Qırım Müftisi hacı Emirali Ablayev Qırım Cumhuriyetiniñ Devlet Şurasında Bütünqırım referendumınıñ 9 yıllığına ve Qırımnıñ Rusiye ile birleşmesi kününe bağışlanğan tantanalı tedbirde iştirak etti.
Toplaşuv iştirakçilerine selâmlav sözleri ile Qırım Cumhuriyetiniñ başlığı Sergey Aksönov muracaat etti.
“Keçken 9 yıl devamında eñ müimi nedir? Biz bir-birimizge ürmetni, Prezidentimizge işançnı, ülkemiz Rusiyege ve Rusiyege kirgen Qırımğa sevgimizni saqlap qaldıq. Bu – elde etkenimiz eñ müim şey. Milletlerara barışıqlıq, uyumlılıq, farqlı dinlerge ve milletlerge mensüp Qırım sakinleri arasındaki qarşılıqlı ürmet. Mında bulunğan din erbaplarına, bütün diniy yetekçilerge teşekkürlerimni bildirmege isteyim. Bilesiñizmi, olıp keçkenler bizni birleştirdi. Eger biz bu birlikni saqlasaq, demek, aynı şekilde yolumıznı devam etermiz. Bugün ögümizde yañı vazifler bar. Qardaş bölgelerimizge yardım etmek vazifesi”, – dep, qayd etti Qırım başlığı.
Qırım Devlet Şurasınıñ Başlığı Vladimir Konstantinov öz çıqışında qayd etti ki, doquz yıl keçken soñ, Rusiye Qırımı tarihınıñ yañı deviri başlana.
“Qırım – Rusiyeniñ bütünley integratsiya olğan ve dinamik şekilde inkişaf etken bir bölgesidir. Bizim içün eñ müimi ve degerlisi – Qırım sakinleriniñ işançını saqlap qalğanımızdır. Rusiyede yaşağanımız er yıl doğru yolnı saylağanımıznı tasdıq ete”, – dedi Vladimir Konstantinov.
Tantanalı tedbirde Rusiye Federatsiyası Prezidentiniñ Cenübiy federal bölgedeki vekâletli temsilcisiniñ muavini, vaqıtınca Herson velâyetiniñ gubernatorı vazifesini yerine ketirgen kişi, QC halq vekilleri, akimiyet azaları, münitsipal akimiyetiniñ vekilleri, din ve cemaat faalleri ve digerler iştirak ettiler.
Qırım MDİ matbuat hızmeti