Qırım Cumhuriyeti ve Sevastopol şeeri musulmanları diniy idaresiniñ hadimleri Aqmescitteki “Salğır baba” azizinde talaqa keçirdiler. Talaqanıñ keçirilmesine şeer memuriyeti destek kösterdi. Talaqa iştirakçileri azizniñ saasını yapraqlardan ve quruğan ottan temizledi, çöplükni çıqardı, terek ve çalılarnı kestiler. Temizlik işlerinden soñ, adet üzre, aziz Salğır Babanıñ kömülgeni mezar başında dua oquldı.
Talaqada iştirak etken Qırım Müftisiniñ muavini Raim Ğafarov Müftiyat hadimlerine ve şeer memuriyetine yapılğan işler içün teşekkür bildirdi ve qayd etti ki, musulmanlar içün aziz cuma kününde aziz “Salğır Baba”-nıñ mezarını temizlemek güzel bir adet oldı. Hadislerniñ birinde aytılğanı kibi: “Temizlik – imannıñ yarısıdır”.
İHTAR: Salğır baba azizi XVII asırdan başlap, aziz bir yer olaraq bellidir. Rivayetlerge köre, Salğır baba salih ve zahid bir zat olaraq belli olıp, ibadet içün Salğır özeniniñ yalısında yerleşken emenlikke inzivağa çekile edi. Onıñ duasını almaq ve şifa tapmaq içün yanına bir çoq insan kele edi. Aqmescitteki şu tarihiy mekân uzun yıllar devamında harabe alında edi. Ancaq 2020 sene şu topraq, niayet, Qırım musulmanları diniy idaresiniñ mülkiyetine keçirildi.
Qırım MDİ matbuat hızmeti