Qırım Cumhuriyeti ve Sevastopol şeeri Müftisiniñ yardımcısı, Aqmescit şeeriniñ baş imamı Muhammed İslamov Qırım Cumhuriyeti ve Sevastopol şeeri boyunca Federal İcra hızmeti başlığınıñ diniy işler boyunca yardımcısı Roman Tsurkan ile birlikte şartlı olaraq mahküm etilgen vatandaşlar içün lektsiyalar keçirdi. Tedbirde şartlı olaraq mahküm etilgen musulmanlar ve ortodoks hristianlar bulundı. Tedbirde diniy hadimler mahküm etilgen insanlarnıñ maneviy-ahlâqiy terbiyesi mevzusını köterdiler. Muhammed İslamovnıñ sözlerine köre, bu mevzu insanlarğa özüni esapqa çekip tüşünmege, hatasını añlamağa ve doğru yolğa qaytmağa yardım ete.
“Cinayetni işlegen adamnen imamlar ya da papazlar çalışqanda, onıñ tövbe etmesi, hatalarnı añlap tüzelmesi ihtimalı peyda ola. Onıñ alı yengilleşe, o, göñülden tüşmey, çünki oña destek kösterile ve doğru bilgiler berile. İnsan bir özü degil, er şeyni afu etmesi mümkün Yüce Rabbimiz onen beraberdir”, – dep, qayd etti Muhammed İslamov.
Onıñ ilâve etkenine köre, böyle suhbetlerden soñ mahkümlerniñ tüzelmek ve cemiyetke faydalı bir insan olaraq qaytmaq istegi peyda ola.
Bundan da ğayrı, Aqmescit rayonı boyunca Cinayetlerni icra etüv inspektsiyasınıñ temsilcileri ile ekinci lektsiya olıp keçti. “Biz Cinayetlerni icra etüv inspektsiyasınıñ başlığı Gülnara Mustafayevağa lektsiyanı teşkil etkeni içün teşekkür bildiremiz”, – dedi Muhammed İslamov.
Tedbir devamında em mahkümler, em de Cinayetlerni icra etüv inspektsiyasınıñ hadimleri diniy mevzuda bir çoq sualler berdiler. Muhammed İslamov ise, öz nevbetinde Qırım Cumhuriyeti ve Sevastopol şeeri musulmanları diniy idaresiniñ faaliyeti aqqında tarif etti, Qırım musulmanlarınıñ diniy yetekçisi hacı Emirali Ablayevniñ destek sözlerini yetkizdi ve mahkümlerge tezce azat olmalarını tiledi.
Qırım MDİ matbuat hızmeti