Qırım Cumhuriyeti ve Sevastopol şeeri Müftisi hacı Emirali Ablayev musulmanlarnı mubarek Ramazan ayınıñ başlanuvı ile hayırladı!
“Bismillâhi’r-rahmani’r-rahim!
Aziz milletimiz! Sayğılı musulmanlar! Beklegenimiz, 11 aynıñ sultanı Ramazan ayına qavuşmaqtamız. Ramazan ayında oraza bizler içün farz etildi. Quran-ı Kerimde emir etilgeni kibi: “Ey, iman etkenler! Sizden evel kelgenlerge farz etilgeni kibi, sizlerge de oraza farz etildi, – belki de (Allahqa qarşı kelmekten) saqınırsıñız” (“Baqara” suresi, 2/183).
Ramazan ayında, elbette, biz oraza tutacamız, ibadetler, dualar yapacaqmız, günahlarnıñ bağışlanması içün niyaz etecekmiz. Eger inanaraq, qalbimizden bularnı yapsaq, elbette, bizler içün cennet qapuları açılacaq.
Aziz qardaşlarım! Ramazan ayı bizler ve bütün İslâm alemi içün büyük bir aydır. Bu ayda, elimizden kelgeni qadar, sabırlı, aqıllı, fikirli olmaq, öz areket ve sözlerine diqqat etmek, bir-birimizge ürmet köstermek ve aynı ibadetler ile keçirmek kerek.
Bizim, Qırım musulmanlarınıñ, bugün eñ muhtac olğanı şey – Allahqa dua etmektir. Er namazdan soñ, sofra başlarında dua etmeli. Dua etmelimiz ki, Rabbimiz bizim atalarımızğa bergeni sıqıntılarnı bugün bizge ve balalarımızğa bermesin, köstermesin. İnanam ki, bütün ibadetlerimiz, bütün dualarımız qabul olur, inşallah, çünki Ramazan ayında bütün cennet qapuları açıqtır.
Ramazan epimizge hayırlı ve mubarek olsun. Orazanıñ, Ramazan ayınıñ soñunda etecegimiz büyük bayramımızğa milletimiznen beraber qavuşmaq ve bayramlaşmaq nasip olsun. Sağ oluñız, bar oluñız!”
Qırım MDİ matbuat hızmeti