Sarıtav (Saratov) şeerinde Eduard Ğaneyev adına II Bütünrusiye Quran yarışı olıp keçti. Musabaqa A. Şnitke adına Sarıtav vilâyet filarmoniyasında ötkerildi. Quran tilâvetinde Rusiyeniñ 17 bölgesinden – Moskov şeerinden, Tatarstan, Başqortostan, Dağıstan, Çeçenistan, İnğuşistan, Qaraçay-Çerkes, Şimaliy Ösetiya, Qırım cumhuriyetlerinden, Stavropol, Perm ve Primorsk ülkelerinden, Moskov, Ülyanovsk, Penza, Sarıtav ve İvanovo vilâyetlerinden kelgen bilgirler yarışlaştılar.
Yarışçılar üç nominatsiyada yarışlaştılar – “Hifz” (bütün Qurannıñ ezberi), “5 cuz” (soqur iştirakçiler arasında) ve “Soñki üç cuz” (14 yaşına qadar gençler arasında).
Qırım Cumhuriyetini bizim medresemizniñ talebeleri temsil etti. Yahya İbragimov “Hifz” (bütün Qurannıñ ezberi) nominatsiyasında, Davud Çabanov “Soñki üç cuz” nominatsiyasında iştirak ettiler.
Ezberniñ sağlamlığına, doğru telâffuzğa ve eda güzelligine Moskov İslâm institutınıñ ilâhiyat bölügi dekanı, şeriat magistri Ruslan Baişev (jüri başlığı), Qurman hafızlar medresesiniñ rehberi Suleyman Samedinov (Qırım Cumhuriyeti) ve PMDİ yanındaki “Zeyd bin Sabit” Quran merkeziniñ ocası Abdulaziz Tuğuşev terkibindeki jüri qıymet kesti.
Yarış neticesinde iştirakçiler fahriy yarlıqlar ve qıymetli bahşışlar aldılar.
Qırım MDİ matbuat hızmeti