Qırım Cumhuriyeti ve Sevastopol şeeri musulmanları diniy idaresinde umumtahsil mektepleriniñ talebeleri arasında Noman Çelebicihannıñ hatırasına bağışlanğan “Ebediy yüreklerimizde” inşalar yarışı olıp keçti.
III Bütünqırım bediiy inşalar yarışında ğalip çıqqan talebelerniñ tantanalı taqdirlenüvi Qırımtatar akademik muzıkalı drama teatrinde olıp keçti.
Yarış oqutuvı qırımtatar tilinde alıp barılğan umumtahsil mekteplerniñ talebeleri arasında keçirildi. Umumen yarışqa 40 iş keldi.
Yarış neticesinde jüri azaları beş ğalipni belgiledi.
I yerni birden eki talebe aldı – Asanov Osman Ervinoviç, Aqmescit iqtisadiy litseyiniñ 6-A sınıf talebesi ve Qurtsüinova Sultaniye Ernestovna, Seyitler rayonı Çaya (Jelâbovka) köyü umumtahsil mektebininiñ 9 sınıf talebesi. Er biri 15 biñ rublelik mukâfatnı aldı.
II yerni Seitasanova Ayşe Ruslanovna, Bağçasaraydaki № 5 umumtahsil mektebiniñ 9 sınıf tebesi aldı. O, 10 biñ rublelik mukâfatnı qazandı.
III yerde – Çahmarova Alime Rustemovna, İmam Maturidiy adına Qalay islâmiy ilimler medresesiniñ 10 sınıf talebesi. Priz – 5 biñ rublelik sertifikat.
Jüri tarafından berilgen mahsus mukâfatnı Qalımtay (Tenistoye) umumtahsil mektebiniñ 5 sınıf talebesi Ametov Arslan Şakiroviç aldı. O, 5 biñ rublelik mukâfatnı qazandı.
Tedbirde Qırım Cumhuriyeti milletlerara munasebetler boyunca devlet komitetiniñ reisi Ayder Tippa, professor, Qırımtatar filologiyası, tarihı ve Qırım halqlarınıñ medeniyeti boyunca İlmiy tedqiqat institutınıñ direktorı İsmail Kerimov ve Qırımtatar medeniy tarihiy miras müzeyiniñ üyken ilmiy hadimi Şefiqa Abduramanova çıqışta bulundılar.
Yarışnıñ teşkilâtçısı – Qırım Cumhuriyeti ve Sevastopol şeeri musulmanları diniy idaresidir. Musabaqa Qırım Cumhuriyetiniñ tahsil, ilim ve yaşlar nazirliginiñ destegi ve Qırım Müftisiniñ teşebbüsi ile ötkerildi.
“Böyle yarışlarnen biz yaş nesilimizni halqımıznıñ tarihını ögrenmek ve ulu insanlarnı tanımaq içün rağbetlendirmek kerekmiz. Noman Çelebicihan, Cafer Seydamet, Osman Aqçoqraqlı, Yaqub Kemal kibi yurtumıznıñ vatanperverleri tahsilniñ inkişafına büyük isse qoştılar, mekteplerniñ, medreselerniñ, universitetlerniñ açılmasına yardım ete ediler. Olar milletniñ kelecegini tahsil ile köre ediler. Biz de bugün bu yolnı devam etemiz, tahsil – halqımız inkişafınıñ temelidir”, – dedi hacı Emirali Ablayev.
Yarışnıñ maqsadı – balalarda vatanperverlik, qaramanlıq duyğularını terbiyelemek, yaş nesilniñ maneviy-ahlâqiy temelini qaviyleştirmek, yaşlarda tuvğan topraqqa sevgi, ğurur ve ürmet duyğularını asıl etmektir.
Qırım MDİ matbut hızmeti