Qırım Cumhuriyeti ve Sevastopol şeeri musulmanları diniy idaresinde (Tavriya Müftiyatında) Mirac gecesi munasebetinen iftar keçirildi. Kebir camide Qırım Müftisiniñ muavini Raim Ğafarov Muqaddes Qurandan sureler oqup, Peyğamberimizniñ acayıp mirac mücizesi aqqında tarif etti.
Qırım musulmanları diniy idaresiniñ hadimleri böyle tedbirlerni Qırımnıñ bütün camilerinde keçirdiler.
Hatırlatamız, fevral 17-18 bağlağan gecede musulmanlar Mirac gecesini qayd eteler. Mirac gecesi Qadir gecesinden soñ eñ müim gecelerden biri sayıla.
Adet üzre, aqşam namazından soñ camilerde diniy programmalar keçirile ve musulmanlarğa şu geceniñ qıymeti aqqında tarif etile, Qurandan “Yasin” ve diger sureler oqula.
“Mirac” sözü arapçada yuqarı çıquv, yükselüv, yücelüv manalarına kele. İslâmda mirac dep, Hazret-i Peyğamberniñ (s.a.s.) kökke yükselip, Allahnıñ huzurına qabul etilmesi mücizesine aytalar. Mirac adisesiniñ Hazret-i Muhammedniñ (s.a.s.) Mescid-i Aqsadan yedi qat kökke ve daa yükseklerge hicretten bir yıl ya da on yedi ay evel, Receb ayınıñ yigirmi yedinci gecesi, milâdiy 621 yılında kerçekleşkeni rivayet etile. Bu mubarek gecede Peyğameberge (s.a.s.) namaz ibadeti buyurıldı ve şu vaqıttan başlap, namaz – İslâm dininiñ temellerinden biri oldı.
Geceni dualar, Quran oqup, ibadet etip, Mirac mücizesini añlatıp keçirmek tevsiye etile. Sahabe Salman Farisiyniñ sözlerine köre, Peyğamberimiz (s.a.s.) Mirac gecesi aqqında böyle degen: “Recep ayında hususiy bir kün ve bir gece bar, bu – aynıñ yigirmi yedinci gecesidir. Şu künni oraza ile, geceni ise, ibadet ile keçirgen kişi, yüz yıl oraza tutqan ve ibadet etken insan kibi olur”.
Qırım MDİ matbuat hızmeti