Qırım Müftisiniñ muavini Raim Ğafarov Aqmescitniñ cemaatçılıq tarafından özüni idare etüv territorial akimiyetiniñ reisleri içün keçirilgen “Esas şeyler aqqında suhbet” tedbirinde iştirak etti. Körüşüv Aqmescit şeeriniñ tarih müzeyinde ötkerildi. Tedbirniñ keçirilüv yeri tesadüfen saylanmadı, müzeyniñ binası 19 asırnıñ ekinci yarısı mimarcılığınıñ meraqlı nümünesi olıp, dünya medeniyetiniñ tarihında parlaq izler qaldırğan belli zatlarnıñ ayatı ve faaliyetinen bağlıdır. Müessiseniñ faaliyeti ve maqsatları paytahtımıznıñ medeniy, içtimaiy ve iqtisadiy inkişafınen bağlıdır.
“Bütün milletlerniñ ve dinlerniñ vekilleri bir ahlâqiy ve umuminsaniy printsiplerni kütip, muabbetlikte yaşamalı”, – dep, qayd etti Raim Ğafarov.
Bundan da ğayrı, tedbirde protoiyerey, Aqmescit ve Qırım yeparhiyasınıñ Aqmescitteki birinci bölüginiñ nezaretçisi Bogdan Severin iştirak etti.
Tedbir iştirakçileri “Merhamet” teşkilâtınıñ reisi Dilara İbraimovanıñ Ulu Vatan cenkinde qorantasınıñ başından keçirgeni ve sürgünlik vaqıtında yaşağan faciası aqqında ikâyesini diñlediler. “Bitak” teşkilâtınıñ reisi Serafima Sapego cemaatçılıqtan göñüllilerniñ Mahsus Arbiy Areket iştirakçilerine köstergen yardımı aqqında tarif etti.
Qırım MDİ matbuat hızmeti