Qırım Cumhuriyeti ve Sevastopol şeeri Müftisiniñ yardımcısı, Aqmescit şeeriniñ baş imamı Muhammed İslamov dinlerara taqımınıñ işinde iştirak etti. Körüşüv Aqmescit şeeriniñ №1 Tüzetüv koloniyasında olıp keçti. Tedbirde Qırım Cumhuriyeti ve Sevastopol şeeri boyunca Federal İcra hızmeti başlığınıñ diniy işler boyunca yardımcısı Roman Tsurkan, №1 Tüzetüv koloniyası başlığınıñ muavini Denis Dmitriyev iştirak ettiler.
Dinlerara taqımınıñ iştirakçileri em musulmanlardan, em de hristianlardan olğan inanğan mahküm etilgenlernen alâqalı çeşit meselelerni muzakere ettiler. Ayrı diqqat antiterroristik yönelişke ayırıldı.
Bundan da ğayrı, Muhammed İslamov mahküm musulmanlarnen körüşip, Üç aylarnıñ başlanuvınen bağlı lektsiya oqudı ve №1 Tüzetüv koloniyasında olğan camide cemaat namazını keçirdi.
“Biz balalarnı meraqlandırğan meselelerni muzakere ettik. Olar diniy saada temel bilgilerni almaq içün Qırım Müftiligine diniy edebiyatnı taqdim etmek ricasınen bulundılar”, – tarif etti Muhammed İslamov.
Muhammed İslamov ise, öz nevbetinde Qırım Cumhuriyeti ve Sevastopol şeeri musulmanları diniy idaresiniñ faaliyeti aqqında tarif etti, Qırım musulmanlarınıñ diniy yetekçisi hacı Emirali Ablayevniñ destek sözlerini yetkizdi ve mahkümlerge tezce azat olmalarını tiledi.
Qırım MDİ matbuat hızmeti