhuriyeti Milletlerara munasebetler boyunca devlet komiteti yanındaki Cemaat Şurası komissiyasınıñ da toplaşuvı olıp keçti. Toplaşuvda Milletlerara munasebetler boyunca komitetniñ faaliyetine cemaat nezareti, cemaat ekspertizasınıñ keçirilüvi ve normativ uquqiy aktlar leyhalarınıñ cemat tarafından muzakere etilmesi meseleleri baqılıp çıqıldı. Mezkür toplaşuvda Milletlerara munasebetler boyunca komitet yanındaki Cemaat Şurasınıñ azaları işbu komissiyanıñ azaları tarafından qabul etilgen kün tertibine kirsetilgen meselelerni baqıp çıqtılar.
Ziyaret neticesinde musafirler Büyük Cuma cami aqqında eñ güzel teessüratlarınen paylaştılar ve Qırım Müftisine Cuma camini ziyaret etmek ve mında iş toplaşuvlarını keçirmek imkânı içün teşekkürler bildirdiler.
Qırım MDİ matbuat hızmeti